Addanto Natalged a Taraon ti Amin

MAKAPARAGSAK ti mangan iti natalged a taraon. Ngem kas nakitatayon, saan a kanayon a nalaka a magun-odan ti kasta a taraon. Ti nakarkaro pay, nakabasbassit ti taraon ti minilion isu a didan pampanunoten no umdas ti kinatalged wenno makapasalun-at ti taraonda. Makumikomda nga agbirok iti umdas a taraon tapno agbiagda laeng. Talaga kadi nga inranta ti Dios a kastoy ti kasasaad ti bambanag?

Panunotem. Idi insaad ti Dios ti lalaki ken babai ditoy daga, adda kadi aniaman a pakadanaganda maipapan iti taraon? Awan a pulos! Kastoy ti kuna ti salaysay iti libro ti Genesis iti Biblia: “Ni Jehova a Dios pinagtubona iti daga ti tunggal kayo a makaay-ayo iti panagkita ti maysa ken nasayaat a pagtaraon.” (Genesis 2:9) Isu nga addaan idi da Adan ken Eva iti makaay-ayo ti kinanadumadumana a taraon agraman ti nawadwad ken di maibus a suplay. Ammo ti Dios a nangparsua kadakuada ti eksakto a kasapulanda a nutrision; ammona met no ania ti mangparagsak kadakuada. Siempre, awantayo iti minuyongan ti Eden ita. Ngem binalbaliwan kadi ti Dios ti orihinal a panggepna iti sangatauan ken iti daga?

Adda natalged a pamatiantayo nga asidegen a sagrapen ti amin nga adda ditoy daga ti aglaplapusanan a makapasalun-at ken natalged a taraon! Daytoy a panamati ket mabalin a nabileg a tulong kadatayo tapno agtalinaed a natimbeng ti panangmatmattayo ita iti kinatalged ti taraontayo. Ti kasta a namnama, no sigurado ken mapagtalkan, mabalin a tulongannatayo a mangliklik kadagiti nakaro a pakakumikoman wenno aglablabes a panangmatmat.

Apay a masiguradotayo nga asidegen a naidumanto ti kasasaad ti biag? Ammo dagiti napasnek nga estudiante iti Sao ti Dios nga agbibiagtayon “kadagiti maudi nga aldaw” daytoy a sistema ti bambanag. Iti adu a benneg ti biag, ti agdama a sistema ket iturturayan ti kinasirib ti tao, isu a saan a sigurado ken agpannuray iti panangpadpadas ti pananggun-od iti kasayaatan a resulta. Saanda met unay a sigurado no natalged wenno makadangran dagiti pamay-an ti panangproseso iti taraon. Ti kasta a panagduadua patanorenna ti panagbuteng, di panagtutunos, ken di panagkaykaysa.​—2 Timoteo 3:1-5.

Inkari ti Namarsua iti sangatauan a sukatanna daytoy agdama a sistema ti bambanag iti naan-anay a baro a sistema. Matungpalto ti orihinal a panggepna​—a ti intero a daga ket agbalin a paraiso a kas iti minuyongan ti Eden, a mapno iti naragsak ken nasalun-at a natauan a pamilia. Mapnonto ti intero a daga iti mamagkaykaysa a puersa ti naan-anay a kinasirib ti Dios. (Isaias 11:9) Awanton dagiti mapagduaduaan a kinasirib ti tao. Ti baro a sistema nga aramiden ti Dios ikkatennanto ti amin a panagduadua maipapan iti kinatalged ti taraontayo. Saan kadi a nainkalintegan a kunaentayo a ti Dios a namarsua iti tattao maawatanna met ti nutrision a kasapulantayo?

Naan-anay a Taraon Manipud iti Namarsua

Naglaon ti Biblia kadagiti nalawag a padto maipapan kadagiti kasasaad ti biag iti umay a sistema ti bambanag. Insurat ni mammadto nga Isaias: “[Ti Dios] sigurado nga itednanto ti tudo maipaay iti bin-im a dayta ti pangmulam iti daga, ken tinapay kas bunga ti daga, nga agbalinto a nataba ken nalanit. Dagiti dinguenmo agarabdanto iti dayta nga aldaw iti maysa a nalawa a pagaraban. Ket ti bakbaka ken dagiti nataenganen nga asno a mangtaltalon iti daga mangandanto iti taraon a natemplaan iti sorel, a naitaep babaen iti suplad ken iti tinidor.”

Kuna pay ti padto ni Isaias: “Ni Jehova ti buybuyot pudno unay nga iyaramidannanto dagiti amin nga ili, iti daytoy a bantay, iti maysa a bangkete dagiti nataba unay a putahe, maysa a bangkete ti arak a napagtalinaed kadagiti ared-ed, dagiti nataba unay a putahe a napno iti pata, iti arak a napagtalinaed kadagiti ared-ed, a nasagat.” Kastoy ti panangipatarus ti The New American Bible iti dayta maudi a sasao, “maysa a piesta dagiti nasustansia a taraon ken kaimasan nga arak, nataba, nasustansia a taraon ken puro, kaimasan nga arak.”​—Isaias 25:6; 30:23, 24.

Makaay-ayo kadi dayta kenka? Patalgedan kadatayo ti padto ni Isaias nga amin nga agbiag iti sidong ti baro a sistema ti Dios addaanto iti aglaplapusanan a pisikal a taraon. Natalgedto kadi dayta a kanen? Sigurado. Patalgedan ti sabali pay a padto a ti ili ti Dios “agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.” (Mikias 4:4) Ti kasta a naan-anay a kinatalged ket ipanamnama ti Mesianiko a Pagarian ti Dios a mangituray iti amin a daga iti asidegen a masanguanan.​—Isaias 9:6, 7.

Awanton ti panagduadua no natalged wenno saan ti taraon. Imbes ketdi, maragsakantayto amin a mangibaga iti aniaman a lenguahetayo: “Mangankay laeng, dikay agbabain.”

[Blurb iti panid 12]

Asidegen a sagrapen ti amin nga adda ditoy daga ti aglaplapusanan a makapasalun-at ken natalged a taraon

[Ladawan iti panid 10]

Inkari ti Dios ti natalged ken makapasalun-at a taraon para iti amin