Ti Eropuerto ti “Kanku”​—Makita Ngem Di Mangngegan

BABAEN TI KORESPONSAL TI AGRIINGKAYO! IDIAY JAPAN

NO UMAD-ADANIKA iti Kansai International Airport manipud iti tangatang, makitam ti maysa a puro nga addaan logo a “Kansai” iti Ingles.a Masarakan daytoy a puro ti Japan lima a kilometro manipud iti kosta ti Osaka Bay. Ti laeng eropuerto ken dagiti mainaig a pasilidad ti makitam. Kinapudnona, naisangrat ti puro tapno mausar kas eropuerto. Iti panaglukatna idi Setiembre 1994, nabirngasan ti eropuerto kas Kanku, pangababaan iti Hapones a naganna a Kansai Kokusai Kuko.

Maysa a nalawa a rangtay, 3.75 kilometro ti kaatiddogna, ti mangisilpo iti puro nga eropuerto iti kangrunaan a lugar, a nalaka a madanon babaen iti lugan ti takdang ken tren. Kompleto ti puro kadagiti pasilidad ti sangladan agpaay kadagiti bapor ken barko. Ngem apay nga aramiden kas eropuerto ti intero a baro a puro?

Saan a Mangngegan nga Eropuerto

Ti iyaadu dagiti turista ken sangaili iti lugar ti Kansai ti nakaigapuan ti iyaadu ti bilang dagiti eroplano kadagiti lugar a pagnanaedan ti umili iti aglawlaw ti Osaka International Airport. Tapno mabang-aran ti tattao nga agnanaed sadiay iti makapasuron nga uni, naipaalagad ti curfew manipud alas 9:00 t.r. agingga iti alas 7:00 t.b. Awan ti pammalubos a manayonan dagiti pang-internasional nga eroplano manipud 1974. Gapuna, kasapulan unay idi ti maysa nga eropuerto a mangtaming iti umad-adu a pasahero ken karga a di pulos mangngegan dagiti adda iti kangrunaan a disso.

Maysa nga eropuerto a mausar iti kada oras nga awanan iti makapasuron nga uni​—dakkel a karit dayta kadagidiay a nairaman iti proyekto. Ti kakaisuna a napanunotda a solusion isut’ panangpataud iti maysa a puro nga adayo manipud pagnanaedan ti tattao sa pagbalinen dayta nga eropuerto. Talaga a dakkel a proyekto!

Pinonduan ti gobierno nasional ken lokal agraman dagiti lokal a gunglo ti negosio ti $15-bilion a proyekto, a nangipasdek iti maysa a pribado a kompania a mangbangon ken mangaywan iti kabbaro nga eropuerto. Imbaga ni Mr. Keisuke Kimura, ti executive vice president ti Kansai International Airport Company, iti Agriingkayo!: “Kas pribado a kompania, dimi kabaelan a busbosen ti adu a tiempo a mangpataud iti puro. Rumbeng a napardas ti pannakairingpas ti trabaho.”

“Panangpataud iti Puro”

Narigat ti panangpasayaat iti daga iti igid ti kosta, ngem narigrigat pay ti mangpataud iti puro a lima kilometro manipud iti kosta. Tapno mapataud ti 511 nga ektaria a puro nga eropuerto, nausar ti 6.4 bilion pie kubiko [180,000,000 metro kubiko] a darat ken daga kas paggabur. “Katupag dayta ti 73 a pyramid​—kayatko a sawen ti kadakkelan nga inaramid ni Ari Khufu,” inlawlawag ni Mr. Kimura.

Iti tukok ti baybay, iti promedio a kauneg a 18 a metro, adda nalukneng a palunapin a sekka a nasken a maes-esan iti danum. “Sangamilion a poste iti darat, 40 a sentimetro [16 a pulgada] ti diametrona, ti naipalok iti dayta a palunapin tapno maes-esan ti danum dayta ken maipasdek ti pundasion. Iti kadagsen ti naigabur, nages-es ti danum manipud ti 20-metro [66 pie] a nalukneng a palunapin ti daga, a mangpababa iti dayta iti 14 metro [46 pie],” inlawlawag ni Mr. Kenichiro Minami, a nangidaulo iti proyekto a panaggabur. “Ti kangrunaan a pakadanaganmi idi isut’ di agpapada a pannakasedsed ti subsoil. Nangusarkami kadagiti computer tapno makalkular nga eksakto no sadino ti paggaburan tapno mapagpapada ti pannakasedsed.”

No mapagmaymaysa, ti kauneg ti naigabur a daga nadanonna ti 33 metro, katupag ti 10 ti kadsaaranna a pasdek. Nupay kasta, iti sidong ti dagsen ti naigabur a daga, bimmaba ti tukok ti baybay ken agtultuloy a limnek. Napattapatta a bumabanto ti tukok ti baybay iti kanayonan a 1.5 metro iti 50 a tawen, a mangibati iti puro nga 4 a metro iti ngatuen ti patas ti baybay.

Idi 1991, sakbay pay a napataud ti intero a puro, nairugin ti pannakaaramid ti pasdek a terminal dagiti pasahero ken ti control tower. Kalpasan ti nasurok a pito a tawen a kapadés ti trabaho, nairingpas met laeng ti pannakapataud ti puro, eropuerto, ken dagiti nainaig a pasilidad.

Dakkel Ngem Naurnos

Makaay-ayo ti maisorpresa kadagiti agsangpet a pasahero. “Apaman a makagtengkami iti pagalaan iti bagahemi, addan sadiay dagiti maletami,” kuna ti maysa a biahero manipud Estados Unidos. Aniat’ makatulong iti naannayas a serbisio? “Dakkel ti pasdek a terminal dagiti pasahero ngem naurnos,” kuna ni Mr. Kazuhito Arao, a mangay-aywan iti pasdek a terminal dagiti pasahero. “Din kasapulan a ti la maturturong dagiti pasahero, a kadawyan kadagiti internasional nga eropuerto.”

Simple ngem naisangsangayan ti estruktura ti pasdek a terminal dagiti pasahero. Nadisenio ti kangrunaan a pasdek a tumulong kadagiti pasahero tapno saan a ti la maturturongda. Mabalinen nga agderetso dagiti pasahero nga agbiahe iti uneg ti pagilian manipud iti estasion ti tren a direkta iti check-in counter, ken iti boarding gate a din kasapulan nga umuli wenno umulog iti aniaman nga agdan.

Manipud iti kangrunaan a pasdek, a sadiay ti ayan dagiti check-in counter, opisina ti imigrasion, ken aduana, dua a 700 metro nga ekstension a pasdek ti naiduag iti amianan ken abagatan, nga agturong iti 33 a boarding gate. Dagiti pasahero a mangusar kadagiti pagserkan nga adayo manipud iti kangrunaan a pasdek ti mabalin nga aglugan kadagiti automatiko a mangigiya a lugan a maawagan iti Wing Shuttle. Ipanna dagiti pasahero iti matarigagayan a pagserkan iti unos ti lima a minuto​—agraman ti tiempo a mabusbos a panaguray iti lugan.

Makitan nga Eropuerto

“Tangay eropuerto a naan-anay nga adda iti baybay, nawaya dayta iti aniaman a bangen,” kunaen ni Mr. Arao. “Wen, mangngeganmi a kunkunaen dagiti piloto a nalaklaka a paglandingan dayta nga eropuerto,” umanamong ni Mr. Kimura.

Apresiaren met ti dadduma ti itsurana. Ti komplikado a disenio ti pasdek a terminal a sukog dagiti payak ti eroplano ti mangallukoyen iti adu a turista idiay Kanku. Tagiragsakenda met a buyaen ti panagtayab ken panaglanding dagiti eroplano iti naisangsangayan nga eropuerto a puro. “Kasapulan nga agbangonkami iti pagpaliiwan iti ngatuen ti maintenance center agpaay kadagiti turista a sumarungkar iti eropuerto, nupay awan panggepmi a kasta idi damo,” kunaen ni Mr. Kimura. Promedio a 30,000 a tattao ti inaldaw a sumarungkar iti eropuerto tapno buyaenda laeng ti aglawlaw.

No sumarungkarkayo idiay Japan nga asideg iti lugar a Kansai, apay a dikay ageroplano a mapan wenno ageroplano manipud Kanku​—ti eropuerto a makita ngem di mangngegan dagiti kabangibangna.

[Footnote]

[Picture Credit Line iti panid 25]

Kansai International Airport Co., Ltd.