Nakautibokami Kabayatan ti Iyaalsa iti Pagbaludan

ITI agarup alas tres ti malem ti Sabado, Marso 30, 1996, simmangpetkami kada Edgardo Torres, ken Rubén Ceibel idiay Sierra Chica Maximum Security Prison, idiay probinsia ti Buenos Aires, Argentina. Nupay nadisenio a manglaon iti agarup 800 a balud, aglaon daytoy a napusek a pagbaludan iti 1,052 a nasentensiaan a kriminal. Manipud panagtakaw agingga iti agtutupatop a panangpapatay ti naaramidda a krimen. Addakam sadiay kas sangaili.

Para kada Edgardo ken Rubén, maysa daytoy iti adu a Sinabado a panagsublisubli iti daytoy nalatak a pagbaludan. Kas papanglakayen iti lokal a kongregasion dagiti Saksi ni Jehova, regular a sumarsarungkarda sadiay tapno mangidiskurso iti linawas a palawag iti Biblia iti ag-15 a balud. Para kaniak, maysa nga agdaldaliasat a manangaywan, manmano daytoy a gundaway, tangay pulos a diak pay nangidaulo iti maysa a gimong iti pagbaludan.

Adda 12 a selda iti pagbaludan a sukog-paypay ti pannakadiseniona. Bayat a simrekkami kadagiti pasilidad, nakitami iti pangadaywen ti uppat a balud a sigaganaygay a mangpaypayapay kadakami. Rimmang-ayen dagitoy a balud iti panagadalda iti Biblia agingga iti punto a nagbalindan a di-bautisado a manangaskasaba iti naimbag a damag ti Pagarian ti Dios. Dagus a nakuyogkami iti selda 9, a pakaangayan ti gimongmi. Adda siled sadiay a napintaan ken nakurtinaan, a mangted iti natakneng a langana.

Mangrugin ti Iyaalsa

Ngem adda karkarna. Adda 12 laeng a balud a timmabuno imbes a ti kadawyan a 15. Nasdaawkam amin. Nangrugi ti gimong a kas iti gagangay, babaen iti kanta ken kararag. Kalpasan ti sumagmamano a minuto, nakigtotkami kadagiti napigsa nga uni ti kanalbuong a napasarunuan kadagiti pumarakpak nga uni ti masinggan. Kalpasanna, nakangngegkami kadagiti ikkis ken riaw. Nangrugin ti iyaalsa iti pagbaludan!

Sumagmamano a nakakaputsa a balud a naarmasan iti sinsinan nga imuko ti simrek iti siled a paggigimonganmi. Nasdaawda a nakakita kadakami​—tallo a sangaili! Dagus a kinuyogdakami nga umulog iti napnuan-asuk a pasilio. Addada mapupuoran a kutson ti kama, agtataray a balud iti nadumaduma a direksion, ken nasugatan a guardia a napadata iti suelo. Nalbon iti uram ti torre ti guardia iti tengnga ti pagbaludan gapu iti naaramid-balay a bomba. Naipankami iti ruar ken napilit nga agtakder iti agarup 50 a metro manipud iti kangrunaan nga alad. Iti diretso a panagtannawagmi, makitami dagiti polis ken guardia iti pagbaludan iti ruar ti alad a mangipatpaturong iti paltogda kadakami. Aglemlemmeng iti likudanmi ti maysa a grupo dagiti balud, a mangipatpaturong kadagiti imukoda iti karabukobmi. Us-usarendakam kas natauan a kalasag.

Ad-adu pay a Kautibo

Lima nga oras kalpasanna, kalpasan ti ilelennek ti init, maysa a doktor ti pinalubosan dagiti lider ti derraaw a sumrek iti pagbaludan tapno agasanna dagiti nasugatan. Nakautibo met ti doktor. Kamaudiananna, agarup alas nuebe ti rabii, naipankami iti ospital ti pagbaludan. Sadiay a naikaduakami iti maysa a grupo dagiti guardia a nakautibo met. Ita, pinilit dagiti managderraaw amin a kautibo nga agserbi iti nadumaduma a batang kas natauan a kalasag.

Kalpasan ti ababa a tiempo, napalubosan ti maysa a hues ken ti sekretariona a makisarita kadagiti managderraaw, iti gandat a mangareglo iti bambanag a sitatalna. Ngem kimmaro ti krisis idi a silalais a kinautibo ida dagiti balud.

Adda binaetbaet a panaglalaban iti agpatnag. Inkagumaanmi ti maturog, ngem no kada makaridepkamin, maysa a napigsa nga ikkis ti mangbugtak iti ridepmi. Kalpasanna, iti nasapa unay nga oras ti bigat, dimteng manen ti batangmi nga agserbi kas sibibiag a kalasag.

Kumaro ti Kinaranggas

Idi Domingo, Marso 31, ti maikadua nga aldaw ti iyaalsa, kimmaro ti kasasaad. Saan a makapagaanamong dagiti lider ti derraaw kadagiti kalikagumda. Nangpataud daytoy iti pungtot ken naranggas a kasasaad. Dimmawel dagiti grupo dagiti managderraaw, a dinadael ken pinuoranda amin a mapagnaanda. Narisut dagiti nabayagen a susik babaen iti kinaranggas ken pammapatay. Napapatay ti sumagmamano a balud a nagkitakit a makiraman iti derraaw. Dadduma a bangkay ti naipisok iti pagurnuan ti panaderia tapno mapuoran.

Nagraira amin a sayangguseng ken agsisimparat a damag maipapan iti pannakabulosmi iti uneg ti pagbaludan. Daytat’ kellaat ken nangapektar unay iti riknami kas nakautibo. No dadduma, napalubosankami nga agbuya iti damag iti telebision. Nasdaawkami a nangbuya no kasano a nakaad-adayo manipud iti kinapudno ti salaysay ti telebision. Makapaupay daydi.

Kasano a nadaeranmi? Impamaysami ti agkararag, agbasa iti Biblia, ken mangisarsarita iti sabsabali maipapan iti karkari ti Biblia a naragsak a masanguanan. Daydi ti tulbek ti pannakapabileg ti riknami kabayatan ti rigat.

Idi Lunes, nagaanamong dagiti lider ti derraaw a rugian ti pannakinegosasion kadagiti autoridad. Kaslattay asidegen ti panagpatingga ti iyaalsa. Inusar dagiti managderraaw ni Edgardo ken sumagmamano a guardia iti pagbaludan kas kalasag idi rimsua ti panagpipinnaltog dagiti dadduma a balud. Kas resulta ti pannakakirokiro, nagpaputok dagiti polis, iti panangipagarupda a napaltogan dagiti kautibo. Nakalasat ni Edgardo iti pumarakpak a panagtayab dagiti bala, ngem napaltogan ti dadduma kadagiti nakautibo a guardia.

Kaslattay Asidegen ni Patay

Impandakam a kautibo iti atep tapno ipakita kadagiti autoridad a sibibiagkam pay laeng. Ngem agkarapaltog latta dagiti polis. Daytoy ti namagpungtot kadagiti managderraaw. Sangsangkagiddan a nagriaw ti tunggal maysa. Daddumat’ nangyikkis iti: “Patayentayon dagiti kautibo! Patayentayo idan!” Nagpakpakaasi ti dadduma: “Saan pay laeng! Aguraytayo!” Kaslattay asidegen ni patay. Nagkinnitakam ken ni Rubén a kaslattay kunami, ‘Agkitatanto laengen idiay baro a lubong.’ Kalpasanna nagkararagkami a siuulimek. Dagus a nariknami ti makin-uneg a kinakalma ken talna ti panunot, nga iti sidong dagiti kasasaad, aggapu laeng ken Jehova.​—Filipos 4:7.

Kellaat a simmardeng ti panagpaltog dagiti polis, ket maysa kadagiti lider ti derraaw ti nangitantan iti pannakapapataymi. Ti agkabannuag a balud a nangiggem kaniak ti nabilin nga ipagnapagnanak iti atep, kas pakdaar kadagiti polis. Napalalot’ nerbiosna. Manipud sadiay sa nagtultuloy, nabalinak a rinugian ti saritaan a namagkalma kadakam a dua. Inlawlawagko a ni Satanas ken dagiti demoniona ti mangisungsungsong iti panagsagaba ti tao ket asidegen a pagpatinggaen ni Jehova a Dios ti amin a kasta a panagsagaba.​—Apocalipsis 12:12.

Idi naisublikami iti ospital ti pagbaludan, natakuatanmi a napalalot’ pannakataranta ti adu kadagiti nakautibo. Inkagumaanmi nga iranud ti pammatimi maipapan kadagiti kari ni Jehova kadagiti padami a nakautibo. Insaritami kadakuada ti naikugnal-Biblia a namnamami iti masanguanan a Paraiso ditoy daga. Dadduma kadagiti nakautibo ti nangrugin a mangawag iti nagan ni Jehova. Nangipakita ti doktor iti naisangsangayan nga interes ket adu ti espesipiko a sinaludsodna. Daytoy ti nangituggod iti napaut a panaglinnawag iti Biblia babaen iti libro a Ti Pannakaammo a Mangiturong iti Biag nga Agnanayon.

Panangselebrar iti Memorial

Martes, ti maikapat nga aldaw ti pannakakautibomi, ti anibersario ti ipapatay ni Jesu-Kristo. Iti dayta nga aldaw, minilion a Saksi ni Jehova ken interesado a tattao iti sangalubongan ti agtataripnong tapno lagipen daytoy a pasamak kas panagtulnog iti bilin ni Jesus. (Lucas 22:19) Inyurnosmi met a selebraran ti Memorial.

Maysa a suli ti siled ti napili a para laeng kadakami. Awan ti di nalebaduraan a tinapay wenno nalabaga nga arak a mausar kas emblema. Ngem tinagiragsakmi a tallo ti nagkanta iti panagdaydayaw ken Jehova, nagkararag, ken nangrepaso iti salaysay ti Biblia maipapan iti maudi a rabii ni Jesus ken dadduma a pasamak a mainaig iti ipapatayna. Nariknami a nasingedkam unay kadagiti pamiliami ken naespirituan a kakabsatmi bayat nga aggigiddan a sinelebraranda ti Memorial iti intero a pagilian.

Nagpatingga ti Rigat

Nagraira ti tension, buteng, ken panagsegga kabayatan ti nagsasaruno nga uppat nga aldaw. Nupay kasta, naliwliwakami babaen iti nagadu a surat manipud kadagiti kabagian ken gagayyem, nga impalubos dagiti balud a maawatmi. Naminsan, napalubosankami pay a mangtelepono iti pamiliami. Anian a makapabang-ar a mangngegan ti timekda ken basaen ti ebkas ti ayat ken pannakaseknanda!

Idi Sabado, ti maikawalo nga aldaw ti pannakakautibomi, adda napagnunumuan dagiti managderraaw ken dagiti autoridad. Napakaammuankami a mawayawayaankamin iti sumuno nga aldaw. Iti Domingo, Abril 7, iti alas 2:30 ti malem, naawatmi ti damag: “Agsaganakayon a pumanaw!” Inorganisa dagiti balud ti maysa a ‘guardia de honor’ a mangkuyog kadakami a mawayawayaan! Bayat a rumrummuarkami iti ospital, ni Edgardo ket inasitgan ti pannakangiwat dagiti lider ti derraaw sa kinunana: “Kabsat, dayawek unay ti kababalinyo. Ikarik a manipud itan, tabunuakton ti Sinabado a gimongyo iti pagbaludan. Mangangaykayto latta iti gimgimong uray pay kalpasan ti napasamak, di ngamin?” Immisem ni Edgardo sa simmungbat: “Siempre!”

Sorpresa ti agur-uray kadakami iti ruar. Apaman a nairuarkami iti pasdek, nagpapalakpak amin dagiti balud agpaay a pammadayaw kadakami. Daytoy ti wagas a panangipakitada a ladingitenda ti napasamak. Makatukay-rikna daydi a kanito. Sigurado a ti Nakristianuan a kababalinmi kabayatan ti napalabas a siam nga aldaw ti namagsiddaaw kadakuada amin, a pakaidayawan ni Jehova.

Iti ruar ti inaladan ti pagbaludan, sinabatmi dagiti pamiliami ken ti agarup 200 a naespirituan a kakabsatmi. Nagiinnarakupkami buyogen iti dakkel a bang-ar. Nakalasatkami! Maysa kadagiti nakautibo ti immasideg ken ni baketko sa kinunana kenkuana: “Mariknak a tinignay ni Jehova ti pusok ket kayatna nga agserbiak kenkuana.”

Dakam kada Edgardo, ken Rubén ti nakasursuro iti naisangsangayan unay a pamay-an a kabaelan ni Jehova nga andingayen dagiti adipenna, uray pay kabayatan dagiti kaaaligagetan a rigat. Napasaranmi a nakaskasdaaw unay ti agkararag ken Jehova ket imdengannaka. Kas iti salmista, maikunami: “Itantan-okkanto O Jehova ta binataknak ket dika impalubos a dagiti kabusorko pagragragsakandak. O Jehova a Diosko, imkisak kenka, ket sika pinaimbagnak. O Jehova, sika inaonmo toy kararuak ken Tanem; sika tinaginayonnak a sibibiag, tapno diak agpababa iti abut.” (Salmo 30:1-3)​—Kas insalaysay ni Darío Martín.

[Blurb iti panid 19]

Sumagmamano a nakakaputsa a balud a naarmasan iti sinsinan nga imuko ti simrek iti siled a paggigimonganmi

[Blurb iti panid 20]

Inusar dagiti managderraaw ni Edgardo ken sumagmamano a guardia iti pagbaludan kas kalasag

[Blurb iti panid 21]

Inorganisa dagiti balud ti maysa a ‘guardia de honor’ a mangkuyog kadakami a mawayawayaan!

[Ladawan iti panid 18]

Ti tallo a simmarungkar a ministro (kannigid-kannawan): Edgardo Torres, Rubén Ceibel, ken Darío Martín