Manipud Managbasatayo

Soldado a Nagbalin a Kristiano Napnot’ lua dagiti matak idi binasak ti artikulo a “Nasanayak Idi a Pumatay, Ita Mangituktukonakon iti Mangispal-Biag a Mensahe.” (Setiembre 8, 1994) Maysa a taga Palestina a mangaw-awag iti maysa a Judio kas “kabsat”​—iti laeng organisasion ni Jehova a masarakan ti kasta a panagkaykaysa!

K. T. O., Malaysia

Ti Timbreyo Pagyamanan ti makapainteres nga artikulo a “Ti Timbreyo​—Ti Pirmayo.” (Mayo 22, 1994) Dakam ken ni lakayko ket mangyad-adal iti Biblia iti maysa a Budista a monghe manipud Taiwan. Isut’ nagkomento maipapan iti kinaumiso ti artikulo! Kalpasanna, sinuratanna ni nanangna idiay Taiwan ket kiniddawna a patulodannakami iti timbre a nakayukitan ti naganmi. Anian a ragsakmi!

K. J., Estados Unidos

Panagsikor Kabasbasak dagiti artikulo a “Makapasikor Kadi ti Biagyo? Mabaliwanyo Dayta!” (Enero 22, 1995), ket kayatko nga ibaga kadakayo no kasano a natulongannak. Diak pulos nga impagarup a masikoranak iti bagik, ngem diak unay a mapnek iti biagko maigapu iti isu la nga isu a rutina. Ti artikulo ti nangtignay kaniak a mangmatmat kadagiti bambanag iti intero a baro a lawag.

S. V., Estados Unidos

Dagiti Puro ti Canary Kalpasan ti panangbasak iti artikulo ti Nobiembre 22, 1994, a “Dagiti Puro ti Canary​—Makaay-ayo ti Panniempona, Makaguyugoy ti Buyana,” kayatko nga iyebkas ti panangapresiarko iti dayta ken kadagiti umasping nga artikulo iti Agriingkayo! Paunegenda ti pannakaammo ken panangapresiartayo iti nagpintas a dagatayo ken ti nadumaduma a parsua ni Jehova. Pagyamanan ti panangiramanyo kadakami kadagitoy a makapagagar a “panagpasiar.”

D. G., Estados Unidos

Dagiti Misionero Apresiarek unay dagiti ekselente a seryeyo a “Dagiti Misionero​—Ahente ti Lawag Wenno ti Sipnget?,” nangnangruna ti maikanem a paset, “Panangaramid iti Pudno nga Ad-adalan Itatta.” (Disiembre 22, 1994) Nagunggonaan a naimbag ti kongregasionmi iti pannakipagtrabaho iti agassawa a misionero a nasanay-Gilead. Ti nainsiriban a balakad ken kinaregtada ti nangimpluensia kaniak a pagbalinen ti amin-tiempo a ministerio kas karerak.

J. K., Botswana

Panagkedked iti Nazismo Naabbukay ti riknak iti artikulo a “Dikam Intandudo ti Gubat ni Hitler.” (Oktubre 22, 1994) Naglaon dayta iti retrato ti “Natan-ok a Deklarasion” ti innem nga Austriano nga obispo a nangitandudo iti Nazismo. Maysa kadagidiay nga obispo isu a mismo daydi nangkompirma kaniak idi 1928 idi maysaak pay a Jesuita nga estudiante. Katawaak ti kasta a “kompirmasion” a naggapu iti maysa a dina ammo no kasano ti agbalin a natibker iti Nakristianuan a pammati! Nagpatingga iti dayta a gubat ti pannakaikamengko iti Iglesia Katolika. Pinanawak met ti nakayanakak a pagilian. Nupay inkagumaak a liklikan ti gubat iti bukodko a pamay-an, awan idi ti turedko a kas kadagiti kameng ti pamilia Wohlfahrt. Malagipko pay laeng ti dua a Saksi ni Jehova a nagkedked a mangibaklay iti armas. Dagus a napapatayda. Dayawek dagiti kasta a tattao.

P. K., Chile

Agimtuod Dagiti Agtutubo Pagyamanan iti artikulo nga “Agimtuod Dagiti Agtutubo . . . Kasano a Mapasayaatko Dagiti Kawesko?” (Enero 22, 1995) Tinignaynak a mangorganisar iti napumpunnon a klosetko. Inaldaw a problemak no aniat’ isuotko, nupay nagadut’ kawesko. Ngem maigapu kadagiti makatulong a balakadyo, nalaklaka itan ti panangpilik iti isuotko.

T. B., Hawaii

Pagyamanan kadagiti ekselente a kapanunotan a linaon dagiti artikulo a “Dagiti Uso​—Aniat’ Pangallukoyda?” ken “Dagiti Uso​—Tuladek Kadi Ida?” (Nobiembre 22 ken Disiembre 8, 1994) Kas maysa a Kristiano a panglakayen, aminek a saan a kanayon a nalaka a liklikan ti panangipapilitko kadagiti estandartek iti sabsabali. Ngem dagiti kinunayo a kas iti “panangikabilangan iti rikrikna ken kababalin ti dadduma” ken “panangliklik kadagiti estilo ti kawes ken kababalin a mabalin nga ibilang ti dadduma a nalabes” talaga a gutugotenna dagiti tattao.

D. C̆., Croatia