Mamakdaar Dagiti Sientista

“AGDINDINNUNGPAR ti tattao ken ti ekolohia ti aglawlaw. . . . Sumagmamano laengen a dekada ti nabati tapno pasardengen dagiti peggad [iti aglawlaw].”

Daytoy a pakdaar, nga impablaak ti UCS (Union of Concerned Scientists), ket naipablaak iti Annals, maysa a medikal a pagiwarnak ti Canada. No agtultuloy dagiti aramid ti tao a mamagpeggad iti biag, kuna ti report, dagitoy “mabalin a kasta unay ti panangbalbaliwda iti lubong ta dinanton kabaelan a sustentuan ti biag iti pamay-an a pagaammotayo.”

Dadduma kadagiti naganat a parikut a naibaga a masapul a tamingen isu ti iyiingpis ti ozone; pannakamulit ti danum; pannakakalbo dagiti kabakiran; ikakapuy ti kinabunga ti daga; ken ti pannakapukaw ti dadduma a kita ti biag, nga inton tawen 2100 mabalin nga iramanna ti kakatlo dagiti amin a kita ti nabiag itatta. “Ti panangdadaeltayo iti nakarikrikut a panagpannuray ti biag iti maysa ken maysa,” kuna ti UCS, “mabalin a rugianna dagiti nasaknap nga epekto, agraman ti pannakarbek dagiti biolohikal a sistema a saantay pay a maawatan a naan-anay ti kasasaad ti panagdakkelna.”

Dagiti pakaseknan ti UCS ket pinatalgedan ti nasurok a 1,600 a sientista iti sangalubongan, agraman ti 104 nga immawat iti premio Nobel. Sigun iti UCS, “dagitoy a senior a miembro ti sientipiko a komunidad iti lubong pakdaaranda ti amin a sangatauan a masapul a balbaliwantayo ti pamay-an iti panangaywantayo iti daga no kayattayo a liklikan ti nagdakkelan a pakarigatan ti tao.”

Umanamong ti Biblia a ti tao pudno a “daddadaelenna ti daga.” (Apocalipsis 11:18) Bigbigenna pay a masapul ti panagbalbaliw iti mangaywan ti lubong. (Jeremias 10:23; Daniel 2:44) Kinapudnona, ikari ti Biblia a mapasamak ti kasta a panagbalbaliw, saan a babaen ti panangikagumaan ti tao, no di ket babaen ti Pagarian ti Dios, ti nailangitan a gobierno nga insuro ni Jesus nga ikararag dagiti pasurotna.​—Salmo 145:16; Isaias 11:1-9; Mateo 6:9, 10.

[Picture Credit Line iti panid 31]

Retrato: Godo-Foto