Ti Panangmatmat ti Biblia

Dagiti UFO​—Mensahero a Naggapu iti Dios?

BAYAT nga agngudo ti maika-20 a siglo ken kumarkaro dagiti kasasaad ti daga, agtultuloy nga agsaksaknap ti panamati iti unidentified flying objects (UFO’s) ken dagiti pasaheroda, dagiti extraterrestrial a parsua. Parparbo laeng kadi dagiti UFO, panangallilaw, panangloko nga itantandudo dagiti tattao a mayat a mangkatawa iti pannakaallilaw ti publiko?

Dagidiay agkuna a nakakitadan kadagiti UFO wenno extraterrestrial a pasahero iramanna dagiti kasla normal, mapagtalkan a tattao; kinapudnona, dagidiay mamati kadagitoy a sangaili manipud sabsabali a planeta iramanda dagiti nangatot’ adalda a propesor ken sientista. Kombinsidoda nga agpalpaliiw dagiti extraterrestrial kadagiti tattao ken, pasaray makikomunikarda kadakuada. Sidadaan dagiti maawagan kano a grupo dagiti extraterrestrial a mangted iti moral a suporta a tumulong iti tattao nga agkuna a nakasaritadan dagiti sangaili manipud law-ang.a

Plano Dagiti Ganggannaet a Mangispal

Iti Aliens Among Us, ininterview ni Ruth Montgomery ti sumagmamano kadagiti umad-adu a tattao a kombinsido nga extraterrestrial-da a sangaili nga agnanaed kadagiti natauan a bagi. Impadles ti dadduma kadagitoy nga agkuna a nagbalinda a tattao nga extraterrestrial nga inton tawen 2000, addanto “kosmiko a pasamak nga insagsaganan dagiti hirarkia ti anghel ken batido.” Patien ti dadduma a tattao a dagiti extraterrestrial ti mangus-usar kadagiti UFO a mangkolekta ken mangitalimeng kadagiti specimen ti mula ken ayup wenno mausarto dagiti UFO kas pangispal a lugan iti law-ang tapno mayakar ti minilion a tao manipud iti umas-asidegen a pannakalangalang ti daga. Kalpasan ti dakkel a pannakadadael, maisublinto ti tattao ditoy daga tapno rugianda “ti Baro a Panawen ken Baro nga Urnos” ti naespirituan a pannakaammo. Maysa nga agtutubo a lalaki a taga Colorado, E.U.A., a miembro ti grupo a mangawag iti bagida nga “Alien Youth,” ti sipapasnek a nangibaga iti Agriingkayo!: “Ur-urayenmi nga aggagayyem dagiti ganggannaet nga inapomi a mangyakar kadakami kadagiti pangispal a lugan.”

Kuna ti sumagmamano kadagidiay mangipatangken nga extraterrestrial-da nga iturturong kano ida ti Dios, ket kuna ti dadduma a siwayawaya a makasaritada tapno agpabalakadda iti pannakaandingay ti sangatauan. Mangus-usar kadi ti Dios kadagiti sangaili manipud sabsabali a planeta tapno maispal ti sangatauan manipud iti sumungsungad a sangalubongan a pannakadadael?

Dagiti Pannakikomunikar ti Dios iti Sangatauan

Idi karrugi ti pakasaritaan ti tao, nakikomunikar ti Dios iti tattao. Iladawan ti rekord ti Biblia dagiti nadiosan a pannakisaritana kada Adan ken Eva, Noe, Abraham, ken dadduma pay.b (Genesis 3:8-10; 6:13; 15:1) Nausar dagiti tagtagainep, timek, ken sirmata tapno maikomunikar ti pagayatan ti Dios ken mapataud ti Biblia. Nupay kasta, kalpasan a nairingpas ti Biblia, kasapulan pay kadi ti direkta a nailangitan a komunikasion iti sangatauan? Saan, tangay kuna ti Biblia a ti Nasantuan a Kasuratan pagbalinenna “ti tao ti Dios [a] naan-anay koma a makabael, naan-anay a nakabalan maipaay iti tunggal naimbag nga aramid.” (2 Timoteo 3:17) Sigun iti Biblia, ti panangiwanwan kadagitoy a nariribuk a panawen agtaud iti naisurat a Sao ti Dios. Nupay kasta, adda kadi aniaman a rason a pamatian a makaawattay iti komunikasion wenno naisangsangayan nga instruksion a direkta manipud Dios babaen ti maysa nga extraterrestrial a pannakangiwat? Saan, ta kinuna ni apostol Pablo: “Uray no dakami wenno ti maysa nga anghel manipud langit ideklarana kadakayo kas naimbag a damag ti maysa a banag a nalablabes ngem iti indeklarami kadakayo kas naimbag a damag, isu mailunod koma.”​—Galacia 1:8.

Nupay kasla maitunos kadagiti padto ti Biblia ti ipatangken dagiti maipagarup nga extraterrestrial a parsua a ti daga asidegen a maipasidong iti dakkel a didigra a mangbalbaliw iti langana, mangitukonda iti pamay-an ti pannakailasat nga agpannuray kadagiti parsua. Saan nga iparparegta ti Biblia nga agkamang ti tattao iti maipagarup a kinatalged dagiti ganggannaet a lugan iti law-ang wenno aniaman a sabali pay a lugar. Imbes ketdi, saritaenna kadatayo a sapulentayo ti pannalaknib iti dedikado a pannakirelasion iti Dios, a dayta a dedikasion ti isimbolo ti bautismo iti danum. (1 Pedro 3:21; idiligyo ti Salmo 91:7; Mateo 28:19, 20; Juan 17:3.) Ket kinuna ni Jesus a “ti nakapagibtur agingga iti panungpalan isunto ti maisalakan.”​—Mateo 24:13.

Saan kadi nga ipaganetget dagitoy a kasuratan ti naespirituan a pannakirelasion iti Dios agpaay ti pannakaisalakan imbes nga iti pisikal a lugar a pagkamangan? Gapuna, imbes a matulongan ti sangatauan a makalasat, dagiti estoria maipapan kadagiti ‘saan a tao a parsua’ ti mangisiasi iti atension ti tattao iti aktual a kalikaguman ti Dios agpaay ti agnanayon a pagimbaganda.

Asino ti mabalin a mangikagkagumaan a mangisiasi iti sangatauan manipud iti pamay-an ti Dios a pangilasat, ngem kaskasdi a kunada nga ireprepresentarda ti Dios? Kuna ni Ed Conroy iti librona a Report on Communion, a “dagiti serioso nga ufologist [dagidiay mangad-adal kadagiti UFO] nga addaan pannakasanay iti sikolohikal ken sosial a siensia” iramanna dagiti mamagdilig a pannakaadal “‘dagiti sangaili iti siled a pagiddaan,’ al-alia, mamaw, marmarna, narelihiosuan a sirmata, ken dagidiay maibilang a sairo.” Kunaen ti adu nga ufologist ken dagidiay agkuna nga extraterrestrial-da iti natauan a kasasaad a gistay saan a kasapulan ti panangusar kadagiti lugan iti law-ang a pagbiahe. Kunada a makapagbiahe dagitoy a parsua a di makita ken makapagpakitada iti sadinoman ditoy daga a din kasapulan a sumangpetda babaen iti lugan iti law-ang.

Mamakdaar ti Biblia a desidido da Satanas ken dagiti sairona a mangyaw-awan iti sangatauan. Gunggundawayanda ti pannakapaay ti sangatauan ken ti kinaawan namnamana a mangitukon kadagiti makaay-ayo, ngem palso a solusion. (2 Corinto 11:14) Isu a mamakdaar ti Biblia: “Kadagiti maud-udi a periodo ti tiempo umikayto dagiti sumagmamano manipud iti pammati, nga ipangpangagda dagiti makaiyaw-awan a naipaltiing a sasao ken sursuro dagiti sairo.”​—1 Timoteo 4:1.

Umasping ita, rumbeng a di patien ti aniaman a maipagarup nga isasarungkar ken kasla makagunggona a panangiwanwan manipud kadagita a parsua, aniaman ti mabalin a kitada. Sigurado a maallilaw dagidiay nga ad-adda a mangsurot iti balakad dagiti “extraterrestrial” ngem iti Sao ti Dios​—terible a kamali kadagitoy a napeggad a tiempo.

“Dagiti sangaili manipud law-ang ti natural a maibagay iti nangatngato a kinasensitibo ti Pannakaammo ken Kristo ken addada ditoy tapno tulongan ti sangatauan a sumrek iti nabalitokan a tiempo, a naidedikar iti pannakaidayaw ti Maysa nga Amatayo . . .”​—Ni extraterrestrial a John, manipud iti bituen nga Arcturus, nga agdama nga agnanaed ditoy Daga.

[Dagiti Footnote]