Manipud Managbasatayo

Menopause Naimpusuan ti panagyamanko kadagiti serye ti “Nasaysayaat a Pannakaawat iti Menopause.” (Pebrero 22, 1995) Agtawenak iti 43, ket makapnek dagiti sungbatyo iti salsaludsodko. Dua a babbai a katrabahuak ti nagkiddaw iti kopia, ngem ti la naaramidak ket ipabulod ti bukodko a kopia. Naibusan ngamin ti kongregasionmi iti suplay dayta a ruar!

M. H. S., Brazil

Linukatan dagiti artikulo ti panunot ken pusok tapno maawatak no ania a kita a panagbalbaliw ti mapaspasaran ni nanangko. Manginanamaak a maitultuloyko a maawatan daytoy a panagbalbaliw iti biagna [tapno] ad-adda a makatulongak.

A. K., Estados Unidos

Agtawenak iti 47, ket sakbay a naawatko ti ruar ti Agriingkayo!, awan pay pannakaammok maipapan iti tema, nupay nagpakonsultaakon kadagiti doktor. Tinulongandak a makaawat a natural laeng dagitoy a panagbalbaliw. Sisasaganaakon a mangsaranget kadagiti problema.

E. M., Sierra Leone

Nabiit pay a tinabunuak ti tallo-oras a seminar maipapan itoy a tema. Inyurnos dayta dagiti departamento ti edukasion iti dua a kadakkelan nga ospital. Makaisuro unay ti programa, ngem ad-adut’ nasursurok iti 30 minuto a panagbasak iti Agriingkayo! ngem ti nasursurok iti tallo oras a seminar.

J. B., Estados Unidos

Il-iliwen nga Artikulo? Maysaak a balasitang nga agtawen iti 11. Nasarakak a saankayon a mangipabpablaak kadagiti serye ti “Agimtuod Dagiti Agtutubo . . .” Apay ngay? Talaga a tagtagiragsakek idi dayta a paset. Dadduma kadagiti saludsod ket agaplikar kaniak, ket kaykayatko ida a basaen! Dayta ti damo a kitaek no maawatko ti Agriingkayo! Siguradoak a kasta met ti panagrikna ti dadduma nga ubbing. Ipablaakyonto kadi dayta a paset iti masanguanan?

E. K., Estados Unidos

Agtultuloy a maipablaak ti “Agimtuod Dagiti Agtutubo . . .” iti maminsan kada bulan. Agparang dayta iti ruar a napetsaan maika-22 ti kada bulan. Manipud nangrugi dagiti serye idi 1982, nasurok a 300 nga artikulo ti naipablaaken kadagitoy a serye. Paregtaenmi dagiti agtutubo a managbasami a repasuenda ti dadduma kadagitoy a daan nga artikulo. Nupay kasta, namnamaenyo ti agtultuloy a panaginteresmi kadagiti parikut dagiti agtutubo.​—ED.

Inkisision Iti artikuloyo a “Ti Inkisision Idiay Mexico​—Kasano a Napasamak Dayta?” (Oktubre 8, 1994), tinukoyyo ti “ari dagiti Aztec, a ni Netzahualcóyotl.” Nupay kasta, ni Netzahualcóyotl ket saan idi nga isu ti ari dagiti Aztec no di ti ari dagiti Chichimeca.

E. R. C. L., Mexico

Ni Netzahualcóyotl ket talaga a maysa a Chichimeca, saan nga Aztec. Ngem makapainteres ta dadduma a naisurat a reperensia, kas ti “Nueva Enciclopedia Cultural IEPSA,” talaga a tukoyenda isuna kas “Ari dagiti Aztec.” Kas ilawlawag ti libro a “Historia de México,” nagturay ni Netzahualcóyotl “iti aliansa a kadua dagiti Aztec,” a nangdominar idin iti umili a Chichimeca.​—ED.

Dagiti “Barayuboy” nga Agtutubo Diak mairugi-rugi nga iyebkas kadakayo ti naespirituan a bang-ar a naawatko apaman a nabasak ti artikulo nga “Agimtuod Dagiti Agtutubo . . .  Kasano a Mailintegko ti Biagko?” (Enero 8, 1995) Pinaturednak nga agkararag ken ni Jehova ken mangkiddaw iti pammakawanna kadagiti basol a naaramidak iti napalabas. Sakbay a binasak daytoy nga artikulo, aldaw ken rabii a pagladladingitan toy pusok dagitoy a basol. Adun a rabii nga agiddaak ken ipagarupko a ti panagpakamatay isu laengen ti solusion. Ita ammokon a dagiti prinsipio ni Jehova ket pakagunggonaantayo, ket pagnakemakton dagiti kamalik iti napalabas.

Q. B., Estados Unidos

Kas maysa nga agtutubo, pinanawak ni Jehova ken ti organisasionna. Nupay nagsubliakon iti ngannganin lima a tawen, mariknak pay la no dadduma a saannak pay la a naan-anay a pinakawan ni Jehova. Ita ammokon a kamaliak; bimmaaw met laengen ti nakaro, mangsidir a panagduaduak.

R. D., Trinidad