Manipud Managbasatayo
Kaso iti Korte Diak maitantanen nga iyebkas ti panangapresiarko iti artikulo a “Sanguen Manen Dagiti Kristiano ti Korte Suprema ti Jerusalem.” (Nobiembre 8, 1994) Namin-anon a binasak dayta ket maragsakanak iti napasamak. Agsipud ta natibker ti takder ni Ariel Feldman agpaay iti kinalinteg, naipaay ti nakaskasdaaw a panangsaksi.
A. I. B., Brazil
Dagiti Bateria Bateria ti pagsapulak ket kayatko ti agyaman kadakayo iti paset ti “Panangmatmat iti Lubong” a “Dagiti Napeggad a Bateria.” (Agosto 22, 1994) Ngem adda kurang a maysa a napateg a detalye kadagiti instruksion iti panangpaandar babaen ti jumper nga inted ti magasin a Snow Country, nga isu ti nasken a maaramid a maudi a pannakaikonekta ti nangisit a kable.
P. R., Canada
Pagyamanan iti singasingyo maipapan ti kinatalged.—ED.
Mangliwliwa ti Agriingkayo! Binasak ti artikulo a “Dagiti Magasin a Makaipaay iti Praktikal a Pakaliwliwaan” (Enero 8, 1995), ket naballigiak met iti panangipaimak kadagiti daan a ruar ti Agriingkayo! Kaaduanna, agyaman dagiti tattao iti aniaman a tulong a maawatda agpaay kadagiti parikutda. Imbaga kaniak ti maysa a babai a ti barona ket addaan iti Attention Deficit Hyperactivity Disorder. Impaimak ti ruar a “Panangawat Kadagiti Naalikuteg nga Ubbing” (Nobiembre 22, 1994) kenkuana, ket isut’ nagkiddaw iti 30 pay a kopia tapno iranudna kadagiti gagayyemna!
D. Q., Estados Unidos
Kalpasan ti panangbasak iti artikulo a “Dagiti Magasin a Makaipaay iti Praktikal a Pakaliwliwaan,” nagsukimatak kadagiti daanen a magasinko tapno kitaek no adda sumagmamano a maitedko kadagiti propesional. Nagbanaganna, nasarungkarak ti maysa a day-care center, sumagmamano a puneraria, pagbaludan dagiti agtutubo, eskuelaan publiko, ken ti board of education ti distritomi. Dagus a naibus dagiti magasinko!
D. R., Estados Unidos
Kinawaywayas Pagyamanan iti artikulo a “Ti Panangmatmat ti Biblia: No ti Kinawaywayas Ket Maysa a Sagut.” (Pebrero 8, 1995) Iti lugar a pagnanaedak, maibilang a nagpateg ti pannakiasawa; durogandaka dagiti Kristiano a kakabsat a lallaki ken babbai a makiasawa. Pulos a diak napanunot ti makiasawa agingga idi agtawenakon iti 30. Nangrugin a nariknak a kasapulak ti maysa a kadua. Agyamanak ken ni Jehova iti panangipaayna iti daytoy nga artikulo iti tiempo a nariknak a gistay diakon makaibtur.
E. M. A., Estados Unidos
Dua a tawenen ti napalabas, nagbalinak a payunir, amin-tiempo a managebanghelio, ket bayat a limmabas dagiti tiempo, ad-adda a naamirisko no kasano a makagunggona ti agserbi ken ni Jehova nga “awan ti makasinga.” Inkeddengko nga iwayaan ti kinawaywayas—simmangpet ti artikulo iti umiso unay a tiempo.
G. V., Italia
Dagiti Uso Iti artikuloyo nga “Agimtuod Dagiti Agtutubo . . . Dagiti Uso—Tuladek Kadi Ida?” (Disiembre 8, 1994), nadakamatyo ti panagpatató. Nasdaawak ta saanyo a nadakamat ti bilin idiay Levitico 19:28: “Dikayto mangikabil iti marka ti tató iti bagbagiyo.”
L. D., Estados Unidos
Talaga a dagitoy a sasao ket mangted iti bassit a pannakaawat iti kapanunotan ti Dios iti daytoy a banag. Siempre, awanen dagiti Kristiano iti sidong ti Mosaiko a Linteg. (Colosas 2:14) Kaskasdi, nasaysayaat no laglagipen dagiti indibidual daytoy a teksto no ikeddengdanto ti aramidenda iti daytoy a banag. Dagiti naipadamag a peggad iti salun-at ken ti impresion ti sabsabali iti panagpatató isuda dagiti kanayonan a banag a nasken a tingitingen a naimbag ti maysa a Kristiano.—ED.
Innem a bulan ti napalabas, tinuladko ti uso ket nagbanaganna, nagpatatóak iti pingilko. Tunggal matmatak ti pingilko, malagipko daydi desisionko. Ti la pampanunotek isut’ mabalin a panagduadua itan dagiti sabsabali maipapan iti kinataok. Madanaganak di la ket ta makaitibkolak metten iti sabsabali iti kongregasion. Agpanunotakton a naimbag sakbay a tumuladak iti uso.
S. C., Estados Unidos