Manipud Managbasatayo

Dagiti Pamilia ti Agsolsolo a Nagannak Kaaw-awatko ti Oktubre 8, 1995 nga Agriingkayo! ket binasak ti serye a “Dagiti Pamilia ti Agsolsolo a Nagannak​—Kasanot’ Kaballigida?” Agyamanak unay kadagitoy nga artikulo. Naintiempuanda unay. Pito ket kaguduan a tawen nga agsolsoloak a nagannak, ket nakarigrigat. Adda balasangko nga agtawen iti 15 a nasukir ken rebelioso. Kasta met a saan a natalged ti kasasaad ti trabahok. Ngem agyamanak iti kaaddak iti manangandingay ken naayat a kongregasion dagiti Saksi ni Jehova. No kasapulak ti tulong iti kotsek, wenno masapul nga adda la makasaritak, kanayon nga adda sadiay dagiti naespirituan a kakabsatko a tumulong kaniak.

D. R., United States

Sipud pay idi 1978 nga agsolsoloak a nagannak. Gapu iti panagsagabak iti bipolar depression, kanayon idi a saanak a nagbalin a kasayaatan a nagannak. Uray no kasta, kanayon a dumngegak kadagiti nai-tape a magasin. Naminduan a nangngegko daytoy nga isyu, ket madama a patpatokarek dayta iti stereok. La ketdi no kanayon nga aglaon dagiti magasin kadagita a nagsayaat nga impormasion, patiek nga agballiginto ti pamiliak!

T. O., United States

Narigat nga Ay-aywen ti Dios? Maysaak nga agsolsolo a nagannak, ket idi nakitak ti akkub ti Oktubre 8, 1995 a ruar nga addaan kadagiti artikulo maipapan iti agsolsolo a nagannak, nagsangitak. Ngem ti immuna nga artikulo a binasak isut’ “Ti Panangmatmat ti Biblia: Narigat Unay Kadi a Ragpaten Dagiti Pagalagadan ti Dios?” Wen, kas ina a kasla mapapaay, dakkel a bang-ar daytoy nga artikulo. Impakitana a saanak a naabak. Gundawayko laeng a paneknekan nga ulbod ni Satanas. Pagyamanan ken Jehova itoy a nagsayaat nga artikulo!

R. N., United States

Daytat’ artikulo a kasta unay ti panangapektarna kaniak. Nakaskasdaaw a panunoten a nupay mannakabalin-amin ni Jehova, situtulok a mamakawan kadakami kadagiti naaramidanmi a pagkamkamalian. Daytoy nga artikulo ti timmulong kaniak a mangapresiar a mabalinmi a tungpalen a siraragsak dagiti pagalagadan ti Dios, nupay pasaray mapaaykami.

D. C., United States

River Blindness Nabiit pay a nangibunong ti ahensia ti gobierno kadagiti tableta a panglapped iti river blindness iti awaymi. Di nagbayag kalpasanna, naawatko ti Oktubre 8, 1995 a ruar nga addaan iti artikulo a “‘River Blindness’​—Panangparukma iti Nakaro a Saplit.” Inranudko ti impormasion kadagiti kaarrubak. Idi nakita ti maysa a trabahador ti gobierno ti artikulo, indir-ina: “Saan la a relihion ti organisasionyo!” Kasta met a nagsuskribe ti doktor iti lugarmi iti Pagwanawanan ken Agriingkayo! Adu kadagiti adda iti teritoriami ti nagkiddaw kadagiti magasin. Maragsakanda a nadakamatda ti mapaspasamak idiay Nigeria.

A. A., Nigeria

Iditarod Kabasbasak ti artikulo a “Ti Iditarod​—Sangapulo a Siglo ti Pannakaipasdekna” (Oktubre 8, 1995), ket mariknak a rumbeng nga agyamanak kadakayo iti makaisuro unay ken mamagpanunot nga artikulo! Naglawag ti panangiladawanna tapno matagiragsak ti managbasa. Kinapudnona, nariknak a kaslattay maysaak kadagiti managpataray iti dayta 1,800 kilometro a biahe! Ad-adda pay nga immuneg ti panangapresiarko ken Jehova​—a dagiti galadna agminar kadagiti parsuana, tao man ken animal.

J. H., United States

Legal a Balligi Binasak ti artikulo a “Balligi Agpaay ti Minoria​—Iti Lugar nga Addaan Panagpapada.” (Oktubre 8, 1995) Idi addaak iti high school, masapul nga agkedkedak a tumabuno kadagiti klase ti judo. Naparegtaak idi nabasak nga ilablaban dagiti kakabsat idiay Kobe daytoy nga isyu kadagiti korte tapno masalakniban ti wayawayada nga agdayaw ken ti kalinteganda a makagun-od iti edukasion. Ita ta nagapelaren ti eskuelaan iti Korte Suprema, ikarkararagko nga umawatto dagiti kakabsat iti makaay-ayo a desision.

Y. K., Japan