Ti Kaunaan Idiay Mali

AGSERSERBI ni lakayko kas agdaldaliasat a manangaywan dagiti Saksi ni Jehova idiay Mali, maysa a pagilian a bassit ti populasionna idiay makinlaud nga Africa. Sinaknapan ti Sahara Desert ti makin-amianan a pasetna, ket buklen iti naipattopattok a karuotan ti kaaduan a paset ti pagilian. Dakdakkel ti Mali ngem ti agtitipon nga España, Francia, ken Inglaterra. Nupay nasurok a 140 milion ti agindeg kadagitoy a pagilian, agarup sangapulo la a milion ti populasion ti Mali​—Saksi ti agarup 150.

Ti Ziguinchor ti home base-mi, maysa a bassit a siudad iti kaarrubami a Senegal. Idi Nobiembre 1994, nageroplanokami manipud sadiay a nagpa-Dakar, kalpasanna, iti kabesera ti Mali, ti Bamako, maysa a dakkel a siudad a nasurok a kagudua a milion ti agindeg. Manipud Bamako, nagbiahekami babaen iti pangkabakiran a taxi, bus, wenno tren a napan iti babbabassit a siudad, kas iti Ségou, San, ken ti kadaanan a siudad ti Mopti. Makalawaskam a naggian iti tunggal maysa kadagitoy a lugar tapno makipaset iti Nakristianuan a ministerio a kadua ti sumagmamano a Saksi sadiay.

Idi Disiembre, nagsublikami idiay Bamako tapno tagiragsaken ti kombension distrito, nga addaan iti 273 a kangatuan a bilang dagiti timmabuno. Anian a ragsakmi a nakaimatang iti 14 a kabbaro a nabautisaran! Ti aldaw kalpasan ti kombension, pimmanawkami babaen iti bus tapno mapan iti bassit a siudad ti Sikasso, a sadiay, ti damo a Kingdom Hall idiay Mali a binangon dagiti Saksi ni Jehova ti nayeskediul a maidedikar iti sumuno nga arinunos ti lawas.

Maysa a Pudno a Karit

Buklen laeng iti 13 a Saksi ti kongregasion ti Sikasso, 5 kadakuada ti payunir, wenno amin-tiempo a ministro. Idi simmangpetkam iti Lunes, nagagarankami a nangdamag kadagiti planoda agpaay iti dedikasion. Imbagada kadakami nga agpannurayda ken ni lakayko, ni Mike, a mangyurnos iti dayta! Isu a kalpasan a nagdiskargakami kadagiti gargaretmi, napanmi kinita ti Kingdom Hall. Idi nakitami dayta, naragsakankami ta nabaelan a binangon ti sumagmamano laeng a Saksi dayta a pasdek. Nupay kasta, adu pay ti kasapulan nga aramiden. Awan kurtina, saan a napinturan ti ruar, ken awan karatula a “Kingdom Hall of Jehovah’s Witnesses.”

Naamirismi nga iti sumagmamano nga aldaw, agarup 50 a sangaili ti aggapu idiay Bamako tapno tabunuan ti dedikasion. Naawis met dagiti tattao iti dayta a lugar. Maymaysa ti panglakayen ti kongregasion, ni Pierre Sadio. Idi dinamagmi no kasano a manamnama a mairingpas ti trabaho sakbay ti Sabado, ti aldaw ti dedikasion, immasideg dagiti gagayyem tapno mangngegda ti sungbatna. “Ti panagkunak, tulongannatayto ni Jehova a mangiringpas iti naituding a tiempo,” ti sungbatna.

Adu ti kasapulan nga aramiden iti kasta kaababa a tiempo! Buyogen ti panagkedked a dinamagko no mabalin a tumulongak a mangpaadda kadagiti kurtina. Inyanninaw dagiti rupa iti aglikmutko ti dakkel nga isem a pagilasinan ti bang-ar. Kalpasanna, insingasing ni Mike nga agpaaramidkami iti karatula a maikabil iti sanguanan ti hall. Di nagbayag, nakatagtagarikamin. Magagaran unay ti tunggal maysa. Talaga a maysa a karit ti panangkompleto kadagiti paset ti hall iti dayta a tiempo!

Okupado a Trabaho

Dakam a Kristiano a kakabsat a babbai ti nagdardaras a nagudong tapno gumatang iti materiales. Kalpasanna, nakasarakkam iti dumadait kadagiti kurtina. “Ikkandaka iti uppat nga aldaw a pangringpasmo kadagita,” imbagami kenkuana. Tapno adda dekorasion, nagboluntario ni Mike a mangaramid iti napintas a pakaibitinan ti masetas a naaramid iti nasallasallapid a tali agpaay iti sanguanan ti hall. Isu a napankam manen, nga agsapul itan iti tali a kasapulan a pakaibitinan ti masetas agraman ti plorera.

Nayurnos met no asino ti mangaramid iti karatula ti Kingdom Hall. Iti uneg ken ruar ti hall, kapadés ti trabaho. Adda grupo dagiti kaarruba nga immay nagpaliiw. Nagadu ti matrabaho! Kasano a mapakanminto ti 50 a sangaili? Pagturogandanto? Makalawas nga okupadokami a nagsagana, ngem kasla awan ti naannayas a mairingpas.

Dimteng ti agsapa ti Biernes, ti aldaw sakbay ti dedikasion. Naragsak ti kasasaad agsipud ta agsangpeten dagiti sangaili manipud Bamako. Idi agmatuon, simmangpeten ti karatula ti Kingdom Hall. Idi ikkaten ni Mike ti naibalkut, uray la a nasdaaw dagiti kakabsat. Kasta unay ti apresasion uray dagiti nagusioso. Dikam makaan-anusen a naguray bayat a naipaskil dayta iti makinsango a diding. Ita, nabatad a saan la nga ordinario a pasdek daytoy. Dayta ti “Kingdom Hall of Jehovah’s Witnesses.”

Iti asideg a balay ti maysa a payunir, okupado nga aglutluto dagiti kakabsat a babbai. Agburburek ti dakkel, nangisit a kaldero ti taraon. Kaik-ikkatmi dagiti balde ti pintura ken walis manipud iti sikigan ti hall idi adda nangipukkaw iti: “Addadan! Addadan!” Nagtataray dagiti gagayyem manipud iti hall, ti dadduma manipud iti balay. Nangpasiddaaw amin dayta kadagiti kaarruba. Uray la nagsasala dagiti kakabsat iti ragsakda. Idi dimsaag dagiti gagayyem manipud iti bus, anian a panangpasangbay ti naawatda! Pagpannakkelko unay ti agbalin a maysa kadagiti Saksi ni Jehova!

Saggaysa a minatmatak dagiti sangaili​—gagayyem manipud kadagiti lokal a tribu agraman dagiti naggapu idiay Burkina Faso ken Togo. Adda met immay a taga Alemania, America, Canada, ken Francia. Adda dakkel a padayámi iti dayta a rabii. Nangpasgedkami iti dakkel nga apuy a manglawag iti paraangan. Makakudkuddotenak iti bagik tapno masiertok nga agpayso a makiramramanak iti pribilehio nga agbalin a paset dayta a pasken. Bayat a limmabas ti rabii, agkedkedkami a pumanaw a mapan kadagiti pagdagusanmi.

Agarup 20 ti naidagus iti maysa a balay. Ammok a narigat daydi iti sumagmamano. Nakitak ti maysa a lokal a kabsat a babai a timmulong iti sangaili a taga Francia a mapan iti kasilias iti ruar. Kabagian ti maysa kadagiti misionero ti sangaili, ngem saan a Saksi. Idi agsublida, kunana: “Nakapangpanglawkayo a tattao, ngem agpayso a nakadungdungngo ken nakasingsingpetkayo.” Ibagak koma ti: “Saan, saanda a napanglaw. Nabaknang amin a tattao ni Jehova!” Wen nga agpayso, sadino pay ti pakakitaam iti grupo ti tattao a sabasabali ti pulída nga agbibiag a sitatalna ken situtunos?

Makaparegta a Dedikasion

Ababa ti rabii, ket nagbiit a dimteng ti aldaw ti dedikasion. Kalpasan ti taripnong agpaay iti panangasaba idiay Kingdom Hall, rimmuar dagiti Saksi a nagawis kadagiti umili agpaay iti dedikasion. Nabatiak a nangurnos kadagiti sabong ken masetas. Okupado a nagluto dagiti lokal a kakabsat a babbai iti pangrabii.

Kamaudiananna, iti alas kuatro, dimtengen ti oras ti dedikasion. Agdagup 92 ti timmabuno, kaskasdi a saan a napusek ti hall. Maragsakanak unay nga uray la alusiisenak a nagtugaw. Ni Pierre Sadio ti nangestoria iti trabaho idiay Sikasso. Idi naituding ditoy, ni la baketna ken dua nga annakda ti kaduana. Makakarit ti biag, ngem idi agangay, binendisionan ni Jehova ti serbisioda. Espesial payunir itan ti damo a tao a nagbalin a Saksi idiay Sikasso. Kalpasanna, inlawlawag ni Pierre no kasano a nagibangon dagiti sumagmamano a Saksi. Nangtangdanda iti mason, ket agmalmalem iti tunggal Domingo a nagtrabaho ti intero a kongregasion iti proyekto.

Ita, ininterview ni Mike dagidiay Saksi a nagtrabaho iti hall. Saggaysa a dinamagna ida no sinegseggaanda ti idadateng daytoy nga aldaw ken no aniat’ riknada ita ta napnon ti tattao ti Kingdom Hall. Kaaduan kadakuada ti kasla mabekbekkel ta dida man la mayebkas dagiti ibagada koma. Makalua ti tunggal maysa kadagiti Saksi a timmabuno.

Simmaganad, ni Ted Petras manipud iti sanga nga opisina dagiti Saksi ni Jehova idiay Senegal ti nangidiskurso ti palawag iti dedikasion. Nalpas ti kararag iti dedikasion, ket napaut ti panagpalakpak dagiti kakabsat. Kalpasanna, inawis ni Mike ti tunggal maysa a timmulong a nangbangon iti hall a mapanda iti entablado. Sadiay a timmakderda, a naraniag ti ruprupada, nga agar-arubos dagiti lua ti rag-o kadagiti pingpingda. Bayat a kinantami ti pangserra a kanta, nakaragragsak ti riknak. Ti panagbalinko a misionera ti nangipalubos kaniak a makiraman iti adu a nakaskasdaaw a kapadasan. Adu koma ti nakaikapisanmi no nagtalinaedkami iti pagtaenganmi idiay Estados Unidos.

Kanayonan a Nabara a Panaglalangen

Kalpasan ti dedikasion, naiwaras ti merienda. Agkarauneg dagiti kakabsat a babbai a nakasusuon iti dadakkel a plato ti sandia. Sinaruno ida ti dua a kakabsat a lallaki a nagkallugong iti pang-kosinero agpaay iti dayta nga okasion ket nakaawitda kadagiti bandehado a napno iti kankanen. Nagpintas ti pannakadekorasion dagiti kankanen iti nasigsigit a naranghita ken dalayap. Naragsak ti intero a kasasaad.

Kalpasan a naserbian dagiti sangaili, pimmanawdan. Kalpasanna, napan dagiti Saksi iti asideg a balay agpaay iti panangrabii. Nagtugawkam amin iti ruar iti babaen ti naslag a bulan, a ti paraangan ti linawagan ti dakkel nga apuy a pinasgedanmi. Maragsakanak unay ken nabannog manipud iti agmalem a trabaho nga uray la diak maibus ti kanek. Intedko iti maysa a balasitang ti luppo ti manok a nakankon ti kaguduana. Palpaliiwen dagiti lokal a payunir dagiti platomi, ket no adda mabati, ibusenda dayta. Awan ti matda ditoy. Napalamlamankam unay idiay Estados Unidos.

Bayat nga agngudon ti rabii, adda kabsat a lalaki a nangipalagip kadagidiay naggaput’ Bamako nga alaento ida ti bus inton alas 9:15 t.b. Kabigatanna, agtutugawen dagiti kakabsat iti intero a paraangan, nga agur-uray iti sumangpet a bus. Kalpasanna, kinantami ti kaudian a kanta, “Jehova, Agyamankami.” Nagarubos dagiti lua, ket bayat a lepleppasenmi, nasirpatanmin ti bus. Nagiinnarakup amin dagiti kakabsat.

Nagtakderkam sadiay a nangpayapay bayat nga in-inut a pimmanawen ti bus. Nagpayapay ti amin nga adda iti bus agingga a dikam masirpatanen dayta. Kalpasanna, nagkikinnitakam amin a nabati. Pudno a nakaragragsak daydi a dedikasion ken nakaskasdaaw a lawas.​—Naipatulod.

[Ladawan iti panid 15]

Ti kaunaan a Kingdom Hall a binangon dagiti Saksi ni Jehova idiay Mali

[Ladawan iti panid 16]

Nagbiahe daytoy a naragsak a grupo babaen iti bus