Manipud Managbasatayo
Agpegpeggad a Planeta Nakapagsuratak maipapan iti serye a “Ti Agpegpeggad a Planetatayo—Maispalto Kadi?” (Enero 8, 1996) Nagsayaat a mabasa ti maysa a banag a makaparegta. Mangted kadatayo ti maikatlo nga artikulo kadagiti serye iti namnama a Paraiso, a sadiay ditayton pagdanagan ti maipapan iti ecosystem wenno dagiti abut iti ozone layer! Manginanamaak nga agbiagakto iti dayta a Paraiso a kadua ti pamiliak ken gagayyemko.
A. C., Estados Unidos
Nagustuanmi ti makaisuro a kahon iti pinanid 8 ken 9 a nangtaming kadagita a parikut a kas iti pannakakalbo ti kabakiran, kinakiddit ti danum, ken agpegpeggad a pannakapukaw dagiti kita ti biag. Impaawat dagiti artikulo kadakami ti nakaro a kasasaad ita ti mismo a planetatayo. Natalged ti riknami a makaammo a ti kakaisuna a solusion iti daytoy nadagsen a problema agpannuray iti Namarsua kadatayo.
O. P. ken F. J. O., España
Report ni Jessica Kabasbasak “Ti Report ni Jessica” iti Enero 8, 1996 a ruar. Makaparegta dayta kaniak! Pagpannakkelko no adda makitak a nasudi nga agtutubo nga agserserbi ken Jehova a sirarag-o ken simamatalek. Ti pakasaritaan ni Jessica ti mangipalagip kaniak a kasapulan ti panangasaba iti tunggal gundaway.
A. H., Estados Unidos
Nasarakan ti Panggep ti Biag Talaga a nakapikapik iti pusok ti artikulo nga “Awanan Idi iti Panggep ti Biagko Ngem Ita Addaanen.” (Enero 8, 1996) Bayat a binasak, nakitak ti bagik. Agkatangkatang met idi ti nalidem a panangmatmatko iti masanguanan. Ngem naawisak iti Kingdom Hall dagiti Saksi ni Jehova ket rinugiak nga adalen ti Biblia. Ita, siraragsak a makiramramanakon iti amin-tiempo a trabaho a panangasaba, a tultulongak ti sabsabali a makakita iti nakaskasdaaw a namnama nga impakita kaniak ni Jehova.
C. R., Estados Unidos
Panangagas iti Kinalupes Naallukoy ti atensionko iti benneg ti “Panangmatmat iti Lubong” a “Baro a Namnama Kadagiti Di Maaddaan-Anak a Pagassawaan?” (Setiembre 22, 1995) Impakitak dayta iti maysa a biologo, ket kinunana nga awan pay nadamagna maipapan iti nailadawan a pamay-an, a maiserrek ti maysa a semilia ti lalaki iti itlog “iti uneg ti bagi ti babai” babaen iti nakapimpino a sarming a dagum.
E. K., Alemania
Naikugnal ti bennegmi iti maysa a report ti managipadamag nga ahensia ti Francia a France-Presse a mangilawlawag iti lekteur ti maysa a doktor a taga Denmark a ni Anders Nyboe Andersen. Nakalkaldaang ta saan nga umiso ti pannakaireport ti dadduma a banag. Kinuna ni Dr. Andersen iti “Agriingkayo!” a ti microinsemination aktual a maaramid iti vitro, kaipapananna, iti ruar ti bagi ti babai. Kalpasanna, maiserrek iti uneg ti bagi ti babai ti pertilisado nga itlog. Talaga a siuumiso a kinunami a ti pamay-an mabalin nga usarenna ti “semilia ti asawa a lalaki imbes a ti semilia ti di am-ammo a nagidonar—iti kasta maliklikan dagiti sensitibo a moral ken narelihiosuan nga isyu.” No kasta ti kasasaad, rumbeng a personal nga agdesision ti Kristiano a pagassawaan maipapan iti daytoy a pamay-an. (Kitaenyo ti “The Watchtower” a Hunio 1, 1981, panid 31.)—ED.
Nasukir a Gayyem Agsuratak maipapan iti artikulo nga “Agimtuod Dagiti Agtutubo . . . Aniat’ Rumbeng nga Aramidek no Maisarsarak ti Gayyemko?” (Enero 22, 1996) Makatawen itan a nailaksid ti maysa kadagiti kasingedan a gayyemko. Naladingitak idi. Ti panagriknak ket kasla diak unay natulongan, nagkurang ti tiempok kenkuana, ken saanak a nagbalin a naimbag unay a gayyem. Idi nabasak a diak basol ti ipapanawna iti kinapudno, nariknak a naikkat ti kasla nagdakkel a dadagsen kadagiti abagak!
L. T., Estados Unidos
Iti kasasaadko, ti tao a nadekket kaniak a nangrugin a “mangtulad iti mapagduaduaan nga estilo ti panagbiag” saan la a ti kakaisuna a gayyemko no di pay ket ti din masukatán ken nadungngo nga inak. Nagbanaganna, inyumanko kadagiti panglakayen iti kongregasion ti kasasaadna, ket nailaksid. Sinidirko ti bagik iti panangibagak kadagiti panglakayen. Ita, ikagkagumaak a parmeken ti di umiso a pannakariknak iti basol babaen ti panangyaplikarko kadagiti singasing iti artikulo.
I. Y., Japan