No Dumteng ti Didigra

MAILASIN ti maika-20 a siglo babaen kadagiti dadakkel a didigra, ket kaaduan kadakuada ti inaramid ti tao. Dadduma, nupay kasta, ti saan. Iti panangipadtona iti kaaldawantayo, kinuna ni Jesu-Kristo: “Ti nasion tumakderto a bumusor iti nasion ket ti pagarian bumusor iti pagarian, ket addanto dagiti kinakirang ti taraon ken dagiti ginggined iti nadumaduma a disso.” (Mateo 24:7) Pudno, biang ti tao dagiti gubat ken kinakirang ti taraon, ngem saan a maipabiang kenkuana dagiti ginggined. Kasta met, nupay dagiti dadduma a makadadael a layus ket maigapu iti aramid ti tao, saan a mapabasol kadagiti ginggined. Ket saan met a basol ti tao dagiti bagyo wenno panagbettak ti bulkan.

Aniaman ti pakaigapuanda, dagiti didigra ti nakaparsuaan ipakitana ti kinabassit ti tao, ti kinaawan gawayna no mapasanguan kadagiti nakaskasdaaw a puersa ti nakaparsuaan. Daytoy daga, ti pagtaengantayo, gagangay a kasla nakataltalged ken naandur. Ngem no magunggon iti ginggined, malapunos iti layus, wenno dalapusen ti naranggas nga angin a kankanayon nga umablat babaen iti mangrebbek a puersa, mapukawen dayta a kasla kinatalged.

Kasta unay ti dinadael dagiti didigra ti nakaparsuaan ken adu ti napukaw a biag bayat ti maika-20 a siglo. Mabalin kadi a naliklikan koma daytoy? Adda koma aya aniaman a naaramidan a nangkissay kadagiti makadidigra nga epekto? Kas indibidual, ania ti maaramidtayo a mangsalaknib iti bagitayo? Naan-anay kadi nga awan gawaytayo no dumteng dagiti didigra? Kankanayonto kadi a mabiktima ti sangatauan iti kastoy a pamay-an? Sungbatan dagiti sumaganad nga artikulo dagitoy a saludsod.