Inimpluensiaanna ti Adu a Biag

IDI Nobiembre 19, 1994, pimmusay ni Kathy Roberson idi agtawen ti 26. Simamatalek a tinabunuanna dagiti Nakristianuan a gimong agingga iti mismo a lawas ti ipapatayna. Naisalaysay ti pannakidangadangna iti kanser manipud idi agtawen iti siam iti Agriingkayo! nga Agosto 22, 1994, iti sidong ti paulo a “No Narigat ti Panagbiag.” Kalpasan ti panangbasada iti artikulo, nagsurat ti adu manipud iti aglikmut ti lubong ken inladawanda no kasano nga inimpluensiaan unay ida ti nabileg nga ulidan ni Kathy.

Naparegta Dagiti Agtutubo nga Agserbi iti Dios

Insurat ni Loida manipud España: “Agtawenak iti 16, ket nagsangitak idi nabasak ti kapadasan ken panagibtur ni Kathy. Kabutengko idi ti matay, ngem gapu itoy nga artikulo, naawatak a kas iti kinunana, ‘no ania ti talaga a napateg, saan a no agbiag wenno mataytayo ita, no di ket no magun-odantay met laeng ti bendision ni Jehova a Dios, Daydiay makaipaay kadatayo iti agnanayon a biag.’”

Insurat ni Mari, a taga Japan: “Agsipud ta gistay agkataebkami ken ni Kathy ken nabautisaran iti isu met la nga aldaw, ti panangbasak iti kapadasanna ket kasla panangbasa iti makaparegta a surat manipud iti nadekket a gayyem. Ti pananginanamana a ti pakasaritaanna ti mangtignay iti adu nga usaren ti salun-atda, saan nga iti barengbareng a raragpaten, no di ket iti nainsiriban a panagserbi ken Jehova ti nangparegta iti pusok, bayat nga asidegen a mangrugiak iti kinaregular payunir [amin-tiempo a ministerio].”

Umasping ti insurat ni Noemi a taga Italia, a nagkuna a ti tarigagay ni Kathy kadagiti agtutubo nga usarenda ti salun-atda, saan nga iti barengbareng a raragpaten, no di ket iti nainsiriban a panagserbi ken Jehova “ti mangparegtanto iti rinibu nga agtutubo, agraman kaniak.” Innayon ni Noemi: “Il-iliwek ti pannakakitakto kenkuana idiay baro a lubong inton lumabasen amin dagitoy. Apaman a makaturposak iti high school, mangrugiakton nga agpayunir.”

“Agtawenak iti 18,” insurat ni Rachelle a taga Florida, E.U.A., “ket nabayag metten a pampanunotek ti agpayunir. Bayat a binasak ti artikulo a ‘No Narigat ti Panagbiag,’ nasarakak a dakkel a pammaregta a makita ti maysa nga agtutubo a kas kaniak nga agibtur iti kasta a pakarigatan. Inabbukay ni Kathy ti riknak a mangusar iti salun-atko, a kas kinunana, ‘saan nga iti barengbareng a raragpaten, no di ket iti nainsiriban a panagserbi ken Jehova.’”

Insurat ti dadduma a misionero manipud iti isla ti Chuuk, idiay Micronesia: “Napanglaw iti material dagiti payunirmi ditoy. Nupay kasta, ti kapadasan ni Sister Roberson ti timmulong kadakuada a mangapresiar iti adda kadakuada. Naamirisda a nupay napanglawda iti material nabendisionanda met iti nakaradkad a pammagi a makatulong iti panagserbida ken Jehova iti amin-tiempo. Daytat’ nagsayaat a palagip kadakuada nga agyaman iti adda kadakuada ket usaren ti pigsada iti panagserbi ken Jehova.”

Maysa a grupo dagiti 16 nga estudiante a timmabuno iti eskuelaan dagiti payunir idiay Francia ti natignay a nangipatulod iti retrato dagiti lirio ken ni Kathy buyogen ti pammaregta: “Dikamto malipatan ti pammaregtam nga usarenmi ti panawenmi agpaay iti naindaklan a Namarsuatayo.”

Insurat ti sabali pay nga agtutubo a taga Francia: “Kas agtutubo ken kangrunaan a puntiria ni Satanas, mariknami no dadduma a nagrigat ti agtalinaed a nasungdo ken ni Jehova. Kaskasdi, no makabasakami iti kasta a nagsayaat ken makaparegta a pakasaritaan, mapabaro ti pigsa ken regtami, a maammuan a ti dadduma nga agtutubo, kas ken ni Kathy, ti mangsalsalimetmet iti kinatarnawda nupay agsagsagabada. Anian a nagsayaat a paguadan!”

“Nganngani agkasadarta ken nakasalsalun-atak,” insurat ni Nadine manipud Ohio, E.U.A. “Adu a daras a palubosak ti babassit a bambanag a mangsinga iti panagserbik ken Jehova. Ti panangbasak iti pakasaritaam ti nangtignay kaniak a mangusig a naimbag iti biagko, ket naamirisko nga anian a nagadu a napapateg a tiempo ti sinayangko. Nagbalinka nga inspirasionko.”

Kinuna ti maysa a balasitang a taga Brazil: “Direkta nga inimpluensiaannak ken pinarayrayna ti tarigagayko nga agserbi nga ad-adda iti Diostayo.”

Insurat ti maysa nga agtutubo a taga Canada: “Agtawenak iti 15. Dua a tawenen ti napalabas, naammuak nga agsagsagabaak iti autoimmune hepatitis. Gapu iti kapadasan ni Kathy Roberson, naamirisko nga agpapan iti kasasaad ti salun-atko, makapagserbiak met ken ni Jehova a simamatalek bayat nga adda pay tiempo ket rumbeng a siaanus nga urayek ti inkari ti Dios a baro a sistema agpaay iti naan-anay nga iyiimbagko.”

Insurat ni Jennette a taga New Jersey, E.U.A.: “Amin dagiti linasatna a tuben ken ti pammati nga impakitana ti tumulong kadakami amin tapno ikeddeng nga itultuloymi nga ikagumaan a paaduen ti panagserbimi ken Jehova agpapan pay iti aniaman a rumsua a pakarigatanmi. Planok nga usaren ti kapadasanna iti dadduma nga iyad-adalak iti Biblia tapno matignayda a mangikeddeng iti kalat a panagpayunir apaman a makaturposda iti eskuelaan.”

Naparegta Met Dagiti Aduanen iti Tawen

Insurat ti maysa a babai a taga California, E.U.A.: “Talaga a dimo inkankano amin a babassit a problema iti biagtayo ket insurom no ania ti kangrunaan, kapatgan iti biag​—ti relasiontayo ken Jehova.” Innayonna: “Nupay baketakon, natignayak ken naparegtaak iti kapadasam ken iti panangmatmatmo. Timmulong dayta tapno usigek manen dagiti ipangpangrunak.”

Sabali pay a surat manipud California ti nagkuna: “Ti napasaram ket maysa a dakkel a suot kas iti aniaman a sinagaba dagiti kakabsattayo a babbai ken lallaki idiay Alemania wenno Malawi wenno iti aniaman a sabali pay a lugar a nabasakon. Agtawenakon iti 68, isu nga adun a kapadasan ti nakitak, nangngegak, ken nabasak. Ti kapadasam ket bendisionto agpadpada kadagiti agtutubo ken lallakayen.”

Bigbigen ti maysa a babai a taga South Carolina, E.U.A.: “Baketakon. Dandani 70 ti tawenkon.” Insuratna kas panangapresiar: “Maysaka a [kas iti matalek nga adipen ni Jehova a ni] Job. Manginanamaak nga isuamin nga agtutubo ken lallakayen ti mangtuladto iti panagibturmo.”

Kinuna ti sabali pay a surat: “Ti pammati ken determinasion ni Kathy ti nangimpluensia kaniak. Nganngani 57 ti tawenkon, ket maysa kadagiti kalatko isut’ panagserbik ken Jehova iti ad-adu a panawen inton agretiroakon, ngem itay nabiit ket na-diagnose nga addaanak iti kanser. Anian a babawik ta idi ub-ubing ken nasalsalun-atak, bassit laeng ti naaramidak agpaay ken Jehova! Awan kadatayo ti makaipakpakauna iti tiempo inton ipaidam kadatayo ti grabe a sakit dayta a pribilehio.”

Insurat ti maysa a Kristiano a panglakayen: “Ikabilkonto daytoy nga artikulo iti maysa nga espesial a salansan a basaek inton mapasamak ti maysa a banag a di mapakpakadaan a mangsuot iti pammatik. Ikabilkonto pay daytoy nga artikulo iti salansan nga usarek iti panagipastor tapno usarek a pammaregta kadagiti ipatpateg a gagayyem nga agsagsagaba kadagiti pakarigatan bayat nga umad-adani ti panungpalan daytoy a sistema.”

Kinapudnona, mapabilegtayo iti pammati ken tured ti isuamin a kameng ti sangalubongan a panagkakabsattayo. (1 Pedro 5:9) Segseggaantay amin, kas iti sineggaan ni Kathy, ti pannakatungpal ti kari ti Biblia a panawen nga “awanton ni patay.” (Apocalipsis 21:3, 4) Anian nga engrande a panawen dayta inton “ti agtaeng dinanton kunaen: ‘Masakitak.’”​—Isaias 33:24.

[Ladawan iti panid 20]

Ni Kathy Roberson