Manipud Managbasatayo
Panagleddaang Pagyamanan unay, unay iti artikulo a “Ti Panangmatmat ti Biblia: Tulong iti Panagladingityo.” (Marso 8, 1994) Itay nabiit, ni lakayko a maysa a panglakayen iti kongregasion Kristiano, ket natay iti maysa nga aksidente. Diak mayebkas ti riknak ken ti tallo nga annakko iti pannakaulilami. Anian a bendision ti panangbasa iti maysa nga artikulo ken maamiris a ti rikrikna a sagsagabaenmi ket normal!
N. S., Estados Unidos
Tallo a tawen ti napalabasen a ni inangko, ken tallo a bulan ti napalabasen a ni amangko, ti naturogdan ken patay. Nupay sigurado ti namnama a panagungar, kaskasdi a nasaem ti panagsisina a pinarnuay ni patay. Ti artikuloyo ti nanggutugot kaniak nga ad-adda nga ipamaysak ti namnama iti Pagarian ken agtultuloy a simamatalek nga agserbi iti Dios.
K. S., Japan
Makabulan itan a napukawko ni amangko. Awan umdas a sasao a mangyebkas iti panagladingit ti maysa nga anak. Naintiempuan unay ti artikuloyo ket tinulongannak a di unay malapunos iti pannakaupay, agpapan pay iti saem a marikriknak.
A. P. L., Brazil
Cartoons Kayatko ti agyaman kadakayo iti artikulo a “Makadangran Kadi Dagiti Naranggas a Cartoon iti TV?” (Disiembre 8, 1993) Walo ti tawenko ken nairuamak a mangbuya kadagitoy a cartoon. Ngem idi nabasak ti magasinyo, naamirisko a saan a nasayaat dagita a cartoon, isu a diak buybuyaen idan.
L. T., Italia
Baro a Panawen Kabasbasak ti Marso 8, 1994 nga Agriingkayo! maipapan iti “Baro a Panawen—Dumtengto Aya?” Naigungloak iti timpuyog dagiti managmennamenna, mangpaspasayaat-iti-bagida, ken mangan-anag-panunot iti arinunos ti dekada ’60 ken nasapa a paset ti dekada ’70. Agsapsapulak idi iti mangpennek iti kalkalikagumak ngem diak nasarakan dayta. Idi kuan, naam-ammo ni baketko dagiti Saksi ni Jehova, ket dimngegak iti panangyadalda ken baketko. Nasarakakon ti kinapudno! Nagpabautisarak ket addaanak itan iti pribilehio nga agserbi kas misionero ditoy Ghana. Pagyamanan iti daytoy a magasin. Adu pay dagiti sabsabali a mangsapsapul iti kalkalikagumanda.
D. D., Ghana
Nupay no nalawat’ saklawen ti tema a Baro a Panawen, sinaklawyo ti nadumaduma a bennegna iti makapainteres a wagas iti sumagmamano laeng a sasao! Apresiarek no kasano ti panangadawyo kadagidiay bambanag a mainaig iti movimiento ti Baro a Panawen a din kasapulan a saan a nainkasuratan, kas iti salun-at, musika, ken pannakaseknan iti aglawlaw. Siaannad ti pannakaputar dagiti serye, ngem dina linapdan ti panangipanayag kadagiti nalawag a kinapudno a kasapulan a maammuan dagiti tattao. Interesado ti kabsatko a babai kadagiti pilosopia ti Baro a Panawen, ket patulodakto iti kopia daytoy a ruar.
R. H., Estados Unidos
Panagbara ti Daga Agsuratak kas sungbat iti kahon a “Sangalubongan a Panagbara ken Malaria” a nagparang a mainaig iti serye ti “Lubong nga Awanan Sakit—Posible Aya?” (Disiembre 8, 1993) Maysaak a sientista nga agtartrabaho iti benneg ti ekolohia, ket rumigrigat ti panagala iti takder maipapan iti isyu ti panagbara ti daga buyogen iti panagtalek. Pudno a manamnama nga adda epekto ti kumarkaro a temperatura iti intero a tay-ak dagiti animal. Ngem talaga nga adda man wenno awan ti panagbara ti daga, narigrigat manen a siguraduen. Mapagduaduaan unay ti naaramiden a panagsirarak iti nakaibasaranna nga estadistika. Patien pay ketdi ti dadduma a sientista a ti umad-adu a rukod ti carbon dioxide iti atmospera ti aktual a mangpalamiisto iti rabaw ti daga!
K. O., Inglaterra
Ti teoria a panagbara ti daga ket nailawlawag a naimbag iti ruarmi a Setiembre 8, 1989, ket pudno a medio kontrobersial dayta. Gapuna, ti ababa a salaysaymi ket saan a panangipabigbig iti daytoy a teoria no di ket maysa a sierto a pakdaar no aniat’ mapasamakto no talaga a mapasamaken ti panagbara ti daga.—ED.