Natalged Kadi ti Taraonmo?
“Impaserra ti Germany ti Maysa nga Eskuelaan Gapu iti E. Coli.”—REUTERS NEWS SERVICE, GERMANY.
“Gapu iti Toge Nagwaras Manen ti Salmonella iti Lima nga Estado.”—USA TODAY.
“Nakadanonen iti 9 a Probinsia ti Karne ti 6 a Baka a Napakan iti Garami a Kontaminado iti Radiasion.”—THE MAINICHI DAILY NEWS, JAPAN.
DAGITA ti paulo ti damdamag iti las-ud ti dua a lawas itay napan a tawen. Pinattapatta dagiti managsirarak a kada tawen, agarup 30% kadagiti umili dagiti nabaknang a pagilian ti agsakit gapu kadagiti kontaminado a taraon.
Ania ti epekto kenka dagita a damag? “Madanagan ken makaungetak pay ketdi,” kinuna ni Hoi a maysa nga ama idiay Hong Kong. “Dua ti anakko ket maseknanak no kasano ken sadino a naisagana ti taraonda.”
Kadagiti napangpanglaw a pagilian, tinawen a minilion ti matmatay—ubbing ti kaaduanna—iti saksakit a maigapu kadagiti kontaminado a taraon ken danum. “Ngilngilawen, matudtuduan, maang-anginan, ken mataptapokan dagiti taraon kadagiti tiendaan ditoy,” kuna ni Bola a taga-Nigeria. “Mabutengak no makabasa wenno makangngegak maipapan kadagiti sakit a maigapu iti taraon. Kayatko a salakniban ti pamiliak.”
Posible kadi a maprotektaram ti pamiliam iti kontaminado a taraon? Kuna ti Canadian Food Inspection Agency: “No makastrek dagiti kontaminado a taraon kadagiti groseriatayo, agdinamag dayta. Ket rumbeng laeng. Ngem ti kontaminado a taraon a mangyeg iti sakit ket mabalin met a maigapu iti ar-aramidentayo—wenno ditay ar-aramiden—kadagiti mismo a kosinatayo.”
Ania ti maaramidam tapno masalaknibam ti pamiliam kadagiti sakit a maigapu iti taraon? Usigentayo ti uppat a pamay-an tapno nataltalged ti taraonmo.
[Kahon iti panid 3]
SIASINO TI AGPEGPEGGAD?
Ti dadduma a grupo a nakalaklaka a makaptan iti sakit a maigapu iti kontaminado a taraon ket pakairamanan dagiti:
● Ubbing nga awan pay lima ti tawenna
● Masikog
● Agtawen iti nasurok a 70
● Nakapuy ti resistensiana
No sika wenno ti siasinoman a kaduam a mangmangan ket maysa kadagita, naan-annadka koma iti taraon nga isaganam, idasarmo, ken kanem.
[Credit Line]
Reperensia: New South Wales Food Authority, Australia.