Manipud Managbasatayo
Panangitantan Naisurat ti artikulo “Panangitantan—Ti Mannanakaw iti Panawen” (Abril 8, 1995) iti praktikal ken makapakatawa a pamay-an. Bayat a binasak dayta, natakuatak a katkatawaak ti bagik, tangay adda ugalik a nakaro a panangitantan.
F. B. H., Brazil
Iti intero a panagbiagko, manangitantanak unay, isu a naintiempuan unay nga impormasion daytoy kaniak. Naisurat a naimbag, ket planok nga usaren ti impormasion a tumulong kaniak a mangyeskediul a naimbag iti tiempok. Masansan a kayatko ti agsurat iti panagyaman gapu iti nadumaduma nga artikulo ngem saan a mairingringpas. Ita nairingpasko met laengen dayta!
M. H., Estados Unidos
Luklukibek ti magasin idi a nakitak ti artikulo. Binasak ti panglukat a sasao, a pampanunotek nga itantanko ti panangbasak ti nabatbati a paset ti artikulo. Ngem kinuna ti panglukat a sasao: “Aguray! Dika isardeng a basaen daytoy nga artikulo!” Naamirisko ita a pinalubosak ti bagik a maikapis iti tiempo maigapu iti panangitantan.
A. E., Italia
Maysaak a sastre, ket nakairuamak ti mangitantan. Diak inkankano ti mangaramid iti listaan, mangituding iti umno a tiempo, ken agplano no adda pannakasinga. Ngem ita nasursurokon nga iyaplikar dagiti singasingyo, ket tagtagiragsakekon dagiti gunggona.
S. N., Nigeria
Maudi nga Al-aldaw Kas amin-tiempo a managebanghelio, kayatko ti agyaman kadakayo kadagiti pagiwarnaktayo. Bayat a basbasaek dagiti kangrunaan a serye ti artikulo iti Abril 22, 1995 a ruar, “Dagitoy Kadin ti Maudi nga Al-aldaw?,” kinunak iti un-unegko, ‘Anian a naglawag, direkta, ken nagsayaat ti pannakayilustrarna dagitoy nga artikulo!’ Ti pannakaurnosna, ti nagpipintas a retratona, ken dagiti kapsion ti talaga a timmulong a nangilawlawag a nasken nga amirisen ti tao dagiti kinapudno ken pinagbalinna ti artikulo a nalaka a basaen ken maawatan. Makaparagsak nga itukon ti kasta a material kadagiti kaarrubami!
J. B., Estados Unidos
Shingles Nabasak ti artikuloyo a “Shingles—Panangandur iti Ut-otna.” (Abril 22, 1995) Tallo nga aldaw kalpasanna, naggagatel ti kudilko a mayasping unay iti pannakadeskribir ti shingles iti artikuloyo. Nagpadoktorak ket kinunak kenkuana a di la ket ta addaanak iti shingles. Sierto iti panangibagana a “naglaingak man”—ta umiso ti diagnosis-ko! Tangay natakuatan a saan pay unay a grabe ti sakit, kinunana a nasaluadanak iti nakaro unay nga ut-ot a malak-aman ti kaaduan a pasiente nga addaan shingles. Pagyamanan iti artikuloyo!
K. B., Estados Unidos
Matreshka Pagyamanan iti artikulo a “Matreshka—Nagpaiduma a Munieka!” (Abril 22, 1995) Bayat a binasak dayta, dinayawko ti pannakaisuratna. Nagpintas dagiti retrato! Sipud pay ti kinaubingko, naallukoyakon iti daytoy a munieka, ngem diak ammo no nagtaudanna. Ita masapul nga adda kumbinsirekto a gumatang ti maysa nga agpaay kaniak!
M. T., Italia
Aborsion Naallukoy ti atensionko iti artikulo nga “Agimtuod Dagiti Agtutubo . . . Aborsion—Dayta Aya ti Solusion?” (Marso 8, 1995) Duapulo ket uppat a tawen itan ti napalabas, idi agtawenak iti 15, nagsikogak, napadasak met ti manglapunos nga emosion a narikna dagiti babbalasang a nadakamat iti artikulo. Pinaregtanak ti ama ti sikogko nga agpaaborsionak, ngem inkeddengko nga ipasngayko ti ubing. Kayat idi ti padimi nga ipaamponko ti ubing. Pulos a diak simreken iti simbaan ti Iglesia Katolika! Ngem, naimbag ta manangandingay dagiti nagannak kaniak. Rinugiak nga inut-utob a sititibker a padakkelek ti anakko iti naespirituan a wagas. Idi immay dagiti Saksi ni Jehova iti balaymi, inawatko ti panagadal iti Biblia ket di nagbayag, nabautisaranak. Ita, naragsaken ti pannakiasawak. Ket ti anakko? Agserserbi itan idiay hedkuarter dagiti Saksi ni Jehova. Agkullayawak no malagipko di damo a pagpiliak—aborsion. Saan a dayta ti solusion!
G. J., Estados Unidos