Manipud Managbasatayo
Kanser ti Suso Pagyamanan unay iti panangipablaakyo kadagiti serye a “Kanser ti Suso—Pagam-amkan ti Isuamin a Babbai.” (Abril 8, 1994) Pasaray sukimatek idi ti bagik ket impagarupko no natangken laeng dagiti glandulak. Gapu ta patiek unay a dinto tumanor, diak inkankano dayta. Nupay kasta, kalpasan a nabasak ti artikuloyo, napanak idiay ospital ket naammuak nga adda kanserko. Nayurnos ti pannakaoperak. Naimpusuan unay ti panagyamanko kadakayo.
T. Y., Japan
Sipud pannakaoperak, awan pay nabasbasak maipapan iti kanser. Isu nga idi simmangpet ti magasin, naragsakanak iti dayta. Ngem masansan nga ungpotek a basaen amin a ruar ti Agriingkayo!, ket iti daydi a rabii inkeddengko a bassit lat’ basaek ken isardengko no mapabutnganak. Ngem, diak met maisardeng idin ti agbasa. Nagsayaat unay ti pannakaputarna, aduan-impormasion, ken mangisakit.
G. K., Estados Unidos
Ti artikulo tinulongannak a mangtarus no kasano a maawatan ni Jehova dagiti pagam-amkantayo a mangsaranget iti mangkettel-biag a sakit. Naynay idit’ panangipagarupko a nakapuy wenno kurang ti pammati dagidiay makarikna iti kastoy. Talaga a tinulongannak a mangtarus iti kasta unay nga asi ni Jehova.
K. G., Estados Unidos
No adda man magasin a nakisarita iti maysa a tao, sigurado a dayta a ruar ti nakisaritan kaniak. Nagkatugawkami ken lakayko iti maysa a sopa a nakawara iti aglawlawmi dagiti resibo ti babayadanmi idiay ospital gapu iti pannakaopera ti kanser iti susok. Bayat nga isagsaganami dagiti tseke a pagbayadmi, intulod ti kartero daytoy a ruar ti Agriingkayo! Binasak dayta nga artikulo iti dayta met la nga aldaw, buyogen iti naisangsangayan nga interes. Iti biang ti amin a babbai a mapatibkerto ti pakinakemda iti pannakabasada kadagitoy nga artikulo, pagyamanan kadakayo.
E. J., Estados Unidos
Dagiti Siudad Agtawenak iti 16 ket naragsakanak a nakabasa iti serye maipapan kadagiti siudad. Iti klasemi a geography, nakiddaw kadakami a mangiparangkami iti ababa a palawag maipapan iti napilimi a tema. Imbasarko ti palawagko iti artikulo a “Ti Siudad nga Aduan Idi iti Tao.” (Enero 22, 1994) Kalpasan ti napigsa a panangbasak iti palawagko iti klasemi, nagpalakpak ti amin. Pagyamanan iti panangtulongyo kaniak a mangparang-ay iti pannakaawatko iti geograpia.
T. R., Alemania
Iti artikulo a “Mangbangontay iti Siudadtayo,” kinunayo: “Idi 1900, ti Londres ti kakaisuna a siudad iti lubong nga addaan iti populasion a maysa a milion.” (Enero 8, 1994) Ngem iti sumaganad a ruaryo, kinunayo: “Idi ngalay ti maika-18 a siglo, nasuroken a sangamilion ti populasion [ti Edo, maawagan itan a Tokyo].” Aniat’ umiso?
S. T., Japan
Nalawag a kamali ti salaysay maipapan iti Londres. Naibasar dayta iti 1985 nga edision ti “Illustrated Atlas of the World” (Rand McNally and Company). Nupay kasta, nalawag nga umiso ti “The World Alamanac and Book of Facts 1993” iti panagkunana a sumagmamano a siudad ti nasuroken a sangamilion ti populasionda agingga idi 1900. Dispensarendakami iti pannakariroyo.—ED.
Ti Pananggun-od iti Kuarta Kas maysa nga agtutubo a managbasa iti Agriingkayo! talaga a nagutugotak kadagiti serye a “Ti Pananggun-od iti Kuarta—Sadinonto ti Pagtungpalanna?” (Marso 22, 1994) Patiek a maymaysa laeng ti kalat dagiti kapatadak: ti gumun-od iti kuarta. Nupay kasta, nadaydayaw nga amang ti panangipangag iti isursuro ni Jehova ngem ti panangdayaw kadagiti bambanag a saan nga agpaut.
K. R., Francia
Isports Pagyamanan iti padamag nga “Adda Kadi Dasigan ti Dios iti Isports?” (Pebrero 8, 1994) Nagbiddutak iti panangikararagko a mangabakak iti tinnarayan; inkararagko met a maabak dagiti kasalisalko. Ammok itan nga awan a pulos ti pakainaigan ti pagayatan ni Jehova iti isports. Idedikarkon ti biagko ken Jehova, ket nalaglag-an ti riknak a makaammo nga isut’ talaga a dumdumngeg kadagiti kararagko.
J. T., Estados Unidos