Report Dagiti Manangiwaragawag iti Pagarian

Ti Dios ti Mangpadpadakkel Idiay Alaska

ITI sirok ti nayarpaw a niebe ken yelo, agur-uray ti bassit a bukel iti gundaway a rumusing ken dumakkel. Iti las-ud ti tallo nga ababa a bulan ti kalgaw iti Alaska, ti bukel ti repolio a 3 milimetro ti diametrona mabalin nga agtubo iti agarup 40 kilo! Wen, daytoy a daga nga impagarup idi ti adu a langalang, nayelo nga awan serbina a daga mabalin a mangpataud iti nawadwad a bunga.

Nangnangruna a pudno daytoy iti naespirituan a tay-ak iti Alaska. Sadiay, iti daga ti napaut a lam-ek, agtultuloy dagiti Saksi ni Jehova nga agmulmula iti bukel ti Pagarian. Kas iti sabsabali a paset ti daga, pagtubuen ti Dios ti bukel kadagiti nadam-eg a puso.​—1 Corinto 3:6, 7.

● Kabayatan nga adda iti school bus, napaliiw ti agtutubo a Saksi nga agnagan Vanessa ti padana nga estudiante, ni Ann, a kanayon nga agmaymaysa iti tugawna. Malmalday ti langa ni Ann, gapuna inawis ni Vanessa ni Ann a makikatugaw kenkuana. Di pakasdaawan a naliday ni Ann! Nabiit pay a natay ni nanangna gapu iti atake ti puso, ken di nagbayag kalpasanna, pimmusay ni tatangna gapu iti kanser. Dayta ti gapuna a makipagnanaed ni Ann kadagiti kabagianna idiay Alaska.

Dimmagas ni Vanessa iti pagtaengan ti baro a gayyemna kabayatan nga adda iti tay-ak ti serbisio iti maysa a Sabado sana imbatian iti broshur a Pudno Aya a Maseknan ti Dios Kadatayo? Iti simmaganad a Lunes iti eskuelaan, binirok ni Ann ti agtutubo a Saksi. Adu ti salsaludsod ni Ann mainaig iti Biblia, a nabaelan a sinungbatan ni Vanessa. “Sadino ti paggigimonganyo?” inimtuodna. Iti dayta a rabii timmabuno ni Ann iti damo a gundaway iti gimong idiay Kingdom Hall.

Di nagbayag, nakasarak daytoy 17 ti tawenna nga ulila iti adu nga ‘amma’ ken ‘inna,’ kas inkari ni Jesus. (Mateo 19:29) Ket anian a makaparagsak nga okasion a makita ni naragsak ken agis-isem nga Ann a nangisimbolo iti dedikasionna ken Jehova babaen ti pannakabautisarna iti danum iti “Dagiti Mensahero ti Nadiosan a Talna” a Kombension Distrito!

● Kadagiti nasulinek a lugar iti nalawa a rehion ti Arctic ti Alaska​—a ginasut a kilometro a langalang ti kaaddayo dagiti purok​—nausar ti duat’-makinana nga eroplano ti Watch Tower Society iti panangimula iti bukel ti Pagarian iti nasurok a 150 a komunidad. Ngem ti naespirituan nga irarang-ay babaen ti regular a panagadal iti Biblia ket agpannuray iti panagsurat. Tangay karit para iti adu ti panagsinnurat, kasapulan nga agbalin a managpartuat ti mannursuro iti Biblia tapno mapagtalinaed ti interes ti estudiante. Kasano a maaramid daytoy?

Narang-ay ti panangyadal ni Kathy iti Biblia ken ni Edna, nupay nasurok nga 600 kilometro ti nagbaetan ti pagnanaedanda! Imbes a basta kopiaenna laeng dagiti saludsod iti libro a maadal, nangaramid ni Kathy iti naisina a papel a nakaisuratan dagiti saludsod sa nangipaay iti pangisuratan kadagiti sungbat. Kalpasan a masungbatan ni Edna dagiti saludsod iti papel, agsubalit ni Kathy sa mangnayon kadagiti komento a mangilawlawag iti punto no kasapulan. Kuna ni Kathy: “Ikudik ti rabii ti Mierkoles maipaay iti ‘panagadalmi,’ ket inkagumaak a suroten dayta nga urnos a kas ti ar-aramidek iti dadduma pay nga eskediul iti panagadal iti Biblia. Patulodak met ni Edna iti naadresanen, seliado a sobre. Tangay alaenna ti dua a lawas ti panagikoreo, kasla nakabambannayat ti panagadalmi babaen ti surat.”

Iladawanyo ti ragsak da Kathy ken Edna idi nagkitada a rupanrupa iti kombension distrito idiay Anchorage kalpasan ti sangapulo a bulan a panagadalda babaen ti surat! Naragsakan met dagiti Saksi ta adda a timmabuno dagiti estudiante ti Biblia ken sabsabali pay nga interesado a naggapu iti nadumaduma a naiputputong a purok iti Alaska.

Nupay ti irarang-ay ket agparang a nabannayat no dadduma, adda dagiti “parusing” a sipapartak nga agrusing no maisarangda iti lawag ti kinapudno. Iti promedio, nasurok a sangagasut a baro a managdaydayaw ken Jehova ti mababautisaran kada tawen idiay Alaska! Maikunatayo a “Pagyamanan, Jehova,” iti panangpadakkelmo!