Asidegen a Maaddaan ti Amin iti Makapasalun-at a Taraon!
ADDA dagiti praktikal a maaramidam tapno nataltalged ti taraonmo. Ngem adu a banag ti dimo makontrol. Kas pagarigan, dimo personal a masukimat ti amin a taraon sakbay a gatangem wenno isaganam. Mabalin a nasken a gumatangka iti taraon a naproseso ken naggapu iti adayo. Nalabit ti dadduma a gatangem a taraon ket kontaminado met kadagiti makadangran a kemikal nga adda iti angin, danum, wenno daga.
Iti report a napauluan iti “Foodborne Disease Control: A Transnational Challenge,” kinuna dagiti opisial ti World Health Organization a ti dadduma a problema maipapan iti kinatalged ti taraon “ket saan a masolbar a bukbukod dagiti nasional a gobierno; kasapulanda ti tulong ti amin a pagilian.” Sangalubongan a problema dagiti sakit a maigapu iti kontaminado a taraon!
Natural laeng nga adu ti mangkuestion no apay a dakkel ti kompiansami a mangibaga nga asidegen a maaddaan ti amin iti makapasalun-at a taraon. Inkari ngamin “ni Jehova, ti Apo iti intero a daga,” a solbarenna dagiti problema ti tao maipapan iti taraon. (Josue 3:13) Nalabit adda dagiti mangibaga a gapu kadagiti kontaminado a taraon, saan a mapagtalkan ti Dios. Ngem panunotem daytoy: No baybay-an ti waiter a mabangles ti nasayaat a taraon, maiparbeng kadi a ti chef ti pabasolem? Siempre saan.
Umasping iti dayta, saan a ti Namarsua no di ket ti tattao ti makagapu a madaddadael dagiti nasayaat a taraon a patauden ti daga. Ti iyaadu ti kontaminado a taraon ket problema a pinataud ti tao. Inkari ti Dios a ‘dadaelenna dagidiay mangdaddadael iti daga.’—Apocalipsis 11:18.
Kinapudnona, napaneknekanen a maseknan ti Dios iti kalidad ti taraontayo. Isu ti nangaramid iti daga ken iti kaykayo a saan laeng a “makaay-ayo iti panagkita ti maysa” no di ket “nasayaat [pay] a pagtaraon.” (Genesis 2:9) Uray kalpasan a ti sangatauan ket naapektaranen iti sakit, nangted ni Jehova iti ilina kadagiti espesipiko a pagannurotan tapno masalakniban ti taraon ken bagida.—Kitaem ti kahon a “Dagiti Pagannurotan iti Salun-at.”
Ania a kita ti taraon ti kayat ti Dios a tagiragsakentayo? Kuna ti Biblia: “Pagtubuenna dagiti berde a ruot maipaay kadagiti animal, ken mulmula nga usaren ti sangatauan, tapno mangparnuay iti taraon manipud iti daga, ken arak a mamagrag-o iti puso ti mortal a tao, tapno pagsilnagenna ti rupa babaen iti lana, ken tinapay a mangsustento iti mismo a puso ti mortal a tao.” (Salmo 104:14, 15) Kuna pay ti Biblia a “tunggal aggargaraw nga animal a sibibiag mabalin nga agserbi kas taraon.”—Genesis 9:3.
Maipapan iti masakbayantayo, inkari ti Saona: “Sigurado nga itednanto ti tudo maipaay iti bin-im a dayta ti pangmulam iti daga, ken tinapay kas bunga ti daga, nga agbalinto a nataba ken nalanit. Dagiti dinguenmo agarabdanto iti dayta nga aldaw iti maysa a nalawa a pagaraban.” (Isaias 30:23) Wen, dagiti makapadanag a paulo ti damdamag ket masukatanton iti: “Makapasalun-at a taraon agpaay iti amin!”
[Blurb iti panid 8]
Inkari kadatayo ti Namarsua ti naragsak a masakbayan nga aduan iti nasayaat a taraon
[Kahon iti panid 8]
“DAGITI PAGANNUROTAN ITI SALUN-AT”
Agarup 3,500 a tawenen ti napalabas, inawat ti Israel ti Mosaiko a Linteg. Dayta a Linteg ti nangsalaknib kadagiti Israelita iti adu a sakit a maigapu iti kontaminado a taraon. Usigem dagiti sumaganad nga instruksion:
● Liklikam dagiti narugit nga alikamen ken pagkargaan iti taraon a naisagid iti natay nga animal: “Aniaman a basehas nga adda pakausaranna maikabilto iti danum, ket narugitto agingga iti rabii ket kalpasanna nadalusen.”—Levitico 11:31-34.
● Dika mangan iti basta natay lattan nga animal: “Dikay mangan iti aniaman a natayen a bagi.”—Deuteronomio 14:21.
● Kanem dagiti tedda a taraon iti las-ud ti ababa a tiempo: “Iti sumaganad nga aldaw mabalin met a kanen ti matedda iti dayta. Ngem ti matedda iti lasag ti sakripisio iti maikatlo nga aldaw mapuoran iti apuy.”—Levitico 7:16-18.
Nasdaaw ni A. Rendle Short, M.D. a ti Mosaiko a Linteg—no idilig kadagiti agdama idi a linteg dagiti kaarrubada a nasion—ket naglaon iti “nainsiriban unay ken nainkalintegan a kodigo dagiti pagannurotan iti salun-at.”