Ap-apresiarenyo Aya ti Narelihiosuan a Wayawaya?
Babaen ti koresponsal ti Agriingkayo! idiay Estonia
MAYSA a sangladan a siudad ken pagbakasionan ti Pärnu iti bassit a Baltic a pagilian ti Estonia, dati a republika ti Soviet Union. Nasurok a 50,000 ti populasion ti siudad. Tagtagiragsakenen dagiti tattao ti wayawaya a mangalagad iti pinilida a relihion—wayawaya a dida nalak-am sumagmamano a tawenen ti napalabas. Idi Hunio 17, 1995, kinuna ti Pärnu Leht, maysa a lokal a periodiko, nga adda 11 a relihion ti Pärnu ket plano ti periodiko nga ipablaak ti agsasaganad nga artikulo maipapan kadakuada.
Inlawlawag ti damo nga artikulo: “Mangrugikami iti kongregasion a ti trabahona ti nalawag a mangapektar kadatayo amin—Dagiti Saksi ni Jehova—a mangang-angay ita kadagiti gimongda iti hall ti maysa a brewery. . . . Idi 1931, nangrugi nga inawagan Dagiti Estudiante ti Biblia ti bagida kas Dagiti Saksi ni Jehova, ket dayta pay laeng ti naganda agingga ita. Nasurok a lima a milionen Dagiti Saksi ni Jehova iti intero a lubong. Masarakan idiay Tallinn ti headquarter Dagiti Saksi ni Jehova iti Estonia.”
Intuloy ti artikulo: “Naipasdek ti kongregasion dagiti manangiwaragawag ken ni Jehova idiay Pärnu makatawen ket kagudua pay laeng ti napalabas. Idi damo, 25 ti miembro; ita immadu dayta agingga iti 120 . . .
“Talaga a positibo ti damo nga impresion. Mannakigayyem, nanakman ti panagkawkawesda, ken mannakaawat dagiti tattao—kaaduanna agtutubo a pagassawaan. Nakaskasdaaw a disiplinado unay dagiti ubbing, agsipud ta saan a nalaka para iti bassit nga ubing ti agtugaw a sitatalna iti maysa a lugar iti maysa ket kagudua nga oras—ngem ar-aramidenda dayta.”
Iti panangiladawanna no kasano a naiduma Dagiti Saksi ni Jehova iti dadduma a relihion, inlawlawag ti periodiko: “Ipaganetgetda ti sumungsungad a Paraiso. Nakadkadlaw met no kasano kalaing ti kongregasion iti Biblia, ket sitarenda dayta iti tunggal posible a kanito.” Kas konklusion, kinuna ti artikulo: “Nangaramid dagidiay a 120 a tattao, a manangiwaragawag ni Jehova iti desisionda; ket siguradoda a daytat’ umiso. Ti pammatida ken ti pannakaiwaragawagna isut’ kangrunaan iti biagda.”
Saan a naay-ayo ti amin idiay Pärnu iti daytoy a nailungalong a serye dagiti artikulo maipapan kadagiti relihion iti siudad. Idi Hulio 8, 1995, inreport ti Pärnu Leht: “Kayatmi nga ipablaak ti maysa a petision a naawatmi manipud iti uppat nga iglesia mainaig iti panangrugi daytoy a benneg.” Daytoy a petision, wenno surat, nga agpaay iti periodiko ti pinirmaan dagiti pannakabagi ti Orthodox Church idiay Estonia, ti Estonian Evangelical Lutheran Church, ti Estonian Union of Evangelical Christians and Baptists, ken ti Estonian Methodist Church.
Inreklamo dagitoy nga uppat a pannakabagi ti relihion: “Kasla karkarna unay kadakami a rinugianyo dagiti serye babaen iti artikulo maipapan kadagiti Saksi ni Jehova.” Kinunada pay: “Mainaig iti daytoy a serye, kayatmi nga ibaga nga imposible nga agpa-interview-kami iti Pärnu Leht.”
Inkonklusion dagiti pannakabagi ti relihion: “Iti komunidad nga adu ti mariribukan maigapu iti natured a panangpilit manipud iti nadumaduma a kabbaro a relihion ken sekta a mangirakurak iti ‘espiritualidad,’ patienmi a kasapulan nga usigen dagiti publikasion ti lokal a kasasaad ti relihion ken ilasin dagiti historikal nga iglesia manipud kadagiti sekta ken movimiento dagiti extremist. Dagiti miembro ti Estonian Council of Churches, a mangibagi iti Nakristianuan nga iglesia a mangtagtagiragsak iti ekumenikal a panagtutunos, ti rumbeng a mangipaay iti nalawag a panangiwanwan agpaay iti daytoy.”
Nupay kasta, kalpasan daytoy a surat, nangted ti mannurat agpaay iti Pärnu Leht kadagitoy a mamagpanunot nga ideya: “Mabalin a di umiso ti amin nga ibilangtayo nga umiso. Ket ti panangmatmat ken opinion ti Dios maipapan iti nadumaduma a kongregasion mabalin a maisupadi iti panangmatmat dagitoy nga uppat a mararaem nga iglesia, ken ti kasupadina. Awan kadatayo ti di agbasol, uray pay dagiti iglesia nga addaan kadagiti sinigsiglo ti kabayagdan a tradision.”
Kasanot’ panagriknayo maipapan iti nagbalbaliw a kababalin maipapan iti relihion kadagiti dati a republika ti Soviet Union? Agtalekkami nga apresiaren amin a tattao a mangbirbirok iti kinapudno iti aniaman a lugar dagiti narelihiosuan a wayawaya a matagtagiragsak sadiay.
[Mapa iti panid 23]
(Para iti aktual a pannakaurnosna, kitaem ti publikasion)
FINLAND
Helsinki
Baltic Sea
ESTONIA
Tallinn
Pärnu
LATVIA
Riga
LITHUANIA
Vilnius
RUSSIA
St. Petersburg
Moscow
BELARUS
Minsk
[Dagiti ladawan iti panid 24]
Ti kongregasion Dagiti Saksi ni Jehova idiay Pärnu