Dagiti Seminar a Mangpasayaat ti Relasion Dagiti Doktor ken Dagiti Saksi ni Jehova
PARITAN ti linteg ti Dios dagiti Kristiano a mangipauneg ti dara babaen iti aniaman a pamay-an. (Aramid 15:28, 29) Ti panagtulnog iti dayta a linteg no dadduma ket nangituggod iti di pagkinnaawatan a nagbanag iti pannakaipaidam kadagiti Kristiano iti magun-odan ken epektibo a maisukat a medikal a pannakaagas kadagiti parikutda iti salun-at.
Tapno maipasdek ti nasaysayaat a pannakaawat ken tapno matulongan dagiti doktor a mangipaay iti panangagas a di agusar iti dara, nangpataud dagiti Saksi ni Jehova iti makatulong a serbisio ti liaison. Nangipasdek ti Bagi a Manarawidwid dagiti Saksi ni Jehova iti Hospital Information Services (HIS) idiay Brooklyn, Nueva York, tapno sanayen dagiti napili a panglakayen a Saksi nga agserbi kadagiti Hospital Liaison Committee (HLC). Naaramiden dagiti medikal a panagsirarak ket naiparang dagiti resulta kadagiti seminar iti HLC. Kasta met, daytoy nga impormasion ket naiparang kadagiti doktor ken kadagiti sentro a pagaywanan ti salun-at. Kasta met, mabalin a mayurnos ti panagpakonsulta kadagiti dadduma nga aduanen kapadasan a doktor iti panangikagumaan a maliklikan ti di pagkinnaawatan.
Naballigi kadi daytoy a programa? Pudno kadi a nakatulong ti naiparang nga impormasion? Kasano ti panagtignay dagiti doktor iti dayta? Dagiti sumaganad a rikna ken kapanunotan nga inreport ti maysa a medikal a doktor a timmabuno iti nabiit pay a seminar ti HLC ket aduan impormasion ken makaipanamnama.
“Inanamaek a masarakanyonto dagitoy nga impormasion a prangka ken makatulong.
“Umuna iti amin, bay-andak a mangibaga kadakayo a maysa a pribilehio ti makalikaguman a tumabuno iti maikadua a Hospital Liaison Committee Seminar nga imparang dagiti kameng ti Hospital Information Services a naggapu iti hedkuarter dagiti Saksi ni Jehova idiay Nueva York. Dagiti inanamak itoy a gimong saan laeng a natungpal no di ket adayo a linab-awanna pay. Impasdek ti panglukat a palawag ti tsirman ti pangkaaduan a kasasaad ti dua-aldaw a sesion. Impaganetgetna a ti HLC ket saan laeng a maysa a mekanismo iti panangtaming kadagiti kasapulan dagiti agsakit a Saksi bayat ti panagnaedda iti hospital. Mangipaay ti komite iti napateg a gundaway a mangikkat iti adu a gagangay a pagarup ti kaaduan a tattao ken dagiti doktor, dagiti administrador ti hospital, ken dadduma pay a kameng ti medisina maipapan kadagiti Saksi.
“Masdaaw dagiti adu kadagitoy a tattao a makaammo a dagiti Saksi ni Jehova ket saanda a kas kadagiti Christian Scientist iti pammatida iti panangagas. Saan nga al-alagaden dagiti Saksi ti ‘kalintegan a matay’ wenno ikagumaanda nga isaad ti bagbagida iti kinamartir. Wenno ti isyu ti dara ket maysa nga alagaden ti organisasion no di ket maysa a naimpusuan a personal a pammati. Ipaganetget dagita a panangipalgak dagiti panggep ti HLC a mangisuro. Wen, kas iti makita, makasursuro uray pay dagiti doktor ken adut’ masursuroda maipapan kadagiti awanan dara a maisukat nga agas. Kankanayon a masdaawak iti sinaklaw ken ti kinauneg ti panagsirarak a naipaay babaen itoy nga urnos, nga adu kadagitoy ti pudno a baro kaniak. Ket dagiti panggep ti HLC a mangisuro saan nga agpatingga ditoy. Dumanon agingga kadagiti administrador ti hospital, kadagiti panagserbi iti kagimongan, ken uray pay kadagiti opisial ti linteg ken ti pangukoman.
“Dagiti komite kasta unay ti panangikagumaanda a mangsapul, makiuman, ken dumawat iti tulong kadagiti doktor nga addaan kooperasion iti pammati dagiti Saksi. Siempre, saan laeng a maipaay iti komunidad dagiti doktor, ta mangibangbangon ti HLC iti relasion a pannakipagtrabaho kadagiti hospital, dagiti trabahador iti pagaywanan ti salun-at, abogado, ken kasta met dagiti hues. Nalabit ti kapapatgan a mensahe a maipaay ket dagiti Saksi ni Jehova nainkalinteganda a tattao, saanda a panatiko, ken dumawdawatda laeng iti maawat nga agas a maisukat iti dara. . . . Adda dagiti nakaro a peggad iti panangusar iti dara, ket pudno a tinungpal ti HLC ti akem a mangibutaktak kadagitoy a peggad ken panangipaganetget iti medikal a komunidad kadagiti mabalin a peggad ti dara ken dagiti produkto a dara.
“Kankanayon a nasdaawak iti impormasion nga impaay ti Hospital Information Services ken ti Watch Tower Society iti HLC. Ngem kas paneknekan ti asinoman a managdaliasat a tao, mabalin nga ibanag ti dandani aniaman a trabaho no maipaay dagiti umiso nga alikamen. . . . Makapasiddaaw a mangngegan ti maipapan kadagiti urnos a maar-aramiden tapno dagus ken epektibo a mangtaming iti gistay aniaman nga emerhensia iti panangagas. Tunggal miembro ti HLC ket nasanay a manggun-od kadagiti nasken nga impormasion maipapan iti kaadu dagiti doktor no idilig iti populasion, tapno maikeddeng a dagus ti kababalin dagiti doktor ken hospital, ken siuumiso a maikeddeng ti kinaganat ti emerhensia ken ti mabalin a panagpeggad iti panangibilin ti korte iti legal a panagtignay ti hospital a mangyalison.
“Inusisami dagiti pamay-an a manglawlawag kadagiti kasapulan ken pagayatan dagiti pasiente a Saksi, no kasano a pakilangenan dagiti di manamati a kabagian, uray pay no kasano ti panangpasardeng a mangagas dagiti doktor ket yakar ti pasiente iti sabali a medikal a pasilidad nga ad-adda a mangtaming kadagiti kasapulan ti Saksi. Naitampok ti pannakilangen ti HLC iti media, ket naipaay dagiti pagannurotan, a nangipaganetget manen iti kangrunaan a nakaipamaysaanna a saan nga agkedked dagiti Saksi kadagiti amin a medikal a panangagas, ti laeng dara. Daytoy mabalin nga ibilang a katupag ti panagkedked ti napasnek a Katoliko iti aborsion ngem saan nga agkedked kadagiti amin nga operasion.
“Nasanay dagiti miembro ti liaison committee a mangtaming kadagiti adu a gagangay a saludsod nga imbangon agpadpada dagiti hospital ken doktor, no dadduma uray dagiti Saksi a mismo. Daytoy mabalin nga iramanna dagiti isyu a kas ti panangawat iti immunoglobulin wenno albumin, ti panangusar iti cryoprecipitate wenno dagiti pamay-an ti panangagas a kas iti hemodilution, extracorporeal circulation, ti cell saver, wenno hemodialysis.
“Tinagiragsakko ti makaay-ayo a pannakisarita iti panangusig iti linteg a nairaman iti pannakaawat ken panangusar iti linteg a mangikalintegan kadagiti Saksi ken dagiti relihiuso a patpatienda. Dagiti pangngeddeng ti hues a mangbukel iti pamuon ti panangidepensa kadagiti kalintegan dagiti Saksi a mangikeddeng a mismo iti pannakaagasda isut’ pakaibatayan ti makaay-ayo a panagsasarita. Kadagiti dadduma, ti trabaho ti Hospital Liaison Committee ket kasla panaglablabes, saan pay ketdi a kasapulan; ngem iti kinapudnona, daytoy nga agkakanaig a serbisio a panangsaranay ket nasken. Inaldaw, makitak dagiti pasiente a Saksi a di unay makaammo iti kasasaad ti hospital ken nalabit dida pagaammo dagiti adu nga awanan dara a maisukat nga agas. Kasta met, mabalin a sumagmamano laeng ti talaga a makaammo iti kaadu ti pannakaammo dagiti mannakitinnulong a doktor nga am-ammo dagiti komite wenno dagiti espesipiko a legal a kalintegan ken ti rebbengen ken sanguen ti tunggal maysa kadatayo iti panangsapul ti saan nga agusar iti dara a panangagas.
“Palubosandak kadi a mangbaliw iti tema iti apagbiit tapno padayawak ti panangikagumaan ti HIS. Kas maysa nga interventional cardiologist, makitak a bassit laeng ti tiempo a mangbasa iti adu a pagiwarnak a mainaig a mismo iti paglaingak, ken nangnangruna pay ti ad-adut’ saklawenna nga internal medicine. Imposible ti mangsukimat iti intero a nakaad-adu a literatura ti medisina kadagidiay reperensia a mabalin a mangitudo kadagiti espesipiko unay a solusion dagiti maipasango a parikut iti panangaywan kadagiti pasientek a saan nga agusar iti dara. Naminsan manen a tinulongannak ti Sosiedad ta nangipaay iti tulong a mangilasin iti mainaig a panagsirarak manipud iti pagarigan a nabunton nga artikulo dagiti pagiwarnak.
“Dagiti agtultuloy a baro nga impormasion manipud Brooklyn kankanayon a pabpabaruenda ti pannakaammok kadagiti kaudian nga irarang-ay a mangapektar iti panangagasko. Dagitoy ket ad-adda a naan-anay ken makatignay ngem ti aniaman a nagupgop nga impormasion manipud kadagiti warnakan ti medisina a magun-odan kadagiti computer wenno telecommunication system a naadalkon. Siempre, rumbeng a kasta, no sipapanunottayo nga agpegpeggad dagiti biag.”—Babaen ken Dr. Stephen E. Pope, maysa a cardiologist iti lugar ti San Francisco Bay, idiay California, E.U.A.
[Kahon iti panid 20]
• Idiay Estados Unidos, agarup 18,000 a doktor ti mayat a makitinnulong babaen ti panangipaay kadagiti Saksi ni Jehova iti panangagas a di agusar iti dara. Iti sangalubongan, ti bilang ket 50,000.
• Idiay Estados Unidos, adda 45 a medical center a sadiay magun-odan ti programa ti panangagas ken operasion a di agusar iti dara. Iti sangalubongan, ti bilang ket 80.