Lugar a Pagimdengan ken Pagsursuruan a Sangsangkamaysa Dagiti Nagannak ken Annak
BABAEN TI KORESPONSAL TI AGRIINGKAYO! IDIAY JAPAN
“KAS maysa a kompania dagiti para dalus, rumbeng a mabainkami iti bagbagimi met laeng, ngem nadaldalus no dakayo a tattao ti mangdalus.” Idi napan a kalgaw daytoy ti imbaga ti lalaki a mangimatmaton iti kompania dagiti para dalus agpaay iti Fukuoka Dome Stadium, Japan, maipapan iti panagsagana nga inaramid dagiti Saksi ni Jehova agpaay iti “Nadiosan a Panangisuro” a Kombension Distrito. Nairaman met iti [pannakadalus] ti Tokyo Dome Stadium iti immun-una a tawen iti “Managawit iti Lawag” a Kombension Distrito dagiti Saksi ni Jehova a naangay sadiay, ket kasta unay ti pannakaallukoyna. Iti pagnguduan ti kombension, nadaldalus pay ti istadium ngem idi sakbay a naabangan dayta. Kinunana pay: “Naisangsangayan ti kababalin dagiti ubbing. Ti laeng makunak ket: ‘Daytat’ naisalsalumina!’”
Idi napan a tawen, naaramid ti “Nadiosan a Panangisuro” a Kombension Distrito idiay Siudad Takamatsu. Nagimtuod kadakuada ti maysa nga agkabannuag a lalaki nga agpalpaliiw kadagiti delegado ti kombension, “Kristianokayo kadi?” ket kalpasanna kinunana: “Adda met kombensionyo idi napan a tawen, saan kadi? Sadinot’ yan dagiti annakyo bayat ti kombension?” Idi simmungbat dagiti delegado: “Agdengdengngegda kadagiti palawag ket uk-ukagenda dagiti Bibliada a kadua dagiti dadakkelda,” kinuna ti lalaki: “Nasayaat dayta! Makitak dagiti kamkamengyo tunggal kalgaw ket kanayon a maallukoyak ta nakasingsingpet dagiti annakyo.” Kalpasanna napaliiwna a nupay adut’ mangmangngegna maipapan iti kurang a naballigi a komunikasion kadagiti nagannak ken annak, mailasinna kadagiti kababalin iti annak dagiti Saksi ni Jehova a ti relasion ti nagannak ken anak iti ummongda ket nagsayaatan.
Maysa a maestro ti elementaria, a timmabuno iti maysa a kombension distrito dagiti Saksi ni Jehova a naangay idiay Makuhari Messe idi napan a tawen, ti nasdaaw a makakita iti kababalin dagiti annak idiay pagkombensionan. Idiay eskuelaan, a sadiay rumang-ay koma ti panagadal babaen ti panagimdeng dagiti estudiante no agsao dagiti dadduma, nariknana a di pay kayat dagiti ubbing ti umimdeng. Nupay kasta, nakakita ti naiduma idiay kombension. “Agat-atension dagiti ubbing iti nawatiwat a tiempo. Ket saan la a dayta, iggemda dagiti lapisda ket agal-alada ti nota, a siuumiso ti panangisuratda kadagiti letra nupay masapul nga agsuratda a paglandaganda dagiti luppoda. Naiduma dagiti annak dagiti Saksi kadagiti dadduma nga ubbing, uray pay idiay eskuelaan, iti panagsasaoda ken panagimdengda ken iti panagkawkawesda ken panagay-ayusda.” Kalpasanna innayonna pay: “Pagarupek a maigapu dayta iti inaldaw a pannakasanayda, iti panangidayawda ken Jehova, ken iti panagtitinnulong ti pamiliada nga agkaykaysa.”
No kasano a sinurot dagiti Israelita ti nadibinuan a linteg a nagkuna: “Ummongemto dagiti tattao, dagiti lallaki ken babbai, ken dagiti ubbing . . . , tapno mangngeganda, ken masursuroda,” dagiti Saksi ni Jehova itatta, agpadpada nataengan ken agtutubo, lallaki ken babbai, aguummong ken umawatda iti isu met laeng a panangisuro. Ituloy pay ti kasuratan nga adda iti ngato, a nangipaay iti rason: “Ket agbutengda ken Jehova a Diosyo, ket tungpalenda nga aramiden amin dagiti sasao daytoy a linteg.”—Deuteronomio 31:12.