Panangdadael Kadagiti Pader Tapno Maibangon Dagiti Rangtay
DITAY pinili ti pamilia wenno nasion a nakayanakantayo, wenno inkeddeng ti kultura a nangtubay iti panagpampanunottayo. Ditay nakontrol dagita a bambanag. Agpannuraytay amin iti tiempo ken kasasaad. Ngem makontroltayo no kasano ti panirigantayo kadagiti sabsabali ken no kasano ti panagtignaytayo kadakuada.
Deskribiren ti Biblia no kasanotay a maaramid dayta. Usigenyo dagiti sumagmamano a prinsipio a tumulong kadatayo a mangibangon kadagiti rangtay iti komunikasion kadagidiay a naggapu iti tinaudan a naiduma iti tinaudantayo.
“Ti Dios a nangaramid ti lubong ken dagiti isuamin a bambanag nga adda iti dayta . . . inaramidna ti tunggal nasion dagiti tattao manipud iti maysa a tao, tapno agnaed iti intero a rabaw ti daga.” (Aramid 17:24, 26) Miembrotay amin iti isu met laeng a natauan a pamilia ket iti kasta adut’ nagpapadaantayo. Ti panangsapul iti bambanag a nagpapadaantayo pagbalinenna a nalaklaka ti komunikasion. Tarigagayantay amin dagiti naimbag a gagayyem ken masapul a makariknatayo a maay-ayat ken mararaemtayo. Tunggal maysa sapulenna ti panangliklik iti pisikal ken emosional nga ut-ot. Pagay-ayat ti tattao iti amin a kultura ti musika ken arte, mangisalaysayda kadagiti pagkakatawaan, mamatitayo iti panagpipinnadayaw iti maysa ken maysa, ken sapulentayo dagiti pamay-an ti panagbalin a naragsak.
“Awan ti aniaman nga aramidenyo gapu iti kinamannakirupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a dagiti dadduma nangatngatoda ngem dakayo.” (Filipos 2:3) Di kayat a sawen daytoy nga ibilangtayo ti dadduma a natantan-ok ngem datayo iti amin a banag. Imbes ketdi, rumbeng a bigbigentayo nga iti dadduma a benneg ti biag, natantan-ok ti dadduma. Ditay koma pulos pagarupen a datayo wenno ti kulturatayo bukbukodanna amin a naimbag.
“Pudno, ngarud, bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti isuamin.” (Galacia 6:10) Ti basta panangikagumaan nga agbalin a mannakigayyem ken mannakitulong iti sabsabali, aniaman ti tinaudanda a kultura, adut’ maaramidanna a mangrangtay iti di panagkinnaawatan iti komunikasion.
“Ammuenyo daytoy, dungdunguek a kakabsat. Tunggal tao masapul a nasiglat koma maipapan iti panagdengngeg, nainayad maipapan iti panagsao, nabannayat maipapan iti panagpungtot.” (Santiago 1:19) Saan laeng nga agsao dagiti naimbag a mannakisarita; masapul nga agbalinda a managdengngeg a buyogen ti pannakipagrikna.
“Ti patigmaan iti puso ti tao kas nauneg a danum; ngem ti tao a mannakaawat maaonnanto.” (Proverbio 20:5) Agbalinkayo nga alerto a mangtarus kadagiti rikna ken isyu nga adda iti likudan ti makita a kababalin ti tao. Am-ammuenyo a naimbag ti tattao.
“Itultuloyyo a kitaen, saan a ti personal a panaginteres kadagiti laeng bukodyo a bambanag, no di ket kasta met ti personal a panaginteres kadagiti bambanag ti sabsabali.” (Filipos 2:4) Agbalinkayo a mannakipagrikna babaen ti panangmatmat kadagiti isyu sigun iti panangmatmat ti sabali. Dikay agbalin a managimbubukodan.
Ti Panagduduma ti Kultura Kadagiti Saksi ni Jehova
Makita a talaga nga epektibo dagitoy a prinsipio iti nakaskasdaaw a panagkaykaysa dagiti Saksi ni Jehova, nga aktibo iti 232 a pagilian iti daga. Dagitoy ti tattao a naggapu iti “isuamin a nasion ken kadagiti tribo ken kadagiti il-ili ken kadagiti pagsasao” ken determinadoda a makitunos iti naayat a panangiwanwan ni Jehova iti amin a banag.—Apocalipsis 7:9; 1 Corinto 10:31-33.
Saan a laisen dagiti indibidual a Saksi ti kultura ti sabsabali. Ket saan met a laksiden dagidiay agbalin a Saksi ti kultura a nakapadakkelanda, malaksid no daytat’ di umanamong kadagiti prinsipio iti Biblia. Kadagita a kaso, mangaramidda kadagiti panagbalbaliw iti biagda. Bigbigenda nga iti tunggal kultura adda dagiti nadayaw a kasasaad ket mapasayaat pay dagitoy kadagiti tattao a mangawat iti pudno a panagdayaw.
Ikagumaanda a matmatan ti planetatayo a kas iti panangmatmat ti Dios iti dayta—naraniag ken asul ken napintas—nga agrikrikus iti law-ang. Daytat’ maysa a planeta nga addaan iti nakaskasdaaw a nagduduma a tattao ken kultura. Segseggaan dagiti Saksi ni Jehova ti tiempo inton tagiragsakenen ti amin ditoy daga ti biag kas pudpudno a nagkaykaysa a pamilia.
[Ladawan iti panid 8]
Nasursuro dagiti Saksi ni Jehova nga ikkaten dagiti lapped iti kultura