Manipud Managbasatayo

Panagimdeng Ti artikulo a “Mannakipagriknakayo Aya a Managimdeng?” (Disiembre 8, 1994) ti talaga a kasapulak. Namin-anon a kinuna kaniak ti maysa a gayyem a dina kayat no kunaek a kinaagpaysuanna saan unay a nadagsen ti problemana sa balakadak nupay dina kidkiddawen. Diak ilibak, pagarupko idi a dakes ti ugalina. Ita naawatakon a kamaliak gayam!

S. H., Estados Unidos

Nabayagen nga ur-urayek ti artikulo a kas iti daytoy, ngem linab-awanna amin nga inanamaek. Masansan unay a tagibassitentayo ti kinapateg ti panangammo no kasano ti agimdeng. Kaskasdi, kaaduan kadatayo ti mangar-arapaap a makaawat koma ti bagitayo iti kasta nga atension.

S. D., Italia

Agtawenak iti 18, ket masansan a masarakak ti bagik a dina ammo ti ibagana iti kakasta a kasasaad. Ngem kalpasan a nabasak dayta a nakaay-ayat nga artikulo, patiek nga agbalinakton a mannakipagrikna a managimdeng.

J. M., Australia

Nagsayaat a maammuan a saan gayam a kasapulan a risutentayo ti tunggal parikut a mangngegtayo no di ket masansan nga umdasen ti panagimdeng. Sursuruen koma nangnangruna dagidiay nariribuk ti pamiliana a kas kadakami dagiti kangrunaan a pamay-an ti pannakikomunikar. Pagyamanan iti kanayon a panangusaryo iti Biblia a mangisuro kadakami no kasano ti agbiag.

J. D., Estados Unidos

Simmayaat a Gapuanan-Arte Graphic arts ti in-major-ko idiay eskuelaan. Maigiddato iti dayta, makiad-adalak iti Biblia kadagiti Saksi ni Jehova. Ngem no itugotko idi ti Agriingkayo! idiay eskuelaan, sangkauyaw dagiti padak nga estudiante ti diseniona​—a saan a nasayaat ti ‘pannakaaramat dagiti kolor’ ken dadduma pay. Kadagiti kallabes a bulan, nupay kasta, dagiti disenio ket agpayso a nagsayaat. Talaga a pagpannakkelko dagiti magasin!

N. I., Japan

Nadangran nga Atmospera Kalkalpasko a binasa ti artikulo a “No Madadael ti Atmosperatayo” ket nagustuak unay dayta. (Disiembre 22, 1994) Talaga a paglainganyo ti agpili kadagiti nagpateg a tema nga isurat. Ngem namin-adun a nadakamatyo ti panagbara ti daga ngem awan met intedyo a pammaneknek. Agannadkayo! No addanto aldaw a matakuatan a ti teoria ket saan a pudno, maakusarto ti warnakanyo.

M. L., Estados Unidos

Dikam inyendorso ti teoria a panagbara ti daga no di ket impadamagmi laeng ti kinapudno a patien ti adu a mapagtalkan a sientista a mapaspasamak dayta. Agtalinaed a maseggaan no mapasingkedanto man wenno saan ti kontrobersial a teoria babaen ti ad-adu pay a panagsirarak.​—ED.

Panagpasiar ti Klase Maragsakanak a nangbasa iti artikuloyo nga “Agimtuod Dagiti Agtutubo . . . Dagiti Ngay Panagpasiar ti Klase?” (Oktubre 22, 1994) Adun a tawen ti napalabas, implano idi ti klasek ti makalawas a panagpasiar. Kalpasan ti panangutobko iti dayta a banag babaen ti kararag, inkeddengko a diak mapan. Idi nagawid ti klase, naammuak a sumagmamano kadagiti kaklasek ti nakiraman iti seksual nga imoralidad. Kinapudnona, dagita a panagpasiar ket nagrigat a suot iti maysa a Kristiano nga agtutubo.

J. S., Norway

Ti artikulo talaga a tinulongannak agsipud ta namin-anon a nagpasiarak. Dagiti saludsod nga indatagyo ti tumulong iti agtutubo a mangutob iti kasasaad. Pagyamanan iti panangtulongyo kaniak nga utoben a naimbag dagiti panagpasiar ti klase.

M. R., Estados Unidos

Nabiit pay a naawisak a sumurot iti panagpasiar ti klase iti lugar a nabayagen a kayatko a makita. Inkeddengko a diak mapan nupay nabayadakon ti tiket. Idi agangay, pinampanunotko ti nakaikapisak. Ngem simmangpet ti artikuloyo iti umiso a tiempo. Kalpasan a nabasak dayta, siguradoakon nga umiso ti inkeddengko.

L. S. B., Brazil