Dagiti Babbai iti India Agturturong iti Maika-21 a Siglo
BABAEN TI KORESPONSAL TI AGRIINGKAYO! IDIAY INDIA
Natayagda, pandekda. Narapisda, nalukmegda. Naparatoda, nagubsangda. Nakabakbaknangda, nakapangpanglawda. Nangatot’ adalda, pulos a dida nakaadal. Asinoda? Dagiti babbai idiay India. Ket pagturturonganda? Agturturongda iti maika-21 a siglo.
ITI kaaduan a tattao nga agnanaed iti ruar ti India, ti ladawan ti maysa a babai nga Indian isu daydiay nangayed, naimnas, misteriosa, ken makaallukoy. Adu a lallaki ti mangayat iti India no agsapulda iti asawaenda, no dadduma gapu iti panangmatmat a dagiti babbai nga Indian ket ad-adda a managpasakop, mangay-ayo iti assawada, ken nalalaing nga agtagibalay ngem kadagiti ad-adda a managwaywayas a kapatadanda idiay Laud. Nupay kasta, makaiwawa ti mangiladawan iti maysa a kadawyan a babai nga Indian iti naglalaok ti pulína a lugar a nadumaduma ti etniko, relihion, ken nalikudan ti kagimonganna. Agnanaed iti daytoy makaay-ayo a lugar ti isuamin a kita ti babbai.
Ti pakasaritaan ti India ket maysa kadagiti nagadu a kultura a naglaok babaen man iti talna wenno pannakapilit. Adda pattapatta maipapan iti nagtaudan dagiti immuna a nagtaeng, dagiti Dravidian. Ti nagtaudanda kasla babaen ti panagtipon ti Australia ken makin-abagatan a tattao ti Mediteraneo, nga adda nangnangruna a pakainaiganda iti Creta. Bayat nga immakar dagiti Aryano ken Persiano idiay India manipud iti amianan a laud ken dagiti Mongol manipud iti amianan a daya, nagsanud dagiti Dravidian a nagpaabagatan. Isu a kaaduanna, masarakantayo a dagiti babbai iti abagatan nga India ket babbabassit iti pammagi ken nakaykayumanggida ngem dagiti babbai idiay amianan, a nataytayag ken napudpudaw ngem kaskasdi a nangisit ti buok ken matmatada. Ti tattao idiay amianan a daya masansan nga aglanglangada a kaslattay taga Dayada.
Dakkel ti naaramidan ti relihion iti pannakaipasdek ti pakabigbigan ti babbai ti India. Agsipud ta sekular nga estado ti India itatta, naaramid ti tunggal panagregget a mangbalbaliw kadagiti tradisional a panangmatmat a nanglapped iti irarang-ay ti babbai. Naisayangkat ti dadakkel a pamay-an tapno manayonan ti gundaway a makaadal, saan laeng a kadagiti nabaknang wenno addaan impluensia a babbai no di ket iti isuamin. Dagiti klase a mangisuro iti panagbasa ken panagsurat, pannakasanay nga agtrabaho kadagiti awayda, ken libre a panageskuela dagiti babbai ti mangparparang-ay iti pakabigbigan ti kinababai dagiti Indian.
Idi Hunio 22, 1994, iti estado ti Maharashtra, naaramid ti dakkel nga irarang-ay idi nairuar ti pammilin ti gobierno maipapan kadagiti babbai. Inladawan ti bise-presidente ti India a ni K. R. Narayanan, kas “napateg” ken “mamagbalbaliw,” tinamingna dagiti kangrunaan a parikut ti babbai, kas kadagiti kalintegan a makikadua nga agtagikua, panagbantay, benepisio iti panagbalay, ken agpapada a gundaway iti panagtrabaho.
Bayat nga ad-adu a babbai ti ageskuela iti kolehio ken sumrek iti lubong ti negosio, saan a parabalay laengen, immadu ti parikut maipapan iti panagbalbaliw ti kasasaad iti moral. Nagparang dagiti report maipapan iti panangabuso iti droga ken panagbaba ti moral kadagiti kolehio. Ti warnakan dakkel ti naaramidanna iti panagbalbaliw ti dadduma nga agtutubo a babbai nga Indian. No idilig dagiti sine nga Indian 30 a tawenen ti napalabas kadagiti sine ita, adu ti makabigbig a dakkel unayen ti namalbaliwan ti pannakailadawan ti babbai. Inkomento ti maysa a babai nga Indian: “Ti sigud a managbabain, naemma, managsakripisio a banuar a babai kadagiti sine idi ages-eskuelaak pay laeng ket sinukatanen ti moderno a babai a, no malidliday, panawanna ni lakayna ken dagiti nakaikamanganna ken ilabanna dagiti kalinteganna ken ti panagwaywayasna.”
Ngem ti India ket kaskasdi, kas pangkaaduan, kalalainganna pay laeng iti kababalin ken panagkawkawes no idilig iti adu a pagilian. Ti kadawyan unay a kawes, ti napintas a sari, sinanakman nga abbonganna ti kaaduan a paset ti bagi. Nalatak kadagiti agtutubo a babbai, nangnangruna iti amianan, ti shalwar-kameez, nalawa a kawes a maiterno iti kasla pajama a pantalon. Dagiti moda ti Laud, a kangrunaan a makita idiay Bombay, Goa, ken Calcutta, ket masansan a nanakman ti estilo ken kaatiddogna.
Baro a Gundaway iti Panagtrabaho
Ania a kita ti trabaho ti nakalukat kadagiti babbai nga Indian bayat nga agturongda iti maika-21 a siglo? Agnanaed kadagiti away ti dakkel a paset iti populasion ti India, a ti trabahoda ket agrikultura. Minilion ti agtrabaho kadagiti talon. Agtrabaho dagiti babbai a kadua dagiti lallaki iti amin a kita ti trabaho iti talon. Adayo pay ti karayan ken bubon a pagsakduanda iti danum ken agpakarigatda nga agtarikayo iti pagsungrod. Kabayatan ti panagtrabaho, mayabaday dagiti maladaga wenno maipaidda kadagiti indayon a nakabitin kadagiti kayo.
Manipud idi kattapog ti maika-20 a siglo, dimteng dagiti taga-away a pamilia nga Indian kadagiti lugar iti siudad tapno agsapulda iti pagtrabahuan. Dagiti babbai ket nagtrabaho kadagiti pagaramidan ken paktoria ti tela. Nupay kasta, ti pannakapabaro ti industria ad-adda nga inapektaranna dagiti trabahador a babbai ngem dagiti lallaki. Dagiti lallaki ti nasanay a mangpaandar iti makinaria, ngem dagiti babbai ket saan. Daytoy ti nakaigapuan ti napalalo a rigat dagiti babbai. Agpatinggada laeng iti panagbagkat kadagiti materiales iti lugar a pagibangonan, nga agiduronda kadagiti karatilia a napno iti nadadagsen a sako, aglako kadagiti segunda mano a kawes, wenno dadduma pay a nababa ti sueldona a trabaho.
Nangaramid dagiti manangbalbaliw iti kagimongan kadagiti panagregget a mangpasayaat iti biag dagiti babbai. Kellaat a nagparang dagiti movimiento kas iti SEWA (Self-Employed Women’s Association), a kalatda a tulongan dagiti di nakaadal a trabahador a babbai nga aywanan ti salun-atda tapno makapagtrabahoda, tapno makaadalda a naimbag ket maliklikan ti pannakaisagmakda iti dakes a pagtrabahuan, tapno mapasayaat ti kinasigoda nga agtrabaho, ken sursuruen ti panagsalimetmet iti kuarta tapno makaurnongda iti bukodda a puonan ken maliklikan ti nangato nga interes nga ipataw dagiti mananggundaway a managpautang. Idi napagsaludsodan maipapan ti pannakausar ti kinababai kas alikamen iti kagimogan, kinuna ti nalatak a sosiologo a ni Zarina Bhatti: “Idiay India, ti kinababai kaipapananna ti panagimdeng kadagiti parikut ti babbai, organisaren ida, ikagumaan nga iranud ti teknikal nga edukasion kadakuada agraman ti salun-at ken nutrision.”
Maigiddato, agbalbaliwen dagiti panangmatmat maipapan iti kasasaad dagiti de-adal a babbai manipud kadagiti nabaknang a pamilia a naibilang a nangato iti kasasaad ti kagimongan, agraman dagiti babbai manipud kadagiti pamilia a kalalainganna ti kinabaknangda. Ita dagiti babbai iti agpada a pamilia ket masarakanen iti amin a tay-ak ti trabaho, saan la nga iti panangisuro wenno medisina. Adda karerada kas piloto ti eroplano, modelo, stewardess, ken polis ken kadagiti nangato a saad. Adu a tawen a babai ti prime minister ti India, a nabutosan iti kadakkelan a demokrasia iti lubong. Agtaktakem dagiti babbai nga Indian kadagiti saad iti armada ken abogada ken chief justice, sa rinibu ti simrek iti negosio kas manager.
Panagbalbaliw iti Tay-ak ti Panagasawa
Iti daytoy a pagannayasan nga agturong iti agwaywayas a panagtrabaho, ania ti panangmatmat ti moderno a babai nga Indian maipapan iti panagasawa? Nangyeg ti maika-19 ken maika-20 a siglo iti dadakkel a panagbalbaliw kadagiti kasado a babbai nga Indian. Naisardeng babaen iti panagturay ti Britania ti kadaanan a kustombre a maawagan suttee, ti panangitulok ti balo nga isut’ mapuoran a kadua ti bangkay ni lakayna. Naiparit ti panagasawa ti ubbing babaen ti pannakaipaulog ti linteg a di maipalubos a makiasawa a legal ti balasang nga agtawen iti nababbaba ngem 18. Legal metten a naiparit ti pannakapilit ti pamilia ti balasang a mangted iti sab-ong, ngem addada pay laeng mangar-aramid iti daytoy a dakes a kustombre. Rinibu nga agtutubo a nobia ti napapatay iti nadumaduma a pamay-an, maigapu ta di kabaelan ti pamiliana nga ited ti umdas a sab-ong wenno maigapu ta ad-adu a kuarta ti magun-odan manipud iti maikadua a panagasawa.
In-inut a matamtamingen dagiti pudno a makagapu iti ipapatay maigapu iti sab-ong. Sigun iti tradision, no makiasawa ti balasang nga Indian, isut’ makipagnaed ken lakayna iti pagtaengan ti pakaikamanganna ken agtalinaed sadiay agingga iti ipapatayna. Pulos a din awaten pay dagiti nagannakna iti pagtaenganda. Gapu ta saan unay a nakapagadal, di mapanawan ti kaaduan a babbai ti pagtaengan ni lakayda tapno agtrabahoda koma a mangsuportar iti bagida. Isu a masansan a matutuok dagiti agtutubo a babbai ken masansan a riribuken ida ti pangta ni patay, ket no di makaited dagiti nagannakda iti ad-adu a kuarta wenno sanikua a pangpennek kadagiti naamen a nakaikamangan, basta an-anusan lattan dagiti nobia ti kinasaem iti pagtungpalanda, masansan a naiplano a makapapatay nga aksidente a kas koma ti ibebettak ti paglutuan wenno pannakapuor ti nasileng a sari-na.
Babaen ti pannakaipaulogen dagiti linteg, mangipaay dagiti unit ti polis a babbai, ken korte ti babbai ken mangsuporta a grupo, iti pagkamangan dagiti kasado a babai no madlawna nga agpegpeggad ti biagna. Babaen ti ad-adu nga edukasion a magun-odanen ken gundaway a makapagtrabaho, dadduma a babbai kaykayatdan ti di makiasawa wenno makiasawa inton nataengandan kalpasan a nakagun-oddan iti karerada. Iti kasta, saanen a nakaro ti panagpannuray iti lallaki, a masansan a mangituggod iti naulpit a panangdominar.
Ad-adun nga Atension ti Magun-odan Dagiti Maladaga a Babbai
Sabali pay a parikut a mangapektar iti babbai, ken daytat’ agbalbaliwen bayat a sumungsungad ti maika-21 a siglo, isut’ di nainkalintegan a panagtarigagay iti lallaki nga annak. Naibatay iti kadaanan a narelihiosuan a sursuro, agraman iti pannakaikabilangan ti ekonomia, daytoy a kapanunotan masansan a nangituggod iti pannakapapatay ti maladaga a babbai ken ti dakes a pannakatrato ti babbai babaen iti bassit a taraon, edukasion, ken panangtaripato iti salun-at a maipaay kadakuada ngem ti maipaay kadagiti maladaga a lallaki.
Kadagiti kallabes a tiempo, nasaknap ti panangusar kadagiti amniocentesis tapno maammuan ti sekso ti sikog, a masansan a nangituggod iti pannakairegreg dagiti babbai. Nupay konkontrolen ti linteg, talaga a masansan pay laeng a maal-alagad ti tradision. Maar-aramid dagiti napinget a panagregget tapno mabalbaliwan ti panangmatmat nga ad-adda a matarigagayan ti anak a lalaki.
Dagiti aramid-tao a pilosopia tinagibassitdan ti babbai iti adu a wagas. Ti pannakatrato dagiti balo ti maysa a pagarigan. Idiay kadaanan nga India, maipalubos ti pannakiasawa manen dagiti balo. Ngem idi agarup maikanem a siglo K.P., binusor dagiti mammanday-linteg daytoy, ken nagbalin a nakapimpiman ti kasasaad dagiti balo. Tangay naikedked ti pannakiasawada manen, masansan a takawen dagiti kabagian ti sanikua ti pimmusay nga asawada, maibilangda a lunod iti pamilia, isu a kaykayat ti adu a balo ti mapuoranen a kadua ti bangkay ni lakayda imbes a ti biag a napnuan pannakaabuso ken pannakaibabain.
Manipud idi arinunos ti maika-19 a siglo, inkagumaan dagiti repormador a palag-anen ti dagensen ti kakasta a babbai, ngem saan a nalaka a mapunas dagiti naiyukuoken a rikrikna. Iti adu a komunidad, ti pagbanagan ti balo, no dadduma ti maysa nga agtutubo a babai a pimmusay ti lakayen nga asawana, ket agpayso a nakasasaem. Kuna ni Dr. Saharada Jain iti Institute for Development Studies: “Ti kinasaem ti kinabalo kangrunaan a maigapu iti kinapudno a dagiti babbai ket nakondision a ti intero a kinataoda ket naipadron ken agpannuray iti kasasaad ni lakayna.” Maar-aramid dagiti panagregget tapno matulongan dagiti balo nga agturong iti maika-21 a siglo a buyogen iti dignidad.
Nagdumaan ti Away ken Siudad
Dakkel ti nagdumaan ti taga siudad ken taga away a babbai. Mapattapatta a 25 porsiento kadagiti taga away a babbai ti nakaadal; kadagiti siudad dakdakkel a porsiento ti magunggonaan manipud kadagiti eskuelaan ken kolehio. Tapno matulongan dagiti taga away a babbai, iyur-urnos dagiti trabahador ti social welfare dagiti klase iti literasia, pannakasanay a mangtaripato iti salun-at, ken ti gundaway a makapagtrabaho. Mangireserba ti dadduma a gobierno ti estado iti 30 porsiento kadagiti bakante a trabaho iti sektor ti publiko, kooperatiba a kagimongan, ken ti saad iti gobierno iti lugarda nga agpaay iti babbai. Dagiti movimiento ti babbai ikagumaanda a palag-anen ti saem ken kinadaksanggasat nga isut’ kasasaad ti minilion idiay India. Uray kaskasano, naballigi dagitoy. Isu nga aniat’ makunatayo maipapan iti masakbayan ti babbai idiay India?
Panagturong iti Maika-21 a Siglo!
Agbalbaliw kadin ti akem ti babai nga Indian bayat nga agturong iti maika-21 a siglo? Wen, ket sipapardas dayta. Ngem sangsanguen ti babbai nga Indian ti kasasaad nga umasping kadagiti kapatadanda iti intero a lubong. Adda irarang-ay, ngem adda met pagdaksanna. Adda namnama, ngem adda met pannakaupay. Adda nagpipintas a pagtaengan ken naluho nga estilo ti panagbiag, ngem adda dagiti iskuater, dumegdegdeg a kinapanglaw, ken panagbisin. Kadagiti minilion, ti la umdas a pagbiag ti magun-odanda. Dadduma ti agparang a kaslattay matagikuada amin nga adda iti lubong. Iti kaaduan nalidem ti masakbayan; adda arapaapda ngem adda met panagduaduada.
Kadagiti dadduma, nupay kasta, naraniag ti naikari a masakbayan, nangnangruna kadagidiay mangin-inanama iti Paraiso a daga a dumtengto iti sidong ti panagturay ti Pagarian ni Jehova babaen ken Kristo Jesus. (Apocalipsis 21:1, 4, 5) Padpadaananda buyogen ti naan-anay a panagtalek ti maika-21 a siglo inton tagiragsakenen ti babbai ti naan-anay a biag.
[Ladawan iti panid 16]
Panagbunag iti ladrilio nga agturong iti lugar a pagibangonan
[Ladawan iti panid 17]
Panagsakdo iti danum a mausar idiay pagtaengan
[Ladawan iti panid 18]
Iti maysa a komperensia a kaduada ti lallaki
[Ladawan iti panid 18]
Panangusar iti computer