Maysa a Narabiyan a Panagsinnabat Idiay Tanzania
KALPASAN ti kombension internasional dagiti Saksi ni Jehova idiay Kenya, sisesegga a rinugianmi ti personal a panagpasiar a mangretrato idiay Tanzania.
Ti damo a nagsardenganmi isut’ Lake Manyara National Park. Nasdaawkam iti nadumaduma nga atap nga ayup—dagiti blue monkey, impala, cape buffalo, zebra ken dadduma pay. Darepdepenyo nga agbuybuyakayo iti maysa a waig a napno kadagiti hippopotamus. Makitayo ti maysa a giraffe a mangmangan iti ballasiw, maysa a leon iti pangadaywen a karuruotan, ken pangen dagiti wildebeest iti medio ad-adayo pay.
Kalpasan ti isasangpetmi idiay Ngorongoro Crater, nangtangdankam iti maysa a giya ken nangarkilakami iti de-dual a lugan agpaay iti agmalmalem a panagpasiar iti maysa a caldera (wangawangan ti nargaay a bulkan). Ti likkalikkaong a biahe ti nangipan kadakami iti agarup 600 metro manipud iti wangawangan nga agpababa iti mismo nga arisadsad ti bulkan. Anian a buya! Agkaiwara dagiti atap nga ayup iti nalawa kapanagan. Immakar dagiti pangen ti wildebeest a kas ket tay migrasion. Nagadu dagiti zebra, hartebeest, ken gazelle a Thompson ken Grant. Iti maysa a nagsardenganmi, maysa a burboran a leon ti naglinong iti anniniwan ti luganmi, a di man la madanagan nga isut’ buybuyaenmi. Kalpasanna, nagsardengkam biit tapno paliiwen ti black rhino iti medio adayo ken dagiti atap nga elepante iti asideg a mangmangan kadagiti kayo. Bayat a nagbiahekam a nagsubli iti wangawangan, malagipmi ti nagadu a nakaay-ayat nga ayup. Adda kadi dimi nakita?
Bueno, wen, ti leopardo ti Africa. Ngem ti pannakakitami iti maysa iti let-ang ket gistay arapaap laeng. Kinuna ni retratista nga Erwin Bauer: “Sipsiputan dagiti turista ti leopardo buyogen ti kasta unay nga entusiasmo ken kinapinget, gapu ta nagrigat a sapulen dagiti ayup, nangnangruna pay no retratuenen. Di makita ti kaaduan a managpasiar kadagiti kadawyan a pagpasiaran uray la koma maysa. Kabayatan ti 15 a panagpasiarko, agdagup a walo a leopardo ti nakitakon, maysa laeng ti nakitak iti kaadayo a madanon ti kamerak.”—International Wildlife.
Idi rumabiin, adda manen sabali a pakadanaganmi. Nakanselar ti panagpareserba iti pagdagusanmi, isu a masapul a mangsapulkam iti pagdagusanmi. Daytoy ti nangipan kadakami iti lasonglasong a kalsada iti naan-anay a kinasipnget. Kellaat a nasdaawkam a dua nga adda iti makinsango a tugaw. Maysa a nakusnaw a kolor lalat ti kellaat a limmagto iti lawag dagiti headlight-mi. Nagsardengkam a dagus ken immangeskam iti nauneg iti siddaawmi!
Adda a mismo iti sangomi ti nataenganen a leopardo! No narikna dagidiay adda iti makinlikud a tugaw a naikapisda, dagus nga agpatingga dayta a rikna. Simmarakusok ti leopardo iti igid ti dalan iti kanawan—ken nagtalinaed a di naggargaraw. ‘Aniat’ rumbeng nga aramidek?’ kaslattay pampanunotenna sadiay yan ti silaw ken mangmatmatmat kadakam amin. ‘Rumautak ngata, wenno agtaliawak a mangkita iti diak am-ammo a “kabusor” ken ikagumaak ti agkamang iti kasamekan?’
Ni Adrian, maysa kadagiti kakaduami, ti kaasitgan, maysa la a metro manipud iti daytoy nabaneg ken nagpintas a parsua a sidadaan a lumagto. “Darasem, itedmo kaniak ti flash ti camera,” inyarasaasna bayat nga innalana a dagus ti fully automatic a camerana. Manipud iti likudanna, nangngegna dagiti mangpakdaar nga arasaas, “Dika agkarasakas.” Dagus a naisagana ti camera ket naretrato, ngem kasla saan a nagkurri ti flash iti uneg ti van. Bayat a nakasaganan dagiti bateria ti kamera, siaannad a linukatan ni Adrian ti tawana. Sangadeppa laengen ti yan ti leopardo, nga agkalkalawikiw ti ipusna, rumimatrimat dagiti matana.
Kalpasan unay a napiduami a naretrato, naikeddengnan no aniat’ aramidenna. Ti nangayed a leopardo kellaat a naglagto a nagturong iti kasamekan sa nagpukawen. Anian a ragsakmi iti uneg ti van! Maysa a kapadasan a dinto pulos malipatan, maysa a kapadasan nga idi agangay ket kinuna kadakami dagiti giya a naisangsangayan unay. Idi dayta a maikadua a retrato ket napaneknekan a nagpintas idi naipa-develop, daytat’ nanggutugot iti pananglagipmi iti dayta makapaseggar a narabiyan a panagsinnabat idiay Tanzania.