Dagiti Mina iti Daga—Sangalubongan a Pakadangran
RINIBO nga inosente a lallaki, babbai, ken ubbing iti nasurok nga 60 a pagilian ti mapawad, ken matay ti dadduma, iti binulan babaen kadagiti mina iti daga. Napattapatta a dagiti mina a nairanta a maibusor kadagiti agtartrabaho, pinapataydan wenno dinangrandan ti ad-adu a tattao ngem ti kemikal, biolohikal, ken nuklear a pannakigubat. Sigun iti agsirsirarak nga organisasion a Human Rights Watch, agarup 30,000 a tattao ti napawadan babaen kadagiti mina idiay laeng Cambodia.
Naimula dagitoy a babassit a dinamita iti daga bayat dagiti nadumaduma a gubat, ket kaaduan kadakuada ti saanen a naikkat. Napattapatta a mabalin nga agarup 100 milion kadakuada ti naimula pay laeng iti nasurok nga 60 a pagilian. Mabalin a bumtakda babaen laeng iti pannakabaddek ket nalatakda iti pannakigubat gapu ta saanda a nangina ken epektiboda. Ti maysa a kita aggatad laeng iti $3 (E.U.). Ti sabali, a mangipurruak iti 700 a landok a bola ken makapapatay iti kaadayo nga 40 metro, aggatad laeng iti $27. Kasta unay ti pannakausarda, kuna ti The New York Times, ta 48 a nasion ti agar-aramiden ken agilaklako iti 340 a nadumaduma a kita [a mina]. Ket ad-adu pay ti maimulmula iti inaldaw ngem ti pagbalbalinen dagiti agdaldalus iti mina a di bumtak.
Narigat ken adut’ magastos iti panangdalus kadagiti mina, yantangay adu a buyot ti di mangidulin iti mapa ti nakaimulaan dagiti mina; ket dagiti mina ad-addan a maar-aramidda iti kayo, plastik, ken dadduma a material a di mailasin dagiti pagilasin iti metal. Kinuna ti senador ti E.U. a ni Patrick Leahy, a nangibilin iti pannakaiparit ti panagilako kadagitoy nga armas iti sabali a pagilian: “Idiay Netherlands, matmatay pay laeng dagiti tattao babaen kadagiti mina dagiti Aleman idi Gubat Sangalubongan II. Panunotenyo laengen no kasano a dakdakes pay idiay Afghanistan, Cambodia, Angola, Bosnia ken amin a dadduma a pagilian a kasta unay ti nakaiwarasan dagiti mina.”
Ti laeng umay a baro a lubong ti Dios ti makarisut kadagita a parikut. Ikari ti Saona: ‘Pasardengen [ti Dios] dagiti gubgubat inggana iti ungto ti daga; rungrungduenna ti bai ti pana, ket gupdenna a maminpinsan ti gayang; puoranna dagiti luglugan [ti gubat] iti apuy.’—Salmo 46:9.