Umdas a Taraon Para iti Amin!
BABAEN TI KORESPONSAL TI AGRIINGKAYO! IDIAY BRAZIL
POSIBLE a tagiragsaken ti nawadwad, naimas a taraon ngem kaskasdi nga adda kinaliday. Tapno adda pudno ken napaut a kinaragsak, adda pay banag a kasapulan—naespirituan a taraon. Kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.”—Mateo 4:4.
Iti kasumbangirna, agbunga iti naespirituan a bisin ti panangilaksid iti Sao ti Dios, kas naipadto idiay Amos 8:11: “Ipaw-itkonto ti bisin ditoy daga, saan a bisin iti tinapay, wenno waw iti danum, no saan ket a panagdengngeg kadagiti sao ni Jehova.” Nupay kasta, maliklikan ti naespirituan a malnutrision. Kinuna ni Jesus: “Naragsak dagidiay sipapanunot iti naespirituan a kasapulanda . . . Naragsak dagidiay mabisbisin ken mawaw iti kinalinteg, yantangay mapennekdanto.” (Mateo 5:3, 6) No kasano a ti bagitayo ket penken ti nasustansia a taraon nga umiso ti kaaduna, pabilgen ti nasustansia a naespirituan a taraon ti pammati ken namnamatayo agpaay iti masanguanan. Ania a kita ti lubong ti inanamaentayo?
Nawadwad a Taraon Para iti Amin
Panunotenyo laengen ti maysa a lubong nga addaan iti aglaplapusanan a naimas ken nasustansia a taraon. Maysa a lubong nga awan dagiti gubat, didigra, wenno kinadaksanggasat a mamataud iti panagbisin wenno malnutrision, a mangpakapuy wenno mangpaliday iti tattao. Awanton dagiti awanan-pagtaengan wenno awanan-panggedan a tattao nga agpannuray laeng iti mairasrasion wenno maipadawat, ket dinton piliten ti nakanginngina a presio dagiti tattao a mangan laeng iti aniaman tapno bussogenda ti tianda. “Addanto kinaruay ti bukel iti daga; addanto panaglaplapusanan agingga iti tapaw dagiti bantay.” (Salmo 72:16) Ngem kasano a dumteng daytoy? Asino ti mangrisut ti parikut iti malnutrision?
Siaayat nga asikasuento ti Namarsuatayo ti kasapulan ti tao a maitutop a taraon. Uray pay ti klima ti daga ket natimbengto, a mangipanamnama nga awanton ti pannakadadael dagiti apit. “Iti biangna, ni Jehova itdennanto ti naimbag, ket ti dagatayo pataudennanto ti bungana.” (Salmo 85:12) Kasta met, nupay kabaelan ti daga ti mangpataud iti umdas a taraon, ti Pagarian ti Dios laeng ti mangipatingganto iti kinaagum ken panangilupitlupit, a pakaigapuan ti di umiso a pannakaiwaras [ti taraon], malnutrision, ken rigat.
Wen, siguraduento ti nailangitan a gobierno ni Jehova nga aniaman a mausar a sistema ti agrikultura ken transportasion ket mangipaayto iti nasustansia a taraon iti lugar a pakasapulan iti dayta. Dinto pabaknangen ti administrasion ti Pagarian ti sumagmamano laeng a tattao ket baybay-an ti kaaduan a marigatan a mangged. Imbes a panagleddaang ken kinaawan ti namnama, mangyegto dagiti bendision ti Pagarian iti rag-o a maiparangarang iti dakkel a rambak dagiti naimbag a bambanag a naipadto idiay Isaias 25:6: “Iti daytoy a bantay, ni Jehova dagiti buybuyot agaramidto kadagiti amin nga inilin-ili iti maysa a rambak dagiti nalukmeg a banag, maysa a rambak dagiti arak iti rabaw dagiti aributed, dagiti nalukmeg a banag a napno iti pata.”
Ita, darepdepenyo nga awanton iti agnanayon ti mannakisalisal, makabannog, di mannakipagrikna nga estilo ti panagbiag. Awanton ti di nasayaat pannakataraonna wenno masakit. Ngarud, no talaga a kayatyo a tagiragsaken ti biag iti dayta a baro a lubong, ipangagyo dagiti sasao ni Jesus: “Agtrabahokayo, saan a maipaay iti taraon a madadael, no di ket maipaay iti taraon a mataginayon maipaay iti biag nga agnanayon.”—Juan 6:27.