Manipud Managbasatayo
Insalakan ti Agriingkayo! Sumagmamano a tawenen ti napalabas (Mayo 8, 1984), insingasing ti Agriingkayo! a pagsasaritaan ti tunggal pamilia ti aramidenda no adda uram ken regular nga agensayoda iti aramidenda no adda uram. Sinurotmi ken ni lakayko daytoy a balakad. Itay Enero daytoy a tawen, nagundawayanmi nga inaramid ti implanomi a panagsanay idi nariingak a maur-uram gayamen ti umuna a kadsaaran ti balaymi. Inaramid ti tunggal maysa kadakami ti inensayomi ket nakaruarkami a sitatalged. Idi laeng a makapagyamanak iti kasta unay iti artikulo ti Agriingkayo!
G. E., Alemania
Kakaisuna a Neutral Dagiti Saksi? Kinuna ti ruaryo a Mayo 8, 1995 (“Daytat’ Saanen a Sekreto”): “Dagiti laeng Saksi ni Jehova ti nangtaginayon iti neutralidadda ken nagkedked a mangsuro wenno nikaanoman makipaset iti pannakigubat.” Idi Gubat Sangalubongan II, kadagiti 11,996 a lallaki a nagkedked a makigubat, 940 laeng ti Saksi ni Jehova. Siak a mismo ket nagkedked maigapu iti konsiensiak. Ti sao a “laeng” iti kinunayo ket nausar a mangted iti di umiso a kapanunotan a dagiti laeng Saksi ni Jehova ti mangal-alagad iti daytoy a pammati.
P. B., Estados Unidos
Ammomi a nagkedked ti sumagmamano nga indibidual a makipaset iti gubat, ket binigbigmin daytoy kadagiti publikasionmi. (Kitaenyo ti “Agriingkayo!” a Setiembre 8, 1987, panid 7.) Nupay kasta, ti mapagsusupiatan nga isyu espesipiko a tuktukoyenna ti pannakapaay “dagiti manamati a Katoliko ken Orthodox” a mangtaginayon iti neutralidad idiay Rwanda, Liberia, dagiti Balkan, ken dadduma a lugar a nabiit pay a pagdadangadangan. Kadagiti narelihiosuan nga organisasion, dagiti laeng Saksi ni Jehova ti kanayon a nangtaginayon iti neutral a takder.—ED.
Seminar Kadagiti Ospital Pagyamanan unay iti artikulo a “Dagiti Seminar a Mangpasayaat ti Relasion Dagiti Doktor ken Dagiti Saksi ni Jehova.” (Marso 22, 1995) Agyamanak unay iti Hospital Liaison Committee. Agtawenakon iti 81, ken nablo ti padingpading ken abagak bayat ti kaawanko iti balay. Adda idiay ospital ti lokal a komite 30 a minuto sakbay a dimtengak. Tangay awan kabagiak iti dayta a lugar, maysa kadagiti kakabsat ti nangbantay kaniak kabayatan ti operasion. Anian a bang-arko! Ti urnos a HLC ket pudno a bendision manipud ken Jehova.
A. W., Estados Unidos
Dagiti Peggad ti Panagjogging Maysaak a regular a managtaray. Maigapu iti artikuloyo a “Tagiragsakenyo ti Panagjogging—Ngem Agannadkayo Kadagiti Peggad!” (Marso 22, 1995), sigurado nga adu kadagiti padak a Kristiano ti mangmatmat kaniak a saan natimbeng. Madanaganak met di la ket ta adu ti agmadinton nga agtaray maigapu iti negatibo a panangilawlawagyo. Dagiti managtaray ket saan a nalaka a maatake iti puso a kas ti imbagayo. Ket tumaud dagiti endorphin iti utek saan a kadagiti masel ti bagi a kas iti nakunayo.
C. D., Estados Unidos
Saanmi a panggep a padaksen ti panagtaray. Binigbigmi dagiti gunggona ti panagehersisio ngem pinaregtami dagiti managbasa nga agbalinda a natimbeng ken dida piliten ti bagida iti nalablabes ngem ti nainkalintegan a limitasion. Adu pay a panagsirarak ti rumbeng nga aramiden sakbay a maammuan no kasano kaadu a peggad ti salun-at ti mabalin a parnuayen ti panagtaray iti nawatiwat a distansia ti sumagmamano a tao. No maipapan kadagiti endorphin, pasingkedan ti “The New Encyclopœdia Britannica” a “naiwarasda kadagiti naisangsangayan a padron iti intero a sistema nerbio.” Maipapan iti peggad ti pannakaatake ti puso, bigbigen ti “The Medical Post” a ti naganetget a panagehersisio pakapuyenna ti intero a peggad ti kellaat a pannakaatake ti puso; nupay kasta, kunaenna nga adda “dakdakkel a peggad agpaay ti managehersisio kabayatan ti tiempo ti aktual a panagehersisioda.”—ED.
Panagkolekta iti Selio Nagustuak ti artikulo a “Philately—Makaipamaysa a Paglinglingayan ken Negosio.” (Enero 8, 1995) Kumbinsidoak nga awan ilaklaksid ti Agriingkayo!—uray dagiti selio. Agkolkolektaak kadagiti selio kas paglinglingayak ket patiek a ti artikulo ket kompleto unay. Pagyamanan kadagiti makagunggona a singasingyo.
R. C., Venezuela