Pakasaritaan ti Biag

Sibabaknang a Nabendisionankami Gapu Kadagiti Babassit a Panagsakripisio

KAS INSALAYSAY DA GEORGE KEN ANN ALJIAN

Dimi pulos impagarup ken ni baketko a mapagsinnukatmi ti sao a “mannursuro” iti sao a “marabutit.” Dimi pulos napanunot nga iti tawenmi a nasurok nga 60, agadalkami kadagiti di pamiliar nga alpabeto tapno makasaomi dagiti tattao manipud iti Adayo a Daya. Ngem kasta a talaga ti kapadasanmi idi arinunos ti dekada 1980. Imutektekanyo koma no kasano a sibabaknang a nabendisionankami gapu kadagiti babassit a panagsakripisiomi kadagiti naglabas a tawtawen.

ARMENIANO ti nagtaudak a pamilia ken miembro ti Armeniano a Simbaan. Maysa a Romano Katoliko ni Ann. Inkompromisomi dagiti narelihiosuan a patpatienmi idi nagkasarkami idi 1950. Agtawenak iti 27, ken 24 ni Ann. Nagnaedkami iti maysa nga apartment iti ngatuen ti puesto ti dry cleaning a negosiok idiay Jersey City, New Jersey, E.U.A. Agarup uppat a tawen idin a kasta ti negosiok.

Idi 1955, maysa a napintas a balay, nga addaan iti tallo a pagturogan a siled, ti ginatangmi idiay Middletown, New Jersey. Dayta a pagtaengan ket agarup 60 a kilometro ti kaadayona manipud iti negosiok, a pagtartrabahuak iti innem nga aldaw kada lawas. Rabii unayen kada agawidak. Sadak la makasao dagiti Saksi ni Jehova no mapanda iti puestok ket mangipaimada iti naibatay-Biblia a literatura. Sigagagar a binasak dagiti literatura. Nupay diak unay masango ti agbasa gapu iti negosiok, napatanorko ti nauneg a panagraem iti Biblia.

Di nagbayag, naammuak a mangngegan iti WBBR, ti estasion ti radio a kukua ti Watchtower, dagiti naibatay-Biblia a palawag bayat ti oras a panagmanehok a mapan ken aggapu iti negosiok. Inimdengak dagitoy a palawag, ket rimmayray ti interesko agingga a kiniddawko a sarungkarandak dagiti Saksi. Idi Nobiembre 1957, simmarungkar ni George Blanton iti pagtaengak ket rinugiannak nga inyadalan iti Biblia.

Naikaykaysa ti Pamiliami iti Nasin-aw a Panagdayaw

Ania ti reaksion ni Ann iti panagadalko iti Biblia? Imutektekanyo ti salaysayna.

“Idi damo, nakaro ti ibubusorko. Disturbuek ti panagadal ni George iti Biblia isu nga inyakarna ti panagadalna iti sabali a lugar, ket walo a bulan a kasta ti inaramidna. Bayat dayta a tiempo, inrugi ni George ti dinomingo a pannakigimongna iti Kingdom Hall. Ammok a serioso iti panagadalna iti Biblia agsipud ta dayta ti kakaisuna nga aldaw a panaginanana iti trabaho. Kaskasdi, ad-adda ketdi a simmayaat kas asawa ken ama, isu a nangrugi nga agbaliw ti kababalinko. Kinapudnona, no dadduma, bayat a pumpunasak ti lamisaan, sililimed a basaek ti Agriingkayo! a kanayon nga ibati sadiay ni George. No maminsan, ipangngeg ni George ti panangbasana kadagiti artikulo ti Agriingkayo! nga awan ti direkta a pakainaiganna iti doktrina ngem kanayon a mangitampok iti Namarsua.

“Maysa a rabii, bayat ti panagadal da George ken Kabsat Blanton iti sabali a lugar, binasak ti maysa a publikasion a naiparabaw iti lamisaan a kaabay ti katrek. Ti agtawen iti dua nga anakmi, a ni George, ti nangikabil iti dayta. Mainaig dayta iti namnama dagiti natay. Nupay nabannogak, binasak dayta gapu ta nabiit pay a natay ni apongko a baket a pakaigapuan ti nakaro a ladingitko. Dagus a binasak ken natarusak ti kinapudno iti Biblia a dagiti natay saanda nga agsagsagaba iti maysa a lugar ken mapagungardanto. Bimmangonak ket intugawak a binasa ken inugedan a sigagagar dagiti punto a kayatko nga ipakita ken ni George inton sumangpet kalpasan ti panagadalna iti Biblia.

“Naklaat ni lakayko iti panagbaliw ti kababalinko. Idi rimmuar ni George iti pagtaengan, bumusbusorak, ngem idi agsubli, nakitana ti ragsakko gapu kadagiti naisangsangayan a kinapudno iti Biblia a naammuak! Nagsaritakami maipapan iti Biblia agingga iti parbangon. Inlawlawag ni George ti panggep ti Dios maipapan iti daga. Iti dayta met laeng a rabii, kiniddawko kenkuana nga iti balay nga agadal tapno mabalinko ti makiraman.

“Insingasing ni Kabsat Blanton a makiraman dagiti annakmi iti panagadal. Impapanmi nga ubbing pay unay dagiti dua nga annakmi, ta agtawenda laeng iti dua ken uppat. Ngem impakita kadakami ni Kabsat Blanton ti Deuteronomio 31:12, a mangibagbaga: ‘Ummongem dagiti umili, ti lallaki ken ti babbai ken dagidiay ubbing . . . , tapno makapagimdengda ken tapno makasursuroda.’ Inapresiarmi dayta a panangiwanwan ken inyurnosmi pay ketdi nga agkomento dagiti ubbing bayat ti panagadalmi iti Biblia. Sangsangkamaysa nga isaganami dagiti komentomi, ngem dimi pulos indiktar no ania ti sawenda. Ammomi a nakatulong daytoy kadagiti annakmi a mangipapuso iti kinapudno. Diminto pulos malipatan ti panangiwanwan kadakami ni Kabsat Blanton tapno rumang-ray ti espiritualidad ti pamiliami.”

Dagiti Karit nga Agkasapulan iti Panagsakripisio

Adu a baro a karit ti sinangomi idi sangsangkamaysa a nagadalkami iti Biblia. Gapu ta adayo unay ti lugar ti negosiok, masansan nga alas nueben iti rabii no agawidak. Gapu iti daytoy, diak makatabuno kadagiti gimong iti lawlawasna, nupay makagimongak iti Domingo. Matabunuan idi ni Ann ti amin a gimong ken napartak ti panagrang-ayna. Tinarigagayak met a tabunuan dagiti amin a gimong ken mangikondukta iti nabunga a panagadal ti pamilia. Ammok a kasapulan nga agsakripisioak. Inkeddengko ngarud a kissayan ti oras a panagnegosiok, uray kaipapananna dayta a bumassit ti kostumerko.

Nagsayaat ti imbungana dayta. Impategmi ti panagadal ti pamilia a kas kapateg dagiti lima a linawas a gimong iti Kingdom Hall. Ibilangmi dayta a kas maikanem a gimongmi. Gapuna, adda masinunuo nga aldaw ken oras nga angayenmi dayta​—Mierkoles ti kada lawas iti alas otso ti rabii. No dadduma kalpasan ti pangrabii, no malmalpasen ti panaginnawmi, adda mangibaga, “Dandanin ti ‘gimong’!” Irugi ni Ann ti panagadal no maladawak, ket sublatek ti panangidaulo apaman a sumangpetak.

Ti sabali pay a nangpabileg ken namagkaykaysa kadakami kas pamilia isu ti urnosmi iti agsapa a panangbasa a sangsangkamaysa iti inaldaw a teksto. Ngem adda parikut ti panangyeskediul iti dayta. Saan nga agpapada ti oras a panagriing ti tunggal maysa. Nagsasaritaanmi daytoy ket inkeddengmi nga aggigiddankami nga agriing, mammigatkami iti 6:30 ti agsapa, ket sangsangkamaysa nga usigenmi ti inaldaw a teksto. Nagimbaganmi unay daytoy nga urnos. Idi dimmakkel dagiti annakmi, pinilida ti agserbi iti Bethel. Mariknami a nakatulong iti espiritualidadda daytoy nga inaldaw a diskusion.

Dagiti Pribilehio Kalpasan ti Bautismo Agkasapulan iti Ad-adda a Panagsakripisio

Nabautisaranak idi 1962, ket kalpasan ti 21 a tawen a panangasikasok iti negosiok, inlakok dayta sa nanggedak iti asideg tapno ad-adda a makapagserbikami ken ni Jehova a sangsangkamaysa. Naaddaankami iti adu a gunggona gapu iti dayta. Inkeddengmi a sumrekkami iti amin-tiempo a ministerio. Nangrugi dayta iti umuna a paset ti dekada 1970, idi a ti inauna nga anakmi, a ni Edward, simrek iti amin-tiempo a ministerio, wenno regular pioneer, apaman a nagturpos iti haiskul. Di nagbayag kalpasanna, nagpayunir met ti anakmi a ni George, ken simmaruno ni Ann idi agangay. Naparegtaak unay gapu kadakuada a tallo, bayat a salaysayenda dagiti kapadasanda iti serbisio iti tay-ak. Sangapamiliaan a nagsasaritaanmi no kasanokami nga agbiag a simple tapno makapagpayunirkami amin. Inkeddengmi nga ilako ti balaymi. Nagnaedkami iti dayta a balay iti 18 a tawen ken dita a pinadakkelmi ti pamiliami. Nakapatpateg kadakami dayta a pagtaengan, ngem binendisionan ni Jehova ti pangngeddengmi a mangilako iti dayta.

Naayaban ni Edward nga agserbi iti Bethel idi 1972, ken ni George idi 1974. Nupay mailiwkami kadakuada, saanmi a pinampanunot a nasaysayaat koma no kaarrubami ida, a nangasawa ken naaddaanda iti annak. Imbes ketdi, maragsakankami ta dagiti annakmi ket agserserbida ken ni Jehova iti Bethel.a Umanamongkami iti sasao ti Proverbio 23:15: “Anakko, no ti pusom nagbalin a masirib, ti pusok agrag-onto, siak a mismo.”

Nagserbikami Kas Special Pioneer

Intultuloymi ti nagpayunir bayat ti kaadda dagiti annakmi iti Bethel. Kalpasanna, maysa nga aldaw idi 1975, nakaawatkami iti surat a mangaw-awis kadakami nga agserbi kas special pioneer iti di mawanwanas a teritoria idiay Clinton County, Illinois. Anian a sorpresa dayta! Kaipapanan daytoy a pumanawkami iti New Jersey, nga asideg kadagiti annakmi iti New York ken lugar nga ayan dagiti gagayyem ken kakabagianmi. Ngem minatmatanmi nga annongen dayta manipud ken ni Jehova isu a nagsakripisiokami ket nangyeg dayta kadagiti baro a bendision.

Kalpasan ti sumagmamano a bulan a panangasabami iti di madandanon a teritoria, nangrugikami nga aggigimong iti maysa a publiko a pasdek idiay Carlyle, Illinois. Ngem tinarigagayanmi ti maaddaan iti bukodmi a paggigimongan. Nangabangkami iti bassit a balay a nakita ti maysa a kabsat ken ti baketna. Interamente a dinalusanmi dayta ket inaramidmi kas bassit a paggigimongan. Siraragsak a malagipmi ti maysa a kabalio a masmasdaaw kadakami. Masansan a tumaliaw iti tawa tapno kitaenna no ania ti mapaspasamak iti uneg bayat ti gimong!

Idi agangay, nabuangay ti Kongregasion ti Carlyle, ket maragsakankami ta maysakami kadagiti timmulong. Nakipagtrabaho kadakami ti agkabannuag a payunir nga agassawa, da Steve ken Karil Thompson, nga immay met nagserbi iti dayta di mawanwanas a teritoria. Sumagmamano a tawen a nagtalinaed sadiay ti agassawa a Thompson. Kalpasanna, naayabanda a tumabuno iti Watchtower Bible School of Gilead sa naibaonda kas misionero idiay Makindaya nga Africa, a sadiay nagserbida kas agdaldaliasat a manangaywan.

Di nagbayag, kasapulanmi ti dakdakkel a paggimongan gapu ta umad-adu ti bilangmi. Naminsan pay a timmulong ti isu met laeng nga agassawa ket gimmatangda iti lote a nasaysayaat a pagibangonan iti Kingdom Hall. Anian a ragsakmi idi a kalpasan ti sumagmamano a tawen, naawiskami a dumar-ay iti pannakaidedikar ti kaibangbangon a Kingdom Hall idiay Carlyle! Naited kaniak ti pribilehio a mangipaay iti palawag ti dedikasion. Ti annongenmi sadiay ket maysa a naisangsangayan a kapadasan kadakami, maysa a bendision manipud ken ni Jehova.

Baro a Teritoria a Naipaannong Kadakami

Idi 1979, naibaonkami iti baro a teritoria, ti ili ti Harrison, New Jersey. Nagserbikami sadiay iti agarup 12 a tawen. Bayat dayta a tiempo, inyadalanmi iti Biblia ti maysa a Tsino a babai, ket nagresulta dayta iti adu a panangyadal iti Biblia kadagiti Tsino. Kabayatanna, naammuanmi a rinibu a Tsino nga estudiante ken pamilia ti agnanaed iti ili. Gapu iti dayta, naparegtakami nga agadal iti Tsino a lenguahe. Kasapulan nga inaldaw nga iwayaanmi ti panangadal iti dayta a lenguahe, ngem nagresulta dayta iti adu a naragsak a panagadal iti Biblia kadagiti Tsino iti dayta a lugar.

Bayat dagidi a tawen, naaddaankami iti adu a makapakatawa a kapadasan, nangruna no ikagumaanmi ti agsao iti Tsino. Naminsan, inyam-ammo ni Ann ti bagina kas maysa a “marabutit” ti Biblia imbes a maysa a “mannursuro” iti Biblia. Agkaasping unay dagita a sasao. Immisem ti bumalay ket kinunana: “Sumrekkayo. Awan pay nakasaok a marabutit iti Biblia.” Marigatankami pay idi nga agsao iti dayta a lenguahe.

Kalpasanna, naibaonkami iti sabali a lugar idiay New Jersey ket intultuloymi ti nangasaba iti lugar dagiti Tsino. Idi agangay, naawiskami nga umakar idiay Boston, Massachusetts, a sadiay agarup tallo a tawenen nga adda maysa a grupo dagiti Saksi a Tsino. Minatmatanmi a pribilehio ti pannakitinnulongmi iti daytoy a grupo iti naglabas a pito a tawen ken ti rag-o a makita nga agbalin daytoy a maysa a kongregasion idi Enero 1, 2003.

Dagiti Bendision nga Iyeg ti Kinamanagsakripisio

Iti Malakias 3:10, mabasatayo ti awis ni Jehova kadagiti adipenna nga iyegda dagiti daton ken sakripisioda tapno ibukbokna dagiti bendisionna agingga nga awanen ti kasapulan pay. Insardengmi ti negosio a paginteresak unay. Inlakomi ti balaymi, a nakapatpateg kadakami. Ken insakripisiomi ti dadduma pay a banag. Ngem no idilig kadagiti naawatmi a bendision, bassit ti pakaimudinganna dagitoy a panagsakripisio.

Talaga a nagdakkel a bendision ti imbukbok ni Jehova kadakami! Naaddaankami iti pannakapnek a makita dagiti annakmi nga itantandudoda ti kinapudno, ti rag-omi iti amin-tiempo a pannakipaset iti mangispal-biag a ministerio, ken nakitami ti panangipaay ni Jehova kadagiti kasapulanmi. Pudno a dagiti babassit a panagsakripisiomi nangyegda kadagiti nabaknang a bendision!

[Footnote]

[Ladawan iti panid 25]

Da Louise ken George Blanton a kaduada ni Ann, idi 1991

[Ladawan iti panid 26]

Ti Kingdom Hall idiay Carlyle, a naidedikar idi Hunio 4, 1983

[Ladawan iti panid 27]

Kaduami ti kabubuangay a Kongregasion a Tsino idiay Boston

[Ladawan iti panid 28]

Dakami kada Edward, Connie, George, ken Grace