Manipud Managbasatayo
Panagbiag nga Agnanayon Pagyamanan kadagiti serye nga “Apay a Nakaab-ababa ti Biag?—Agbalbaliwto Pay Kadi?” (Oktubre 22, 1995) Saannak laeng a tinulongan dagitoy nga artikulo a mangtarus a nasaysayaat iti namnama nga agbalin a perpekto a tao iti paraiso a daga no di pay ket tinulongandak iti klasek a science. Iti mismo a tiempo a naipablaak dagitoy nga artikulo, adda eksamenmi maipapan iti selula—dagiti paset ken andarna. Anian a naglawag ti panangiladawanyo iti dayta! Pagyamanan iti nagsayaat a kita [ti artikulo] ken ti naespirituan a taraon iti umiso a tiempo.
B. M., Estados Unidos
Sarming Pagyamanan iti artikulo a “Sarming—Nagbiag iti Adun a Tawen Dagiti Damo a Nangaramid iti Dayta.” (Nobiembre 22, 1995) Agtartrabaho ni tatangko iti pagaramidan iti sarming, isu nga adu ti kasta idiay balaymi. Magutugotak a mangibaga a nagsayaat ti pannakaisurat daytoy nga artikulo. Diak pulos ammo a nagadu a tattao iti nadumaduma a kultura ti nainaig iti panagaramid iti sarming. Pagyamanan manen.
M. B., Estados Unidos
Pagubasan ti Hungary Iti sumagmamanon a bulan, agtartrabahoak iti seksion ti arak iti maysa a supermarket idiay Luxembourg. Isu a dakkel ti interesko a nangbasa iti artikulo a “Kuyogendakami iti Kaubasan ti Hungary!” (Setiembre 8, 1995) Nadlaw ti maysa kadagiti superbisorko, nupay kasta, a nupay umiso ti artikulo, kasla kayatyo koma nga ibaga a ti buot a tumaud kadagiti ubas (Botrytis cinerea) isu met la ti buot a tumaud kadagiti pagaramidan iti arak. Kunana a ti naud-udi a buot isut’ aktual a banag a maawagan iti Cladosporium cellare.
B. P., Francia
Umiso ti superbisoryo, ket agyamankam kenkuana iti daytoy a panangilawlawag.—ED.
Gayyem ti Dios Kayatko la nga ibaga kadakayo no kasano a nagutugotak iti artikulo nga “Agimtuod Dagiti Agtutubo . . . Tulongannakto Kadi ti Pannakigayyem iti Dios?” (Nobiembre 22, 1995) Nabayagen iti daytoy a tawen a magmagnaak iti tanap ti kinasipnget, buyogen ti panagleddaang a mangdaddadael iti nabatbati pay a panagraemko iti bagik. Awan pay idi ti turedko nga agkararag wenno agadal iti Biblia. Awan serbina kaniak idi ti pammaregta nga intukon dagiti Kristiano a kakabsatko. Idi nabasak ti artikulo, nakitak ti umuna a raya ti init kalpasan iti naunday a tiempo.
S. K., Alemania
Makaliwliwa a maammuan no kasano ti panaginteres ken ayat ni Jehova kadagiti agtutubo. Iti ababa a panagbiagko, napadasakon ti narames, nagabuso iti droga, naalísan, ken naabuso iti emosional ken sao. Naminsan a ginandatko payen ti agpakamatay. Kamaudiananna, nupay kasta, rinugiak manen ti tumabuno kadagiti Nakristianuan a gimong. Babaen ti pingetko nga agkararag ken ti iyaadanik manen ken Jehova, naisubliakon iti organisasionna. Ti Sao ni Jehova ti nangipaay kaniak iti ad-adda a talna ti panunot ngem iti aniaman a droga.
W. B., Estados Unidos
Kompetision Ti artikulo a “Ti Panangmatmat ti Biblia: Dakes Kadi ti Pannakisalip iti Isports?” (Disiembre 8, 1995) ti nangliwliwa iti sangapulo ti tawenna a barok. Inawis ti dadduma nga in-inauna ngem isuna a lallaki nga agay-ayamda iti bola. Nakarot’ panangkantiawda kenkuana a talaga a nangpaleddaang kenkuana. Binasami ti artikulo ket naliwliwakami, tangay ammomi a rumbeng a taginayonen dagiti Kristiano ti natimbeng a panangmatmat iti isports ken rumbeng a makapabang-ar ti isports, saan a makapaleddaang. Inanamaek nga amin nga agtutubotayo ti mangbasanto iti daytoy nga artikulo agsipud ta nakarangranggasen ti dadduma nga isports.
S. H., Estados Unidos
Talaga a tinulongannak ti artikulo a mangaramid iti desision maipapan iti pannakipasetko iti sports team idiay eskuelaan. Talaga a direkta dagiti kasuratan a naibinsabinsa iti artikulo. Napalalo a pannakikompetensia ti pannakiraman iti daytoy a partikular a team, tangay kadawyan nga ibaga dagiti coach nga agay-ayamka a naimbag ken mangabak. Pagyamanan iti makailawlawag nga artikulo, ket manginanamaak a tumulongto iti dadduma nga agtutubo a mangaramid iti naimbag a desision.
L. M., Estados Unidos