Apay nga Agbangon Babaen ti Kayo?

BABAEN TI KORESPONSAL TI AGRIINGKAYO! IDIAY JAPAN

GUMILAPGILAP kas iti pirak a siksik ti ikan iti saan unay a nabara nga init idiay umamianan a laud a Russia isut’ 22 a sukog-sebolias nga atep a naisaad iti tuktok ti naaramid iti kayo a simbaan. No matmatan iti as-asideg, makita ti rinibu a baldosa a kayo ti naikalupkop kadagiti atep, a daanen gapu iti panaglabas ti panawen. Iti gistay tallo gasuten a tawen, daytoy a pasdek a naaramid iti kayo iti isla ti Lake Onega ti nanganduren iti nakaro a kalam-ek iti pagilian. Siuulimek a paneknekanna ti nakaskasdaaw a kinalagda ti kayo.

Dadduma a pasdek ti mangted pay iti nabilbileg a testimonia. Masarakan iti intero a makin-amianan nga Europa dagiti istruktura a naaramid iti kayo a nabayagen a maus-usar. Kas pagarigan, makita pay laeng a naintar kadagiti away ti gapuanan-ima dagiti taga Norway nga immay nangipakita iti laingda nga agbangon iti pasdek a naaramid iti kayo idi agarup maika-12 a siglo. Idiay Inglaterra, maysa a kayo a pasdek iti asideg ti Ongar, Essex, a nabangon idi agarup 1013 ti mangan-andur pay laeng iti nakaro a panniempo. Ngem ti kasla kabayaganen kadakuada amin isut’ templo a naaramid iti kayo idiay Japan a sinigsiglon ti kabayagna.

Ti Kabayaganen a Pasdek a Naaramid iti Kayo

Kasano a posible a daytoy naaramid iti kayo a Horyuji Temple ket agtalinaed iti kasta a kabayag? Kangrunaanna, maigapu iti ekselente a pannakaammo dagiti allawagi idi damo maipapan iti kayo. Ammoda no ania a kayo ti pilien ken ania a paset ti kayo ti mausar agpaay iti espesipiko a pakausaran. Ti napilida iti daytoy a templo isut’ hinoki (cypress ti Japan), nga agbiag iti agarup sangaribun a tawen sakbay a napukan.

Ti maestro allawagi a ni Tsunekazu Nishioka, a nabiit pay a pimmusay, ti nangbusbosen iti adu a tawen ti biagna a nagtrabaho kadagiti pannakatarimaan ti templo. Kinunana a dagiti lansa​—a ti pannakaaramidda ket umasping iti kampilan a samurai, a nangusar iti maulit-ulit a wagas ti panangpitpit ken pananggugor​—ti addaan met iti napateg a paset iti kinapaut ti templo. Iti trabaho a panangtarimaan, nausar dagiti daan a lansa agsipud ta, kas iti kinunana, “dagiti moderno a lansa saanda nga agpaut iti 20 a tawen.”

Mabalin a damagen ti dadduma no talaga a 1,300 a tawenen ti Horyuji Temple, tangay 35 a porsiento iti dayta ket nasukatanen ita a siglo. Nupay kasta, adu a kangrunaan nga adigi, kangrunaan nga awanán, ken duag ket bin-ig a dati a kayo. Kinuna ni Nishioka: “Ammok nga agpautto ti templo iti 1,000 manen a tawen.”

Babaen ti kayo a kastoy ti kalidadna nga agtubo iti isuamin nga aglawlawda, isu met la a napatanor dagiti Hapones idi ugma ti panagayat iti kayo. Uray ita, iyanninaw dagiti balayda a daytoy a panagayat ket nayallatiw.

Pagtaengan Dagiti Hapones

Iti uneg ti balay, kaaduan a mausar ket kayo, ngem saan a napinturan. Dagiti adigi, ruangan, muebles, ken dadduma pay, ket nabarnisan tapno makaallukoy ti natural a binggas ken kolorda. Awan a pulos ti barnis dagiti kayo nga andamio iti beranda. Dagiti di nakatam a kayo ti mangted iti natural a pannakayasping dagiti dadakkel ken babassit a kayo iti hardin. Ti resultana ket panagtutunos ken kinatalinaay imbes a pakaguyugoyan.

Kunaen ti adu a Hapones a daytoy ti kita ti balay nga ar-arapaapenda a matagikua. Nupay kasta, ti nasayaat a kalidad ti kayo a pangbangon iti kasta a balay ket nangina unay para iti ordinario a trabahador. Agpapan pay iti dayta, kaykayat dagiti Hapones ti mangusar iti kayo no kabaelanda agsipud ta insuro ida ti historia a malaksid iti kinapintasna, ti kayo ket maibagay iti aglawlawda, a masansan nga apektaran kadagiti ginggined, bagyo, nakadagdagaang a kalgaw, ken nakaro a kalam-ekna.

Ti kayo ket matarigagayan kadagiti pagilian a masansan a maginggined, tangay agirig ken aggan-ay latta dayta no madayyeg idinto ta dagiti materiales a kas iti bato ket agbirri. Ti kayo ket addaan met iti nakaskasdaaw a pakabigbigan a mangtaginayon iti agneb ken insulasion. Agpapan pay iti tudo ken kinaagneb idiay Japan manipud Hunio agingga iti Agosto, saan a marunot ti balbalay. Makibagay ti kayo ken makaipaay iti bang-ar iti daytoy a tiempo agsipud ta maagsepna ti agneb manipud angin ken kalpasanna agmaga. Kaskasdi, makaay-ayo ti kayo iti ordinario a tao iti ad-adu pay a rason.

Ti Kinapintas ti Kayo

Iti intero a lubong, kaykayat ti kaaduan a tattao ti kayo maigapu iti itsurana. Ilawlawag da Albert Jackson ken David Day iti Collins Good Wood Handbook-da: “Tangay ti kayo ket produkto ti nakaparsuaan, tunggal pedaso ket naisangsangayan. Tunggal seksion ti kayo a maala manipud puonna, wenno uray pay manipud iti isu met la a tabla, ket naiduma. Mabalin nga addaan iti isu met la a kinalagda wenno kolor, ngem saan nga isu met la ti binggasna a padron. Daytoy a panagduduma ti pakabigbigan, kinalagda, kolor, ken pakausaran ken uray pay angotna ti mamagbalin iti kayo a makaay-ayo unay.”

Apay a nagadu ti kinanadumaduma a makita iti binggas ti kayo? Bueno, maysa ket, tangay dadduma a kayo ket mabalin a diretso ti binggasna, dadduma mangpormada iti bugkal a binggas, ken kaskasdi a ti dadduma ket mangpataud iti allo-allon wenno kulotkulot a binggas. Kalpasanna, bayat a dumakkel dagiti kayo masansan nga agtiritir wenno agbalbaliw ti direksion ti idadakkelda, mangpataudda kadagiti sanga, ken sumrek-rummuar dagiti insekto. Amin dagitoy ti mangpataud iti makapainteres a padron. Kanayonanna, ti padron ket sabasabali ti itsurana sigun iti direksion ti pannakaputed ti kayo. Maysa a lumabbaga ti kinakayumanggina a kayo a napukan tapno napatpaták ti padron ti gistay nangisit nga uritna ket napanaganan ti zebrawood iti dadduma a pagilian ken tigerwood iti dadduma.

Ti mangpapintas pay iti kayo isut’ nadumaduma unay a kolorna. Saan nga amin a kayo ket kayumanggi. Ti nangisit-tengngana a kayo ti ebony ket agtaud idiay India ken Sri Lanka, ti nalabbaga agingga ti lila-kayumanggi a camwood ket agtaud iti Makinlaud nga Africa, ket ti natayengteng-labbagana a mahogany ket manipud Sentral ken Sud America. Ti napaták a kolor kahel-nalabbaga a brazilwood, a no maganggangan ket agbalin a nakalablabbaga-kayumanggi ket agtaud iti Brazil. Berde ti dadduma a kayo, ken kolor rosas ti dadduma. Ti Alaska ket mangipaay iti nalusiaw a duyaw a kayo ti duyaw a sedro, ken ti sycamore ti Europa ket naluslusiaw. Ti kalulusiawan a kolor isu dagiti whitewood, a nakaluslusiaw a gistay awanen kolorna.

Ti makaallukoy pay iti adu a tattao isut’ angot ti kayo. Maysa a nabanglo a kayo isut’ juniper, nga inusar dagiti allawagi ni Solomon tapno aramiden a suelo ti templo. (1 Ar-ari 6:15) Nalabit ti angot ti kayo a juniper ti mayangin ken mamin-ano a mailaok iti [angot ti] insienso. (2 Cronicas 2:4) Agdindinamag ti juniper saan laeng nga iti kinabanglona no di ket iti kinalagdana ken di bukboken.

Adu, nagadu pay ti makuna kas pammadayaw iti kayo. Nagadu ti pakabigbiganna isu a mabalin a panunotentayo no adda ngata pangpilawan iti dayta.

Ti Sagut a Kayo

Pudno, saan nga amin a kayo ket makalasat iti panangraut ti peste, wenno pannakarunot wenno agpaut iti ginasut a tawen. Ti kangrunaan a pakaseknan iti panagbangon iti kayo isut’ apuy. Kaskasdi, iti nakaro a bara in-inut a mapuoran ti nadagsen a kayo, in-inut a mapukaw ti kinalagdana, ken mabaybayag a marba ngem asero. Nupay kasta, sumagmamano a balay ita ti addaan iti kadaanan a kita ti nadagsen a kayo nga awanán ken adigi. Isu a masapul a sipapartak a panawan ti maysa a tao ti balay a mapupuoran.

Ti kayo ket saan a nalaka, narukop a material a pagbangon. Imbes ketdi, ti kayo a siaannad a mapili ken mataming ket agbalin a nasayaat-ti-insulasionna a pasdek a mausarto iti ginasut a tawen. Kuna ti dadduma nga autoridad a saan a marunot no annadantay nga usaren dayta. Pudno man dayta wenno saan, ti kayo ket maysa kadagiti kasayaatan a materiales a pagbangon nga inted ti Namarsua kadatayo.

[Ladawan iti panid 17]

Dagiti sukog-sebolias nga atep a naisaad iti ngatuen ti kayo a simbaan idiay isla ti Lake Onega

[Credit Line]

Tass/Sovfoto

[Dagiti ladawan iti panid 18]

Ti kayo a Horyuji Temple idiay Japan