Manipud Managbasatayo

Pannakapaksuy Pagyamanan kadagiti serye ti “Agsagsagabakayo Aya iti Pannakapaksuy?” (Enero 8, 1995) Nupay agserserbiak kas maysa a payunir, adun a bulan a mariknak a maib-ibusanak iti pigsa ken mapukpukaw ti gaganaygayak. Ti artikulo inikkannak iti sumagmamano a singasing nga iyaplikarkonto, nangnangruna ti panangliklik iti panangkritikar iti sabsabali.

M. S., Alemania

Naisangsangayan unay kaniak dagitoy nga artikulo agsipud ta nabigbigko met laengen ti parikutko. Maysaak nga asawa ken ina ti uppat nga annak, ket nagadu ti trabahok idiay balay. Nakalkaldaang ta bassit man laeng nga apresasion ti magun-odak manipud iti pamiliak. Nasaysayaaten ti panagriknak a nakaammo a kadawyan daytoy a parikut kadagiti sensitibo a tattao. Itultuloyyo ti mangipablaak kadagiti artikulo a kas kadagitoy!

J. M., Italia

Nabayagen nga agsagsagabaak iti pannakabannog, saan unay a kinaganaygay, kinapimpiman, kinaawan namnama, ken kinakapuy. Kalpasan ti panangbasak iti artikuloyo, naawatak dagiti pakaigapuan dagitoy a rikna. Kayatko a maammuanyo nga anian a nagsayaat ti pannakarikna a maawatandaka ken ti pannakaammo a mangipatpateg ngamin ni Jehova ken ti organisasionna isu a mangisuratda kadagiti makaparegta nga artikulo.

Z. L., Estados Unidos

Ti pannakapaksuy ti maysa a nakaigapuan ti panangilusulosko iti panagserbik idiay Bethel ken panangisardeng iti kinapayunir idi agangay. Gistay nagikkatak payen kas maysa a panglakayen! Nabigbigko itan no sadino ti nagkamaliak a diak nakisaritaan iti napalabas a tiempo. Nagbalbaliwakon iti daytoy a paset, ket nasaysayaaten ti panagpampanunotko.

E. R., Estados Unidos

Makaparegta a maammuan a nakapagandur ti dadduma a Kristiano a ministro iti daytoy a parikut ken naparmekda dayta.

C. L., Switzerland

Di Naikasar nga Inna Pagyamanan iti artikuloyo nga “Agimtuod Dagiti Agtutubo . . . Kasano a Mapagballigian Dagiti Di Naikasar nga Inna ti Kasasaadda?” (Oktubre 8, 1994) Impabigbigyo a mapasamak ti panagsikog gapu iti panagbasol. Ngem imbes nga ilawlawagyo daytoy ken iparikna iti balasang ti ad-adda pay a makapasair, mangtedkayo kadagiti praktikal, makatulong a pagannurotan.

J. D., Estados Unidos

Nagbalinak nga agsolsolo a naganak sangapulo a tawenen ti napalabas. Ngem babaen ti tulong ni Jehova ken dagiti Kristiano a nagannakko, simmayaat ti nagbanagak. Kalpasan ti panagturposko iti eskuelaan, nagserbiak kas amin-tiempo a ministro iti innem a tawen ken nakiasawa iti Kristiano a lalaki nga agserserbi itan kas maysa a panglakayen. Nagunggonaanak unay manipud iti asi ken kinaimbag ni Jehova ket nausarko ti kapadasak a tumulong iti sabsabali.

A. M., Estados Unidos

Diak malapdan ti panagarubos dagiti luak bayat a binasak ti artikulo. Napadasak ti isu met laeng a kasasaad nga insalaysayyo. Ita ta maysaakon a Kristiano, maragsakanak ta mapadakkelko ti balasangko a buyogen ti pannakaawat.

C. R. S., Brazil

Panagurok Namakdaar ti artikulo nga “Agurokkay Kadi?” (Setiembre 8, 1994) kadagiti posible a peggad ti panagurok. Ngem impamatmatyo a no nakaro ti panagurokyo, addaankay iti apnea iti pannaturog. Saan nga interamente. Ti pagannayasan nga agurok mapasamak bayat a lumaklakaytayo. Mapasamak met maigapu iti allergy ken problema iti sinus. Ngem no napakuyogan ti nakaro a panagurok kadagiti kanito ti din panaganges, a sarunuen ti panaganangsab wenno panagbang-es, ken panagdudungsa no aldaw wenno pannakabannog, mabalin a ti apnea iti pannaturog ti makagapu. Ti kadawyan unay a pangagas ket, saan nga operasion, no di ket dagiti alikamen a mangusar iti compressed air tapno agtalinaed nga awan manglapped iti aangsan kabayatan ti pannaturog.

C. S., Estados Unidos

Apresiarenmi dagitoy a komento ken ladingitenmi no ti impablaakmi ket nakapataud iti aniaman a pannakariro. Umanamong dagiti autoridad iti tay-ak ti medisina a normal ti pasaray panagurok. No kadagiti isuamin a medikal a parikut, nasken ti panangeksamen ti doktor agpaay iti umno a panangagas.​—ED.