Manipud Managbasatayo
Baldado a Ministro iti Amin a Tiempo Iti panaglabas dagiti tawen, adun nga artikulo ti nangabbukay iti pusok—ngem ti pay laeng kapadasan ni Gloria Williams a “Maysa a Bala ti Nangbalbaliw iti Biagko” ti nangabbukay unay. (Oktubre 22, 1995) Nagbassitan dagiti problemak no idilig kadagiti problemana! Pagyamanan iti panangtedyo kadakami iti kasta a nagpateg a naespirituan a taraon ken pammaregta.
E. L., Canada
Daytoy a kapadasan ti nangipalagip kaniak nga aniaman a masarangettayo a kasasaad, kasano man kadakes, makapagkararagtayo ken ni Jehova ken makapagkiddaw ti tulongna. Dakes ita ti kasasaadko iti eskuelaan, ket maup-upayak. Ngem ti panangbasak itoy nga artikulo ti nangparegta unay kaniak.
M. S., Japan
Bayat a basbasaek ti kapadasan ni Gloria Williams, aglulua dagiti matak. Pinaregtanak a mangitultuloy iti panangipaayko iti kasayaatan a panagserbik iti tay-ak, agpapan pay iti panagtaengko iti di agkakarelihionan a pagtaengan.
F. C., Italia
Ti artikulo ti nangparegta kaniak a mangitultuloy iti panagtalinaedko iti kalatko a mangasaba iti amin a tiempo. No kabaelan ni Gloria Williams dayta, diak ngata met kabaelan—idinto ta kompleto amin a kameng ti bagik?
I. O. A., Nigeria
Kayo Agtawenak iti 11, ket talaga a tinagiragsakko ti artikulo nga “Apay nga Agbangon Babaen iti Kayo?” (Oktubre 22, 1995) Tinulongannak a mangapresiar iti pannakabalin ken abilidad ni Jehova. Pinasingednak met kenkuana ken iti Anakna, ni Jesu-Kristo, agsipud ta naamirisko a nalaing ken masiribda a dua.
A. B., Estados Unidos
Apay nga Agsolsolo Pay Laeng? Pagyamanan unay iti artikulo nga “Agimtuod Dagiti Agtutubo . . . Apay a Tunggal Maysa ti Makiasawan Malaksid Kaniak?” (Oktubre 22, 1995) Kellaat a nagbalin nga uso ti panagasawa iti daytoy a lugar ket adu dagiti agaassawa nupay nakaub-ubingda pay laeng. Madanagan ti dadduma a tattao kaniak, ta 18 ti tawenkon ngem awan pay nobiok. Simmangpet ti artikulo iti umiso a tiempo tapno tulongannak a maaddaan iti natimbeng a kababalin.
S. Z., Alemania
Kas agtawen iti 19 ken agsolsolo pay laeng, masansan a pampanunotek no ania dagiti pakapilawak ta awan man la ti naginteres kaniak. Adda sumagmamano a di manamati a nangipakitan iti interes, ngem saan a dayta a kita ti atension a kayatko. Ti artikulo ti timmulong kaniak a mangtarus a kasapulan ti panaganus ket ti talaga a kapatgan isut’ panangay-ayok ken ni Jehova.
J. G., Estados Unidos
Kas baro nga agtawenen iti 38, nasarakak ti bagik a mangyim-imtuod iti saludsod a pinataud ti paulo ti artikulo. Tangay inib-ibturakon ti din mabilang a panangpaay dagiti kakabsat a Kristiano a babbalasang, ammok ti saem a patauden ti “inanama a maitantantan.” (Proverbio 13:12) Makapabang-ar a maammuan nga us-usigen ni Jehova ti rikrikna dagiti di pay naasawaan a Kristiano iti daytoy a kasasaad kas nainkalintegan ket ap-apresiarenna ti matalek a panagibturmi.
D. T., Estados Unidos
Katan-okan nga Artist Kalpasan ti panagbasak kadagiti serye a “Panangsapul iti Katan-okan nga Artist” (Nobiembre 8, 1995), matignayak a mangyebkas iti panangapresiarko. Adu metten ti nabuyak iti television a programa maipapan iti nakaparsuaan a di man la mangpadayaw iti Katan-okan a Dumidibuho. Nupay kasta, kanayon a mangted ti Agriingkayo! iti pammadayaw iti kangatuan a Dios, ni Jehova.
E. Z., Estados Unidos
Anian a naisangsangayan ken kabbaro a pamay-an a panangam-ammo ken ni Jehova! Talaga a naidumduma ti kalidad ti artena, a kas iti kinaawan kaasping ti kaadu dagiti gapuananna. Kayatko met nga inayon ti komendasionko iti adu nga aduan saguday a dumidibuho a mamagbalin iti Agriingkayo! a makaay-ayo tapno maallukoy dagiti tattao ken ni Jehova a Dios.
M. Q., Estados Unidos