Manipud Managbasatayo

Panagragragsak Umanamongak nga adu ti natalged a pamay-an tapno makapagragragsak dagiti agtutubo, kas nadakamat iti artikulo nga “Agimtuod Dagiti Agtutubo . . . Kasano a Makapagragragsakak?” (Setiembre 22, 1996) Mabalinmi ti mapan iti museo wenno zoo wenno agpiknik wenno agpadaya. Makapagragragsak uray dagiti bassit ti makukuartada a kas kadakami babaen ti panangawis iti dadduma nga agtutubo iti balaymi tapno agay-ayam wenno mangan.

V. A., Brazil

Banuar a Pusa Kayatko nga ipakaammo kadakayo nga apresiarek unay ti artikulo a “Ti Singgalut ti Ina Kadagiti Annakna,” a nagparang iti Setiembre 22, 1996, a ruar. Agnanaedak iti pagilian a nalulok dagiti seksual nga aramid ken adu a babbalasitang ti di agkitakit nga agparegreg. Patiek a ti ina a pusa a napanaganan iti Scarlett ket nagsayaat nga ulidan nga ina a mangipangpangag iti konsiensiana.

E. B., Mali

Naragsakanak a nangbasa iti pakasaritaan ni Scarlett, a nangipakita iti naan-anay a kinatured iti panangispalna kadagiti kutingna iti maur-uram a garahe. Pinagpanunotnak a nupay maysa la a pusa, adut’ masursuro dagiti tattao kenkuana. Nagsayaat man ta mangipabpablaakkayo kadagiti kasta nga artikulo.

D. W., Alemania

Ti makapikapik-puso a pakasaritaan ni Scarlett ket dagiti kutingna ti kabibilgan pay laeng nga artikulo a nabasak a nangpuntiria iti panagparegreg.

J. G., Estados Unidos

Diak malapdan ti agsangit idi nabasak ti artikulo. Pagay-ayatko ti amin a kita ti animal ken apresiarek dagiti leksion nga isursuro ni Jehova babaen kadakuada. Maladingitanak unay a makaammo a dagiti “nasaririt” a tattao ti di man la mangipakita iti umasping a panangisakit ken atension kadagiti annakda.

C. C., Estados Unidos

Panagwengweng ti Lapayag Pagyamanan unay iti artikulo a “Panagwengweng ti Lapayag​—Uni nga An-anusan?” (Setiembre 22, 1996) Innem a tawenen nga agsagsagabaak iti dayta. Pagamkak idi nga addaanak iti sakit a din maagasan agsipud ta awan doktor a nakaibaga kaniak iti eksakto a pangawag iti kasasaadko. Ti panangbasak iti artikuloyo ti nangpatalinaay iti riknak. Ita, ikagkagumaak nga anduran dayta bayat nga ur-urayek ti baro a lubong ti Dios, a sadiay awanton ti masakit.​—Isaias 33:24.

C.F., Italia

Gistay sangapulon a tawen a sagsagabaek daytoy a parikut. Nagrigat a panunoten a kanayon a mangngegak daytoy nga uni! Ngem ita, masursurokon nga anusan daytoy nauni a lapayagko. Segseggaak ti panawen inton, gapu ken ni Jehova, mangngegakton ti KINAULIMEK!

J. S., Czech Republic

Dua ket kaguduan a tawen nga agwengwengweng ti lapayagko ken naglasatakon iti amin a kita ti panangeksamen ti doktor, agraman ti CT scan ti utek. Ti danag ken tension ket makapaupay a parikut iti biagko. Tangay nabasakon ti artikuloyo, masursurokon nga ibturan ti sakit.

M. G. T. F., Sri Lanka

Agwengweng ti lapayag ni lakayko. Nakaro pay ti panagleddaangna. Daytoy nga impormasion ti timmulong kaniak nga ad-adda a makipagrikna kenkuana. Pasaray makapasuron kenkuana ti uni, ket bigbigek a diak unay idi mannakipagrikna ngem iti rumbeng koma nga aramidek. Apresiarek unay ti lohikal a pannakaisurat daytoy nga artikulo. Siguradoak a tumulongto iti adu nga assawa dagiti agwengweng ti lapayagda tapno agbalinda nga ad-adda a mannakaawat.

L.F., Estados Unidos