Manipud Managbasatayo
Panagpakamatay Nagagaranak a nangbasa iti artikulo nga “Agimtuod Dagiti Agtutubo . . . Ti Kadi Panagpakamatay ti Sungbat?” (Abril 8, 1994) Agtawenakon iti 20 ken maysa a ministro iti amin a tiempo. Ngem nabiit pay a pinanggepko ti agpakamatay. Tinulongannak ni Jehova ken itultuloynak nga iwanwanwan. Idi, sumagmamano la nga aldaw ti napalabas, nga imbaga kaniak ti maysa kadagiti kadekketan a gayyemko a kayatna a ketlen ti biagna, nangbirokak iti praktikal a balakad a makatulong kenkuana iti pannakaupayna. Daytoy nga artikulo ti sungbat dagiti kararagko.
A. C., Italia
Itay la napan a lawas a napalalot’ tarigagayko nga agpakamatay. Nagpasigak iti maysa a Kristiano a panglakayen ken ni baketna ket natulongandak a mangiwaksi iti kasdi a karirikna. Ti adu nga artikuloyo maipapan iti panagleddaang ti nangispal-biag kaniak.
D. J., Estados Unidos
Kayatko la a yebkas ti napalaus a panagyamanko iti artikulo. Ad-adda a napabilegak ngem iti aniaman a napalabas nga artikulo a malagipko. Ammoyo ngamin, patiek iti sumagmamano a tawenen a napalabas a ti panagpakamatay ti kasayaatan—pamay-an a kasla mangrisut kadagiti din maibturan a kasasaad. Ngem babaen iti tulong ti nagannak ken gagayyem, naamirisko nga adda kasayaatan a rason ti amin tapno agbiag—kayat ni Jehova nga agbiagak.
M. V., Estados Unidos
Nabigbigko a daytoy nga artikulo ket nalaka a maawatan ken nagsayaat ti pannakaisuratna. Patiek a napateg unay daytoy nga alikamen a mangtulong iti asinoman nga agpangpanggep nga agpakamatay. Napikapik ti riknak iti amin a nadakamat a pagarigan.
L. S., Estados Unidos
Mannakilugan a Hippie Kayatko ti agyaman kadakayo iti artikulo maipapan ken Richard Fleet, “Nagbalin a Misionero Idiay Sud America ti Dati a Mannakilugan a Hippie.” (Marso 22, 1994) Kalpasan ti kasarmi iti nobiak, planomi ti umakar idiay Hungary tapno tumulong iti trabaho a panangasaba sadiay. Agingga ita pagkitakitak unay ti naan-anay a panagbalbaliw ti estilo ti panagbiag ken panangsursuro iti baro a pagsasao. Nalawag nga impakita ti artikulo a saan a dagiti personal a pakadanagan ti napateg no di ket dagiti tattao a makasabaanminto.
S. H., Alemania
Patiek a rumbeng a basaen daytoy ti amin a tattao nga awanan pay asawa tapno maamirisda koma a makapagserbida ken Jehova ken agbalin a naragsak nupay awananda iti asawa. Makaparagsak a mabasa no kasano a naan-anay nga inyaplikar ti maysa a baro ti Mateo 6:33 iti biagna. Sipud idi nangrugiak a maysa nga amin-tiempo a managebanghelio dua ket kagudua a tawenen ti napalabas, napadasak met ti rag-o a kas iti napadasan ni Richard Fleet.
D. M., Estados Unidos
Nagutugot unay ti riknak a makaammo nga adda lallaki a manangngaasi kadagiti ulila a babbarito. Agsolsoloak nga ina ti uppat a babbarito. Timmulong ti maysa a Kristiano a kabsat a lalaki iti maysa kadakuada, ket ita agsagsaganan dayta nga anakko iti asidegen a panagpabautisarna. Maapresiar unay no adda tumulong kadagiti ulila.
P. T., Estados Unidos
Chile Kabasbasak ti Mayo 8, 1994 a ruar ket tinagiragsakko a nangnangruna ti artikulo a “Chile—Naisangsangayan a Pagilian, Naisangsangayan a Kumbension.” Panagriknak ket nakikombensionak met. Nariknak pay met ti panagkitakitko nga agawid idi nagngudon ti programa.
K. K., Japan
Dagiti Compact Disc Pagyamanan unay iti artikuloyo a “Ti Compact Disc—Aniat’ Maipapan Amin iti Dayta?” (Abril 22, 1994) Inlawlawagna ti kurang a pannakaammok maipapan kadagitoy a disc. Kalpasan ti panangdengngegko iti compact disc ti gayyemko, nagsiddaawak iti kinasuperiorna ngem iti dadduma a pagpatokaran iti musika.
S. D., Nigeria