Ti Singgalut ti Ina Kadagiti Annakna
ISUT’ maysa la a naitawtaw, saan unay a burboran, awanan nagan a pusa nga addaan lima a kuting, a mangikagkagumaan nga agbiag kadagiti nakapimpiman nga eskinita ti East New York. Nangaramid iti balayna iti maysa nga agrakrakaya, nabaybay-anen a garahe a naglasat iti adun a mapagduaduaan nga uram. Ti sangakaarrubaan ti pagsawaranna idi kadagiti tedtedda a basura a mabalin nga ipakanna iti dumakdakkel nga annakna.
Amin daytoy ti dandani idin a mabalbaliwan iti alas 6:06 iti agsapa ti Marso 29, 1996. Maysa a mapagduaduaan nga uram ti dagus a nanglamut iti garahe. Maur-uramen ti pagtaengan ti pamilia a pusa. Dagus a nagtignay ti Ladder Company 175 ket di nagbayag nakontroldan ti uram. Nangngeg ni David Giannelli, maysa kadagiti bombero, ti sangit dagiti kuting. Nasarakanna ti tallo kadakuada iti mismo a ruar ti pasdek, ti sabali pay iti tallo kakapat iti dalan a ballasiw ti eskinita, ken ti maikalima iti igid ti dalan. Bassiusit pay laeng dagiti kuting tapno maispalda ti bagbagida. Napaliiw ni Giannelli a nagduduma ti kinakaro ti sinit ti tunggal kuting, daddumat’ naguray iti napapaut a pannakaispal bayat a sinaggaysa nga inruar ida ni nanang a pusa.
Daytoy ti report nga itden ti salaysay iti Abril 7, 1996 a Daily News ti New York maipapan iti sasaaden ti ina ken ti kinadungngona: “Natakuatan ni Giannelli ni mamang a natumba nga agpapaut-ot iti asideg ti bakante a lote, ket dayta a buya ti namagleddaang iti pusona. Limteg dagiti nakakidem a matana gapu iti asuk. Nakarot’ pannakasinit dagiti dapanna. Adda nakaam-amak a nagnaan ti uram iti rupa, lapayag ken gurgurongna. Nakakita ni Giannelli iti karton. Siaannad nga inkabilna ni mamang a pusa ken dagiti kuting iti uneg. ‘Saanna man la a maimulagat dagiti matana,’ kinuna ni Giannelli. ‘Ngem sinagidna ida a saggaysa babaen iti sakana, a binilangna ida.’”
Idi simmangpetda iti North Shore Animal League, peligroso ti kasasaad. Intultuloy ti salaysay: “Nausar dagiti droga a pangkontrol iti panagaligaget. Nasuero iti antibiotiko ti natured a pusa. Siaannad a napulagidan iti antibiotiko a krema dagiti sinitna. Kalpasanna, naikabil iti maysa a tangkal nga addaan iti tangke ti oxygen tapno tumulong iti panagangesna bayat a sisesegga a naguray ti amin a trabahador iti animal league . . . Iti uneg ti 48 nga oras, nagtugawen ti banuar. Nagmulagaten dagiti limteg a matana ket awan nakita dagiti doktor a depekto.”
Agtuken ken agpanunotka. Darepdepem man iti apagbiit daytoy a natured nga ina, a nakaisigudanna ti mabuteng iti uram, a sumarsarakusok iti napnuan-asuk, maur-uram a pasdek tapno ispalen dagiti agsangsangit nga annakna. Nakaskasdaaw ti maminsan nga isasarukusok tapno iruar dagiti bassiusit ken kakaasi a kutingna; nagrigat a panunoten ti panangaramid iti dayta iti maminlima a daras, nga iti tunggal isasarakusok ti mapakuyogan iti panaas ti kanayonan a pannakasinit ti saksaka ken rupana! Napanaganan ti natured nga ayup iti Scarlett agsipud ta eskarlata, wenno nalabaga dagiti makita a nauneg a sinit iti kudilna.
Idi dagus a nairakurak daytoy a makapikapik a pakasaritaan ti singgalut ti ina kadagiti annakna iti intero a lubong manipud North Shore Animal League, agkarakiriring dagiti telepono. Nasurok nga 6,000 a tattao manipud iti adayo a lugar a kas iti Japan, ti Netherlands, ken South Africa ti immawag tapno damagenda ti kasasaad ni Scarlett. Agarup 1,500 ti nangibaga nga amponenda ni Scarlett ken ti annakna. Maysa a kuting ti natay idi agangay.
Inapektaran ni Scarlett ti puso ti tattao iti intero a lubong. Pagpanunotennaka no ngata ti kinamapagwadan ni Scarlett iti singgalut ti ina kadagiti annakna ti saan a mangkonsiensia iti minilion ita nga inna a mangiregregreg iti annakda nga adda pay laeng iti aanakanda wenno papatayenda ida kalpasan unay ti panagpasngayda babaen ti panangabuso.
[Picture Credit Line iti panid 24]
North Shore Animal League