Manipud Managbasatayo
Babbai Idiay India Inapresiarko ti artikulo a “Dagiti Babbai iti India—Agturturong iti Maika-21 a Siglo.” (Hulio 22, 1995) Kanayon a masarakak a makaay-ayo ti India, ta addaan iti kultura a naiduma unay iti kulturak. Impakita ti artikuloyo a dumtengto ti pudpudno a pannakawayawaya dagiti babbai iti India iti sidong laeng ti Pagarian ti Dios. Segseggaak ti tiempo inton amin a babbai ti pudpudno nga ayaten ken ipateg dagiti pagraraemanda nga assawa.
W. S., British Columbia
Inlaksid ti Pamilia Agtawenak iti 14, ket nakapagsuratak tapno agyaman iti artikulo a “Ti Pamilia a Talaga a Mangay-ayat Kaniak.” (Hulio 22, 1995) Talaga a pinabilegna ti pammatik. Maysa a nagsayaat a paguadan ni Udom Udoh kadagiti agtutubo iti isuamin a lugar. Talaga nga impakitana a kabaelam nga itakderan ti kinapudno iti ubing pay unay nga edad.
A. M., Estados Unidos
Kas ken ni Udom, kalpasan a rinugiak ti panagadal iti Biblia, naipasangoak iti ibubusor. Naibaga met kaniak a pumanawak iti pagtaengan. Kalpasan ti nagadu a berbal ken pisikal a pannakaidadanes, pimmanawak. Siaayat nga inaywanannak ti maysa a panglakayen ken ni baketna. Talaga a pinabilegnak ti artikuloyo. Anian a rag-o ti agbalin a paset daytoy a naisangsangayan a sangalubongan a pamilia!
L. J., Estados Unidos
Panagbalin a Gayyem ti Dios Pagyamanan unay iti artikulo nga “Agimtuod Dagiti Agtutubo . . . Pudno Kadi a Makapagbalinak a Gayyem ti Dios?” (Hulio 22, 1995) Pinagarubosna dagiti luak. Agtawenak iti 13 ket nakaaramidak iti sumagmamano a nagdakes a bambanag. Dagiti dadduma ti nangikagumaan a mangparegta kaniak, ngem kaskasdi a marigatanak idi nga agkararag ken ni Jehova. Impagarupko no dinak ay-ayatenen maigapu iti nagadu a naglablabsingak. Impakita daytoy nga artikulo kaniak a mamakawan ti Dios ken makapagkararagak kenkuana.
J. D., Alemania
Kas ken ni Doris, a naadaw iti artikulo, mariknak a diak maikari nga agbalin a gayyem ti Dios. Agyamanak ken ni Jehova iti panangipaayna itoy a panangandingay. Tinulongannak a mangtarus a no pagbabawyak dagiti dakes nga aramidko, situtulok a mamakawan ken agbalin a Gayyemko. Mangnamnamaak a dikayto agsardeng a mangyimprenta kadagitoy nga artikulo agpaay kadagiti agtutubo.
B. M. A., España
Menopause Ay-aywananmi ti maysa a kompania ti parmasiutika a paglainganna dagiti medisina a mangtaming kadagiti sakit ken pagimbagan ti babbai. Natakuatanmi a makapainteres unay ti artikulo a napauluan “Nasaysayaat a Pannakaawat iti Menopause” (Pebrero 22, 1995), ket maragsakankami ta nagsuratkayo iti artikulo maipapan iti dayta a tema. Nupay kasta, kuna ti kahon a “Ti Ngay ‘Estrogen Replacement Therapy’?” a “ti panangnayon iti progesterone iti pannakasukát ti hormone . . . lapdanna dagiti makagunggona nga epekto ti estrogen iti sakit ti puso.” Saan a kanayon a pudno daytoy, nangruna kadagiti natural progestin.
Dr. T. W. ken J. K., Alemania
Pagyamanan iti nasaksakbay a panangipakaammoyo kadakami. Nupay impamatmat dagiti nadadaan a gubuayan a dagiti progestin mabalin a pababaenda ti kasasaad ti HDL, wenno “nasayaat” a kolesterol, a mangpadakkel iti peggad ti panagsakit iti puso, ti kasumbangirna ti ipamatmat dagiti kabaruan a panagsirarak. Kuna ti nabiit pay a panagadal a naipadamag iti Enero 18, 1995 a ruar ti “JAMA” a “ti laeng estrogen wenno iti kombinasion ti progestin pasayaatenna [ti kaadu ti “nasayaat” a kolesterol].” Talaga a masapul a maaramid ti ad-adu pay a panagsirarak sakbay a naan-anay a maawatan amin a napaut nga epekto ti panangagas iti hormone.—ED.
Ebolusion Kabasbasak dagiti serye “Ti Teoria a Nangkigtot iti Lubong—Aniat’ Impatawidna?” (Agosto 8, 1995) Ti reaksionko? Saan la a naibuyog. Nalapunos unay ti riknak! Nagsayaat unay ti pannakaisurat ti artikulo, nalaka a maawatan. Impalgak ti tunggal naadaw ti nasaknap a panagsirarak. Kangrunaan iti amin, makailawlawag ti maipapan iti pudno nga epekto ti pannakaisuro ti ebolusion iti panunot ti tao. Diak man la nabigbig dayta idi! Adda bisin ti lubong maipapan iti napudno a panagbasa, ngem napennekyo dayta a kasapulan.
R. H., Estados Unidos