Panangmatmat iti Lubong
Napilitan nga Immatras ti Maysa a Kompania ti Tren
Idi impatungpal ti maysa a kadakkelan a kompania ti tren idiay Brazil ti kabbaro a programa a mangsanay kadagiti para wanawanna a mangusar iti paltog, nagproblema ti dua kadagiti empleadona gapu iti diktar ti konsiensiada. Kas Saksi ni Jehova a mangal-alagad iti pammilin ti Biblia a ‘pulos a din sursuruen ti makigubat,’ patienda unay a dakes ti panagpasanayda a mangusar kadagiti makapapatay nga igam. (Isaias 2:4) Dagus a naikkatda gapu iti inkeddengda nga “isusukir.” Nagkitakit pay ketdi ti kompania ti tren iti kiddawda nga agtalinaed iti dati a takemda ket idianda laengen ti programa a panagsanay ken ti kakuykuyogna a pannakaingato iti saad. Nupay kasta, kuna ti Konstitusion ti Brazil: “Di rumbeng a maraut ti wayawaya ti konsiensia ken panagdayaw, maipanamnama ti nawaya a pannakaalagad ti relihion, babaen iti linteg.” Natakuatan ti Regional Labor Court a nakabasol ti kompania ti tren iti panangikkatna kadagidi a lallaki nga awanan “legal a makagapu” ket naibilin iti kompania a bayadanna ida iti umdas a kompensasionda.
Sakit a Chagas ken ti Pannakailako iti Dara
Ti sakit a Chagas, a maigapu iti maysa a parasito ken makaituggod iti panagpaliado ti puso kalpasan ti tawtawen a kinainaktibona, ti mangim-impektar iti ag-18 milion a taga Latin America. Masansan a mayakar dayta babaen iti pannakayalison ti dara a di nasukimat a naimbag. Nabiit pay nga inlawlawag ti Bolivian Times: “Maysa kadagiti makagapu ti nalabit di pannakasukimat ti dara iti amin a kaso isu ti komersialismo a mapaspasamak iti sangalubongan. Ti pannakasukimat ken pannakaanalisar ti dara [tapno maammuan] ti aniaman a sakit kissayanna ti mapastrek a ganansia.” Idi Disiembre 24, 1993, kinuna ti El Diario ti La Paz: “Limapulo a porsiento kadagiti naaramid a panangyalison iti dara iti pagilian ti namulitan kadagiti sumaganad a sakit: Chagas’, malaria, hepatitis, syphilis, ken AIDS, impakdaar ti Red Cross ti Bolivia.”
Dagiti Peggad iti Maladaga
Ipadamag ti Health and Welfare Ministry itay nabiit, a naimatangan ti Japan ti yaadu dagiti maladaga nga “6-11 pay laeng a bulanda” a makaalimon iti sabidong. Agkagudua kadagiti amin a makasabidong a substansia a naalimon dagiti maladaga idi 1992 iramanna dagiti sigarilio. Daddumat’ nakainum iti nalaokan iti rungrong ti sigarilio ken dapo, a nabaybay-an kadagiti inumen a de-lata wenno kadagiti pagarsangan a naglaon kadagiti likido. Dadduma pay a napeggad a substansia a naalimon dagiti maladaga iramanna, sigun iti kasansanda, dagiti agas, ay-ayam, sensilio, taraon, ken kosmetiko. Sumagmamano a kaso ti nangibunga iti nakaro a sakit. Ipakdaar ti Ministry a makapasiddaaw ti pannakapasamak dagitoy nga aksidente iti nagbaetan ti alas 5:00 t.m. ken alas 9:00 t.r., tiempo a nakasangpeten ti kaaduan a miembro ti pamilia ken rumbeng a maaywanandan dagiti ubbing.
Supiat Maipapan iti Bautismo
Ti Colorado Springs, E.U.A., a nagbalin a maysa kadagiti kangrunaan a sentro ti panagebanghelio ti Kakristianuan, ti nabiit pay a nariribuk iti supiat maipapan iti pamay-an ti panangkumberte kadagiti ubbing. Sigun iti The Denver Post, mangus-usar ti Cornerstone Baptist Church iti grupo ti 16 a bus nga agsawar kadagiti ubbing iti [dayta] a lugar. Ti kari a kendi, soft drink, ken karnabal ti mangpagagar iti ubbing nga aglugan kadagiti bus. Palubosan ti adu a nagannak a sumurot dagiti annakda ngem madinton ti riknada apaman a maammuanda inton sumangpet dagiti annakda a nabautisaranda gayamen. Kadawyan nga agpapirma dagitoy a “managebanghelio” kadagiti nagannak iti porma ti pammalubos sakbay a bautisaranda dagiti ubbing, ngem pasaray di unayen maipapaalagad dayta a pagalagadan. Sigun iti Post, kuna ti ministro ti iglesia maipapan iti porma ti pammalubos: “Adu unay a tiempo ti mabusbos iti panagpapirma iti porma ti pammalubos.”
Nakaro a Pannakaigamer iti Soccer
Napalalo ti pannakaigamer ti sumagmamano nga agrayo iti soccer idiay Inglaterra: Kiddawenda nga inton matayda, maiwaris koma ti dapoda iti tay-ak a pagay-ayaman ti paboritoda a team. Tinawen a makaawat ti maysa a nalatak a team iti uray la 25 a kasta a kiddaw. Simmaknap unayen dayta nga ugali a nakatignayan ti English Football Association a mangipaulog iti maysa a pakdaar kadagiti timpuyog ti soccer no kasano ti rumbeng a pannakaikali dagita a tedda ti bagi ti tao. Sigun iti The Medical Post, ti balakadda iramanna ti sumaganad: “Di kasapulan nga iwaris amin a dapo. Bassit laeng ti iwarisyo. Ti dakkel a bunton papatayenna ti ruot. . . . Kaykayen ti dapo tapno masierto ti kalalainganna ken agpapada a pannakaiwarasna.”
Isasaknap ti Taoismo
“Ti kadadayagan a selebrasion iti historia.” Kasta ti panangiladawan ti magasin a China Today iti Setiembre 1993 a selebrasion ti Luotion Grand Prayer Ceremony, maysa a relihiuso a seremonia dagiti Taoista. Naangay ti seremonia idiay White Cloud Temple sadi Beijing, ket naggapu dagiti nakipaset kadagiti templo ti Taoismo sadi Australia, Canada, Hong Kong, Taiwan, ken ti Estados Unidos. “Ti kangrunaan a panggep” ti seremonia, sigun iti magasin, “ket kiddawen iti langit nga ipaayna ti kinaragsak kadagiti tattao iti amin a lubong.” Nabangon ti 11 nga altar, nakanta dagiti kasuratan, ken nayebkas dagiti kararag kadagiti ginasut a dios—agraman iti “manangisalakan” a dios nga ipagarupda a mangispal kadagiti tattao manipud iti pakariribukan a dimteng iti biagda. Kinuna ti maysa a padi ti templo idiay Hong Kong kadagiti timmabuno a ti Taoismo ket natarnaw manipud kinanainlubongan ken di makibibiang iti politika. Kinuna ti tsirman ti templo ti Taoismo idiay Taiwan kadagiti periodista nga itantandudo ti Taoismo ti patriotismo ken panagkakabsat.
Gastos ti Panangliklik iti Didigra
Kasano kadakkel ti magastos iti panangliklik iti makadidigra a panagbalbaliw ti panniempo ti globo a pagam-amkan ti adu a sientista? Pinattapatta ni Klaus-Peter Möller, lider ti Eduard Pestel Institute for System Research idiay Hannover, Alemania, a maaramid dayta babaen iti panangusar iti agdama a teknolohia. Sigun iti periodiko ti Alemania a Süddeutsche Zeitung, ti plano ni Möller kalikagumanna ti 75-porsiento a pannakapabassit ti mausar a pagsungrod kas iti uging, krudo, ken gas, a panangsukat kadakuada iti dadduma a pagsungrod a di mangiruar iti carbon dioxide. Ti ngay met magastos? Sigun iti pattapatta ni Möller, ti kuenta ket agdagup iti $22.5 trilion, wenno ag-$4,000 iti tunggal lalaki, babai, ken ubing a sibibiag ita. Kas iti ingngudo ti periodiko, ti trabaho “kalikagumanna ti intero a sangatauan a mangibanag iti naisangsangayan nga aramid a dakkel unay ti mabusbosna.”
Asino ti Damo a Nakakita Kenkuana?
Nabiit pay a nagsao ni Papa Paulo II a pangsuporta iti maysa a tradision a di unay natalged ti nakaibasaranna a “kalpasan ti pannakapagungar, ti Madonna [Birhen Maria] ti damo a nagparangan ni Jesus sakbay ti asinoman pay, sakbay nga impakaammo dayta ti anghel kadagiti babbai,” kuna ti Corriere della Sera. Daytoy a panangmatmat, a naan-anay a di pasingkedan dagiti Ebanghelio, ti nanggutugot iti panagduadua ti dadduma. Iti panagkomentona kadagiti kapanunotan ti papa ken ti akem ni Maria iti Katoliko a tradision, kinuna ti Italiano a mannurat a Katoliko a ni Sergio Quinzio a ti “popular a debosion” ken Maria ti kankanayon a mangituggod kadagiti Katoliko a “lumbes iti inyallatiw ti Nasantuan a Kasuratan kadatayo.” Daytoy a nabiit pay a “di mapagkedkedan a sasao,” kinunana pay, “ilawlawagna dagiti teksto iti nalablabes ngem iti kaipapananda.”
“Panagsigarilio iti Tukak” Isunona ti “Panagdilpat iti Tukak”
Naipadamag a nabayagen nga ammo ti dadduma nga agus-usar iti maiparit nga agas a mangparuar ti sumagmamano a tukak manipud iti kudilda ti pakaigapuan ti halusinasion a kemikal a maawagan bufotenine. Nupay kasta, makapapatay met ti kemikal—a no dadduma mapapatayna pay dagiti aso a mangtiliw ken mangan kadagiti tukak. Gapuna, nga ipadamag ti The Wall Street Journal, a napabutngan ti dadduma a mangus-usar iti maiparit nga agas iti “panagdilpat iti tukak” ken kaykayatda laengen ti “panagsigarilio iti tukak.” Ibilagda ti nagita a lan-ak ti tukak sada susopen dayta, iti panagrasonda a ti pudot ti mangikkatto iti sabidong. Uray ania ti kasasaad, saanen a legal ti panangabuso iti tukak. Ti bufotenine ket maysa kadagiti adda iti listaan ti napeggad ken ilegal a droga idiay Estados Unidos. Adda met naareston a maysa a managlako. Ipadamag ti Journal a kinemmeg dagiti pannakabagi ti linteg dagiti tukakna.
Umad-adu ti Agkanser Kadagiti Babbai a Pranses
Idiay Francia, umad-adu ti babbai a mannigarilio ngem idi. Kadagiti agtutubo a mannigarilio, ad-adun ti babbai ngem ti lallaki, ket nasursurok ngem doble ti immaduan ti bilang ti babbai a napigsa a mannigarilio (nasurok a 20 a sigarilio iti kada aldaw) nanipud idi 1977. Di pakasdaawan, nga umad-adu metten dagiti babbai a nakapataud iti mainaig-panagsigarilio a kanser. Ipadamag ti periodiko ti Paris a Le Figaro nga adda 20,000 a kabbaro a kaso ti kanser ti bará idiay Francia iti kada tawen, ket nasurok a 800,000 iti intero a daga. Nagtriple dagiti natay gapu iti kanser ti karabukob kadagiti babbai idiay Estados Unidos ken Canada ket nasursurok ngem doble idiay Britania, Japan, ken Sweden. Iti nabiit pay a miting idiay Paris maipapan iti kanser ti aangsan, impaganetget dagiti doktor a “ti kasayaatan a pangsumra iti mainaig-panagsigarilio a kanser isu ti panagsardeng nga agsigarilio.”
Irarasay Dagiti Makimismisa Idiay Netherlands
No agtultuloy dagiti agdama a kasasaad, tallo a kakapat kadagiti tattao nga Olandes ti dinton mainaig iti aniaman nga iglesia inton tawen 2020, sigun iti Staatscourant, ti opisial a periodiko ti gobierno ti Netherlands. Natakuatan ti nabiit pay a panagadal a napauluan “Sekularisasion idiay Netherlands 1966-1991” ti uppat a kangrunaan a grupo kadagiti umili nga Olandes: 28 porsiento ti di napadakkel a relihiuso; 33 porsiento ti napadakkel a relihiuso ngem immikayda iti iglesiada; 28 porsiento ti napadakkel a relihiuso ngem manmanodan a makimisa wenno pulos a saanen; ket 11 porsiento laengen ti kanayon a makimismisa. Kuna ti Staatscourant a ti yiikay manipud kadagiti iglesia ti kangrunaan a mapagsasaritaan kadagiti Romano Katoliko sana kuna: “Ti panangmatmat dagiti Romano Katoliko kasla agsupadi kadagidiay naespirituan a liderda. Madlaw ti maysa a ti autoridadda ti di ikankano dagiti miembro ti iglesia.”