Manipud Managbasatayo

Ti Alpine Iceman Kabasbasak “Ti Misterio ti Alpine Iceman.” (Mayo 8, 1995) Aminek nga idi damo a maawatko dayta, diak ipagarup a magustuak ti temana. Ngem natakuatak a makapainteres unay ti artikulo! Apresiarek ti panangilawlawagna a di umiso ti kadawyan a panangmatmat maipapan iti “nagkauna” a tao.

J. S., Estados Unidos

Ti makaallukoy a paulona ti timmulong kaniak a mangipaima iti magasin iti tao a naam-ammok idiay tren. Iti simmuno a lawas nagkitakami manen, ket imbagana a “nangato ti kalidad” ti pannakaisurat ti artikulo ken nagsayaat ti pannakaputarna. Inawatna ti kabaruan a ruar Ti Pagwanawanan.

G. C., Japan

Menopause Kadagiti seryeyo a “Nasaysayaat a Pannakaawat iti Menopause” (Pebrero 22, 1995), nadakamatyo ti panangusar kadagiti “lana ti nateng wenno prutas, lana ti bitamina-E, ken dagiti mangpagalis a gel” kas remedio ti panagmaga ti mabagbagi ti babai. Kas maysa nga estudiante iti maudin a tawenko iti nursing, patiek a nasken nga ibagak a maysa a pamay-an a mangpaadu iti bakteria dagiti pangpagalis a nagtaud iti lana ken prutas. Nasaysayaat ngarud dagiti mailaok-danum a pangpagalis.

H. W., Estados Unidos

Apresiarenmi daytoy a kabaruan nga impormasion.​—ED.

Iti tawenkon nga 45, nangrugin nga agsagabaak iti panagbara ti bagi. Inan-andurak ida iti adun a tawen nga awan agas. Nakasangitak ngarud bayat a nariknak ti agminar a naayat a kinamanangngaasiyo babaen iti artikulo. Tinulongannak a mangawat a nasaysayaat iti menopause, ken sinungbatanna ti adu a saludsodko.

S. T. B. A., Brazil

Computer Games Nagagaranak a nangbasa iti artikulo nga “Agpaay Aya Kadakayo Daytoy nga Ay-ayam?” (Mayo 8, 1995) Kas nagannak, masuronak iti kinamanagpanuynoy ti dadduma a mangipagarup a di makadangran a pagraragsakan dagitoy nga ay-ayam. Nagadu ti magun-odan a makaisuro ken di naranggas nga ay-ayam.

K. G., Estados Unidos

Maysaak a computer software evaluator, ket nabiit pay a naikkanak iti kopia ti ay-ayam a Doom II tapno usigek. Natakuatak a mangus-usar [dayta nga] ay-ayam kadagiti demoniko a simbolo, kas iti baliktad a krus ken pentagramo. Inanamaek a maamiristo ti tattao no kasano ti kinadakes dagitoy nga ay-ayam.

R. B., Estados Unidos

Ubing a Pannakiasawa Pagyamanan iti artikulo nga “Agimtuod Dagiti Agtutubo . . . Nasapakam Unay a Nakiasawa​—Makapagballigikam Ngata?” (Abril 22, 1995) Kas manangaywan iti kongregasion, inyurnosmi a sarungkaran ti agkabannuag a pagassawaan nga agprobproblema maipapan iti panagasawada. Anian a sorpresa kaniak idi simmangpet daytoy a ruar! Dayta a talaga ti kasapulanmi a pangtulong iti dayta nga agkabannuag a pagassawaan. Inusigmi ti intero nga artikulo agraman amin a naisitar a teksto.

M. C., Brazil

Panagsukisok iti Uneg ti Baybay Apresiarenmi unay ti artikulo a “Natalged a Panangtakuat iti Lubong iti Kaunggan Dagiti Dalluyon.” (Mayo 8, 1995) Kaaw-awidmi manipud panagpasiarmi idiay Nalabaga a Baybay ket naamirismi a makatulong unay ti balakadyo. Saan la a ti nakaskasdaaw a tukok ti baybay ti natakuatanmi no di ket nakasalimetmetkam pay iti adu a kuarta!

V. C. ken K. B., Italia

Masansan nga agproblemakami ken ni lakayko maipapan iti pagpalpaliwaan ti dua a baromi. Paginteresan ni lakayko ti diving, ket nabiit pay a naglukat ti kabbaro a diving school iti lugarmi. Kalpasan a nabasak ti artikuloyo, maragsakanak ta awaten ti konsiensiak no makipasetda.

C. P., Alemania

Pannakailasat iti Komunismo Pagyamanan unay iti artikulo a “Nasurok nga 40 a Tawen iti Sidong ti Panangipawil Dagiti Komunista.” (Abril 22, 1995) Naparegtaak unay bayat a binasak. Impakitana kaniak no kasano a mangipaay ni Jehova iti panangandingay iti umiso a tiempo tapno mataginayon ti maysa a tao ti kinatarnawna.

S. A. A., Ghana