“Unidentified Flying Objects”—Ania Aya Dagitoy?
Ni Betty Cash ken ni Vickie Landrum, agraman ken Colby nga anakna a lalaki, ti nagkuna nga idi Disiembre 29, 1980, ket naisarangda iti pudot, asuk, ken gil-ayab ti maysa nga UFO (di am-ammo nga agtaytayab a banag). Kuna ti report a dineskribirda dayta kas maysa a ‘dakkel a kas-briliante a banag, nga agkalkallautang iti tangatang iti sanguanan ti kotseda iti maysa a langalang a kalsada ti kataltalonan nga asideg ti Huffman, amianan a daya ti Houston, Texas.’ Kas bunga daytoy nga enkuentro, kunada, nagsagabada ti nadumaduma a problema ti salun-at.—Miami Herald, Setiembre 4, 1985.
Impato dagiti babbai a nairaman ti gobierno ti E.U. agsipud ta “di nagbayag ti banag nagtayab a nagpaammianan, a kinuyog ti agarup 23 a tipo-militar a helicopters.” Iti daytoy a report, maysa kadagiti babbai, a ni Vickie Landrum, ti nagkuna nga “amin dagiti tallo nagsagabada ti panagluptak ti kudilda, nagregreg ti buokda, maul-ulawda ken agsakit ti uloda. Patien ni Landrum a ti agtaytayab a banag ti nangipugso ti maysa a tipo ti radiasion a namagbalin met kadagiti tattao a sensitibo iti lawag ti init.” Indarumda ti gobierno iti kinaliway.
Babaen ti adda ti ngato ken dadduma pay nga estoria ti damdamag, dagiti UFO ti masansan a mangal-alat’ atension ti publiko. Kas insurat ni Philip J. Klass idiay UFOs—The Public Deceived: “Ti namnama a makasarak ti intelihente a biag iti dadduma a lugar nasaknap panangallukoyna, ket ti panagsirarak iti dayta ti nangatrakar ti atension, ken panagregget, dagiti adu a nalalaing a sientista.” ‘Ngem apay nga ita laeng?’ insaludsod ni Edward Dolnik idiay The New Republic iti Agosto 1987, iti sidong ti paulo a “Dagiti Asideg nga Enkuentro.” Ti sungbatna ket: “Ti kangrunaan a panangilawlawag ita ket maipapan iti nauneg ken apokaliptiko a panagbuteng a nainaig iti iyaadanin ti milenio,” kayatna a sawen, bayat nga umadanitayon iti tawen 2000.
Mamati Aya dagiti Tattao iti UFO’s?
Mamatikay aya kadagiti UFO’s? Adda kadi nakitkitayon iti tangatang no rabii a namagsiddaaw kadakayo? Addaankay man ti apokaliptiko a panagbuteng wenno naallukoy babaen ti dadduma a kapadasan, adu itatta ti mamati kadagiti UFO. Iti salaysayna, kuna ni Dolnik nga ipamatmat ti Gallup Poll a “57 porsiento kadagiti edukado iti kolehio nga Americano ti mamati kadagiti extraterrestrials.” Innayonna pay: “Kadagiti Americano nga awanan edukasion iti kolehio, bumaba ti bilang iti 46 porsiento.”
Kadagiti napalabas, dagiti report ti UFO ti kaaduan a mangiladladawan kadagiti karkarna ken di kasisigud a buybuya iti langit wenno no maminsan iti nakaas-asideg. Ngem, iti nabiit pay, kasla dagitat’ nainaig iti aglawlaw ti aktual a pannakaidenna iti tao. Dagitoy a pannakaidenna ti makunkuna no maminsan a kadagiti “ganggannaet” a kunada a mangkumaw kadagiti tattao. Ipamatmat dagiti salaysay a ti ranta dagiti “ganggannaet” no maminsan ket ramanenna dagiti biolohikal wenno uray pay genetiko a panageksperimento kadagiti tattao. Dagitoy a panagkuna ti nagserbi a mangiturong manen ti atension ti publiko iti tema maipapan kadagiti UFO.
Dagitoy kunada a pannakakita ken pannaki-enkuentro sapasap ti saklawenna. Kas pangarigan, maysa ket ramanenna ti maysa a lalaki a taga Switzerland. Iti unos ti lima a tawen, naikuna, nga isu ti “nakaipakita ti ginasgasut a nararaniag, detaliado a retretrato. Nairekordna met dagiti aweng ti ‘beamships,’ nakakolekta ti sumagmamano a sampel ti metal, naipelikulana ti lugan iti panagtayabna.” Ti salaysay ti nangituloy: “Dinosdosena a saksi ti nakakita iti naraniag a lugan ken pinaneknekanda ti nakaskasdaaw nga estoria [ti lalaki]. Ti ebidensiana, nga inembestigar ti maysa a propesional a bunggoy ti seguridad nga indauluan ti retiradon a koronel ti U.S. Air Force, ineksamin dagiti sientista ti IBM, ti Jet Propulsion Laboratory ti NASA, ti Arizona State University, ken ti aeronautics a kompania ti McDonnell Douglas.”
Dagitoy nga estoria kaskasdi a mangmangngeganda. Maysa kadagiti makapainteres unay ti nagparang idiay The Tampa Tribune, ti Enero 30, 1989. Intampokna ti de kolor nga ilustrasion ti maysa a “lugan ti law-ang” a naretrato idiay kaparanget ti Gulf Breeze, Florida. Ti salaysay ket ramanenna dagiti kapadasan ti maysa a lalaki a maaw-awagan Ed. Ti pannakailadawan ti umuna a pannakaidenna a napasamak isut’ sumaganad: “Idi sumirip kadagiti sarming a ruangan ti kuartona, kuna ni Ed, isut’ naipasango a rupanrupa iti kas ubing a parsua a nakakawes ti dimmapo a pagan-anay.” Dagitoy nalatak a pannakaidenna napasamakda iti nawatiwat a panawen, a nagadu a retretrato ti innal-ala ni Ed. Nupay kasta, awan retretrato a nagparang kadagiti periodiko.
Gapu kadagiti nakaskasdaaw a report dagiti enkuentro nga agparparang kadagiti pagiwarnakan, kadagiti periodiko, ken dagiti libro nga adda iti listaan dagiti kakaaduan a malaklako, isalsaludsod dagiti tattao, Ania ngata amin dayta? Pudno aya dagiti UFO, wenno batek laeng dagiti imahinasion? Adda aya aniaman a rekord dagita iti historia? Posible ngata nga adda panangilawlawag a manglab-aw ti agdama a siensia? Dagitoy ken dadduma pay a salsaludsod ti mausig kadagiti sumaganad nga artikulo.