Ti Panangraut ti Soviet iti Relihion

NABUANGAY ti Union of Soviet Socialist Republics idi 1922, a ti Russia ti kadakkelan ken kalatakan kadagiti orihinal nga uppat a republikana. Idi agangay, limmawa dayta a pakairamanan ti 15 a republika ken nasakupanna ti dandani kakanem iti daga. Ngem idi 1991, kellaat a nasinasina ti Union Soviet.a Nakaskasdaaw, ta dayta ti damo nga Estado a nangikagumaan a mangpukaw iti panamati iti Dios iti panunot dagiti umilina.

Ni Vladimir Lenin, nga adalan ni Karl Marx, ti umuna a pangulo ti Union Soviet, ket inladawanna ti Kristianidad kas instrumento ti panangirurumen. Inawagan ni Marx ti relihion nga “opium dagiti tao,” ket kalpasanna kinuna ni Lenin: “Makarimon unay, . . . ti aniaman a narelihiosuan a kapanunotan, aniaman a kapanunotan maipapan iti aniaman a Dios.”

Idi natay ti patriarka iti Russian Orthodox a ni Tikhon idi 1925, saan a napalubosan ti simbaan a mangibutos iti sabali a patriarka. Ti simmaruno a panangraut iti relihion ket nagbanag iti pannakadadael ti kaaduan a simbaan wenno nabalbaliwan dagitoy tapno usaren ti gobierno. Nakondenar dagiti papadi tapno agtrabaho kadagiti kampo a pagtrabahuan, a sadiay adu ti natay. “Iti sidong ti turay ni Joseph Stalin idi arinunos ti dekada 1920 ken 1930,” kuna ti Encyclopædia Britannica, “sinagaba ti simbaan ti nadara a pannakaidadanes a nakatayan ti rinibu a biktima. Idi 1939, tallo wenno uppat laeng nga obispo ti Orthodox ken 100 a simbaan ti opisial a makapagserbisio.”

Nupay kasta, dandani kellaat nga adda nakaskasdaaw a napasamak.

Gubat Sangalubongan II ken Relihion

Idi 1939, ti Poland ket rinaut ti Nazi nga Alemania, a kaaliado idi ti Union Soviet, isu a nangrugi ti Gubat Sangalubongan II. Iti las-ud ti makatawen, sinakupen ti Union Soviet ti naudi nga 4 kadagiti 15 a republikana​—ti Latvia, Lithuania, Estonia, ken Moldavia. Ngem idi Hunio 1941, inyusuat ti Alemania ti nasaknap a panangrautna iti Union Soviet, a naan-anay a nangkellaat ken Stalin. Iti arinunos ti tawen, nakadanonen dagiti buyot ti Alemania iti kaparanget ti Moscow, ket kasla asideg idin a maabak ti Union Soviet.

Gapu iti pannakaupayna, insagana ni Stalin ti nasion iti inawagan dagiti Ruso a Dakkel a Patriotiko a Gubat. Nabigbig ni Stalin a masapul nga isublina ti dadduma a kalintegan ti simbaan tapno suportaran dagiti tattao ti pannakigubatna, tangay minilion pay laeng kadakuada ti relihioso. Ania ti nagbanagan ti nakaskasdaaw a pannakabalbaliw ti paglintegan ni Stalin maipapan iti relihion?

Babaen ti pannakitinnulong ti simbaan, nagsagana dagiti umili ti Russia a makigubat, ket idi 1945 nakaskasdaaw ti panangabak dagiti Soviet kadagiti Aleman. Idi naisardeng ti panangraut ti Soviet iti relihion, immadu dagiti simbaan ti Orthodox agingga iti 25,000, ket nagbalin a 33,000 ti bilang dagiti papadi.

Rimmaut Manen

Ngem kinapudnona, saan a nagbalbaliw ti kalat dagiti pangulo ti Soviet a pukawen ti panamati iti Dios iti panunot ti tattao. Inlawlawag ti The Encyclopedia Britannica: “Indauluan ti Primero Ministro a ni Nikita Khrushchev ti baro a panangbusor iti relihion idi 1959-64, ket bimmassit dagiti nalukatan a simbaan agingga iti kurang a 10,000. Nabutosan ni Patriarka Pimen idi 1971 kalpasan ti ipapatay ni Alexis, ket uray no minilion pay la ti nasungdo iti simbaan, saan a sigurado ti masakbayanna.”b

Isalaysayminto no kasano a naispal ti Russian Orthodox Church iti panangraut manen ti Soviet. Ngem ania ti kasasaad ti dadduma a relihion iti Union Soviet? Siasino kadagitoy ti nangnangruna a nakaipamaysaan ti panangraut, ken apay? Maisalaysay daytoy iti sumaganad nga artikulo.

[Dagiti Footnote]

[Ladawan iti panid 3]

Inawagan ni Lenin a ‘makarimon unay ti aniaman a kapanunotan maipapan iti Dios’

[Credit Line]

Musée d’Histoire Contemporaine​—BDIC