LEOPARDO

[Heb., na·merʹ; Aramaiko, nemarʹ; Gr., parʹda·lis].

Maysa kadagiti dadakkel a pusa, gagangay a nakusnaw a kayumanggi ti dutdotna nga addaan kadagiti nangisit a nagtimbukel a labang a putedputed. (Jer 13:23) Kadawyan a ti kaatiddog dagiti leopardo ket 1.2 m (4 pie), saan a mairaman ti ipus. Nupay iti nabiit pay unay a tawtawen adda sumagmamano a leopardo a napapatay iti asideg ti Jerusalem, nabatad nga ad-adu a bilang dagitoy a parsua ti nasarakan iti kadaanan a Palestina. (Sol 4:8) Ti cheetah, wenno aganup a leopardo, a naibilang a karaman kadagiti kapartakan a mamalia, masarakan met idiay Palestina, ket ti Hebreo nga awag a na·merʹ mabalin nga inramanna daytoy nga animal kasta met ti leopardo. Naiduma ti cheetah iti pudpudno a leopardo ta saan nga interamente a lumnek dagiti kukona ken solido dagiti labangna, saan a sinan-singsing.

Iti Kasuratan, naiparipirip ti kinasiglat ti leopardo (Hab 1:8) ken ti wagas a panagpadpadaanna iti asideg ti il-ili, a sisasagana a tumukma kadagiti lumabas a naamo nga animal. (Jer 5:6; Os 13:7) Maisupadi unay iti daytoy, nailadawan a sikakappia nga agkakaidda ti leopardo ken ti urbon a kalding bayat ti panagturay ti Mesias.​—Isa 11:6.

Iti Daniel 7:6, ti uppat-payakna, uppat-ulona a leopardo irepresentarna ti Grecia a Pannakabalin ti Lubong, a nangparmek iti Medo-Persia buyogen ti kinasiglat ti maysa a leopardo. Kasta met, ti atap nga animal a rimkuas iti baybay, a nakita ni apostol Juan iti sirmata, kangrunaanna nga umasping iti maysa a leopardo.​—Apo 13:1, 2; kitaenyo ti AN-ANIMAL, SIMBOLIKO NGA.

Ti Hebreo a sao a laʹyish, a naiduma ti pannakaipatarusna kas “leon” (Job 4:11; Pr 30:30), naipatarus a “leopardo” iti Isaias 30:6 (NW), a ti “leon” (la·viʼʹ) nadakamaten iti isu met laeng a teksto.