“Maysa a Pinansial a Holocaust”
BABAEN TI KORESPONSAL TI AGRIINGKAYO! IDIAY NIGERIA
SIGUN iti maysa a report ti UNICEF (United Nations Children’s Fund), agsagsagaba ti sub-Saharan Africa iti “maysa a pinansial a holocaust.” Gistay kagudua iti populasion—ag-220 milion a tattao—ti agbibiag iti naan-anay a kinapanglaw, a dida maipaay ti kangrunaan a kasapulanda. Ti promedio nga umili ket 20 porsiento a napangpanglaw ngem ti kinaisuda iti napalabas a dekada.
“Iti edukasion,” kuna ti report, “ti dekada ’80 ti kakaisuna a mailadawan kas ti napukaw a dekada.” Bimmaba ti gastosen ti tunggal estudiante iti maysa a kakatlo, ket bimmaba dagiti nagpalista iti elementaria manipud 79 a nagbalin nga 67 a porsiento. Bumasbassit metten dagiti serbisio a mangtaripato iti salun-at kadagiti adu a pagilian ti Africa, nga addaan iti adu nga agserserra a klinika gapu ta awan agtrabaho ken agas.
Ilista ti report ti sumagmamano a pakaigapuan ti krisis ti ekonomia ti kontinente, a pakairamanan ti panaggasto iti militaria, bumasbassit a negosio, ken nagadu nga utang, a sigun kadagiti eksperto ket pulos a dinton mabayadan. “Dinto makalung-aw ti Africa,” kuna ti report ti UNICEF, “no awan ti maiwayat nga internasional a panagregget.”
Kastanto kadi ti mapasamak? Sipupudno a kunaen ti Biblia: “Dika agtalek iti prinsipe, wenno iti anak ti tao, a kenkuana awan ti tulong.” (Salmo 146:3) Ti solusion ti nakaro unay a parikut ti Africa ket saan a marisut dagiti gobierno ti tao. Ti Pagarian ti Dios ti mangyegto iti manayon a bang-ar—saan laeng nga iti Africa no di ket iti intero a lubong.—Mateo 6:10.
[Picture Credit Line iti panid 31]
WHO/OXFAM