Manipud Managbasatayo
Napeggad a Panagmaneho Ti panangbasak iti padamag a “Nabannog Bayat nga Agmanmaneho?” (“Panangmatmat iti Lubong”, Pebrero 22, 1994) ipalagipna ti napalabas idi maysaak pay laeng a tsuper ti lorry (trak) ag-20 tawenen ti napalabas. Agaw-awidak idin kalpasan ti agmalmalem a panagmanehok idi makaridepak bayat nga agmanmanehoak. Kellaat a nariingak babaen ti napigsa a pannakaidungpar, ket anian a danagko ta addaak gayamen iti igid ti kalsada. Nadungparko ti sementado nga inaladan, ngem awan met ketdi ti kotse wenno magmagna sadiay. Diak met ketdi natiliw, ngem daydit’ leksion a diakto pulos malipatan. Nakapatayak koman gapu laeng ta diak nagpreno idi kasapulan dayta. Ti maibalakadko? Basaenyo dayta a padamag iti Agriingkayo!, ket ipangagyo ti balakadna!
M. Y., Inglaterra
Nalukmeg Kayatko ti agyaman unay iti artikulo ti “Agimtuod Dagiti Agtutubo . . .” nga Abril 22, 1994, nga “Apay a Nalukmegak Unay?” Agtawenak iti 13 ket kanayon nga ibilangko ti bagik a nalukmeg, nupay ipamatmat kaniak dagiti pagtimbangan a kalalainganna laeng ti kadagsenko. Gapu iti kababalinko, napukawko amin a panagtalekko iti bagik ket agsagsagabaak iti panagleddaang. Naminsan, kinayatko payen ti matay. Kasla agbagtitak, ngem kasdit’ nariknak. Gapu ken Jehova ken iti artikulo, nasaysayaaten ti panangparukmak iti panagleddaang.
C. S., Alemania
Agtutubo a Pasiente ti Kanser Apaman a nabasak ti artikulo a “No Narigat ti Panagbiag,” nga insalaysay ni Kathy Roberson talaga a nagutugot ti riknak. (Agosto 22, 1994) Masapul nga agsuratak ken yebkas ti napalaus a panagyamanko iti kasta a nagsayaat nga artikulo. Agtawenak iti 14 ket napadasak ti naidadanes idiay eskuelaan gapu ta maysaak a Saksi ni Jehova. Ti kasasaadko ket saan a makakarit a kas iti kapadasan ni Kathy Roberson, ngem makaparegta ti pannakakitak no kasano a pinabileg ni Jehova iti unos ti pannakasuotna.
C. G., Estados Unidos
Anian a nagsayaat nga artikulo! Nagsakitak met iti grabe idi agtawenak iti siam ket idi agangay, adu a bulan a naidalitak idiay ospital. Nupay kasta, nakaungarak met laeng apaman a panagseserreken iti high school. Ania ketdin a rigat ti sinaranget ni Kathy Roberson iti agkarasubli a panagsakitna. Ti kababalin ken bilegna ti nakatulong kaniak a maaddaan iti ad-adda a positibo a kasasaad ti panunot.
D. V., Estados Unidos
Panagpasuso Tallo la a bulan ket ipasngaykonton ti maikadua nga anakmi. Isu nga idi naawatko ti kopiak ti Agosto 22, 1994 a ruar ti Agriingkayo! ken linukatak ti artikulo a “Dagiti Napateg a Kinapudno Maipapan iti Panagpasuso,” napalalot’ ragsakko. Talaga a makabang-ar a mabasa ti maysa nga artikulo a mangted pammadayaw ken panangitan-ok iti Namunganayan ti biag. Diak maawatan no apay nga addada pay laeng mangilibak iti kaadda ti masirib ken naayat a Namarsua no usigen ti maysa no kasano a ti maysa nga ina ket sinanam-ay a nakabalan a mangtaraon iti maladagana.
L. K., Estados Unidos
Siguradok nga adu ti maawatyonto a surat ti panagyaman gapu iti daytoy nga artikulo. No lagipek ti napalabas, maanagko nga anian a bendision ken praktikal a pili ti panangpasusok iti amin a tallo nga annakmi. Ammok a daytoy nga artikulo ti mangparegtanto kadagiti inna ken asidegen nga agbalin nga inna.
C. S., Estados Unidos
Epektibo a Gapuanan-Arte Naragsakanak idi nakitak ti pannakailadawan ti panagungar iti Hunio 8, 1994 a ruar. Ad-adda a napabileg ti panangapresiarko iti nakaskasdaaw a namnama ti panagungar. Talaga nga awan sasao a makayebkas iti rag-ok inton makitakto manen ti adiek a babai iti masanguanan a Paraiso.
M. U., Japan
Ayat iti Kuarta Agyamanak iti artikulo nga “Ayat iti Kuarta—Ti Ramut ti Adu a Kinadakes.” (Marso 22, 1994) Iti pagiliak, nasaknap ti panagsamsam, panagtakaw, ken pannakaraut ti publiko—tapno makagun-od iti kuarta. Naintiempuan ken maitutop ngarud daytoy a magasin, ket naragsakanak a nangipaima iti daytoy a ruar iti sabsabali. Kinapudnona, dagitoy ti nagiinnagawan pay ti dadduma a managlako iti tinapay idi kurang ti awitko a kopia!
A. F. S., Makinlaud nga Africa