Ania Ngata a Pagilian Dayta?

Kadawyan a matmatan ti tattao kadagiti napanglaw a pagilian ti panangpasuksok, panagkunniber, ken kinapanglaw kas pakabigbigan dagiti pagilian ti Africa ken Latin-America. Isu nga ania ngata a pagilian ti pagaplikaran ti sumaganad a naadaw a sasao?

“Agulbod dagiti ministro ti gobierno, maibalud dagiti negosiante gaput’ panagkunniber, matiliwan dagiti agserserbi iti publiko a mangaw-awat kadagiti pasuksok, di mapagtalkan dagiti politiko, ken maim-imatangan [dagiti politiko] kas dakes ti pakasarsaritaanda, mangnginum, ken nagaramugam iti sekso. . . . Iti intero a pagilian, kanayon dagiti panagtakaw kadagiti highway. . . . Napakuyogan dagiti pangkaaduan a krimen iti napartak nga iyaadu ti panagkunniber iti industria, iti panagipuonan, ken iti serbisio publiko. . . . Sangapulo ket maysa a milion a tattao ti awanan ita iti tallo wenno nasursurok a kangrunaan a kasapulan iti biag, . . . . ket ti bilang dagiti nakurapay​—nga awanan iti pito wenno nasursurok kadagiti kapatgan​—ti immadu manipud 2.5 milion agingga iti 3.5 milion.”​—Phillip Knightley, The Australian Magazine.

Umiso met la ngata ti pugtoyo? Ti sungbat isut’ Britania. Ngem nakalkaldaang a komentario dayta iti tiempotayo ta agaplikar payen ti nadakamat iti pinulpullo a pagilian. Anian ti panagkasapulantay unay iti nasayaat, mapagpiaran, nalinteg a turay! Wen, kasapulantayo ti turay ti Dios babaen iti dayta a Pagarian nga insuro ni Jesus nga ikararag dagiti pasurotna, “Umay koma ti pagariam.”​—Mateo 6:10.