Report Dagiti Manangiwaragawag ti Pagarian
Panangisaknap iti Bin-i ti Pagarian iti Amin a Gundaway
TI SAO ti Dios, ti Biblia, iparegtana ti kinagaget. Kinuna ni Ari Solomon: “Iti bigat imulam ti bin-im, ket iti rumabii dika pagsardengen ta imam; ta dika ammo nga agrang-ayto, no daytoy wenno daydiay, wenno isuda nga agpadpada naimbagdanto.”—Eclesiastes 11:6.
Iti amin a maitutop a gundaway, agimulmula dagiti Saksi ni Jehova iti ‘bin-i’ babaen ti panangikasabada iti naimbag a damag ti Pagarian ti Dios. Iti nasurok a 230 a daga ken purpuro, agtultuloyda ‘nga awan sardayna nga isursuro ken idekdeklarada ti naimbag a damag maipapan iti Kristo, a ni Jesus.’ (Aramid 5:42) Ipakita dagiti sumaganad a kapadasan no kasano a dagiti Saksi ni Jehova ‘saanda a pagsardengen ti imada’ iti trabaho a panangasaba.
◻ Idiay Republika ti Cape Verde, magmagna ti maysa kadagiti Saksi ni Jehova iti asideg ti pagbaludan bayat a mangaskasaba. Iti paraangan ti pagbaludan, adda sumagmamano a balud nga immuli iti maysa a kayo. Idi matannawaganda ti Saksi, nagpukkaw dagiti balud nga agkidkiddaw kadagiti magasin. Inreppet ti Saksi iti maysa a bato ti sumagmamano a magasin a Pagwanawanan ken Agriingkayo! sana impalladaw iti ballasiw ti bakud ti pagbaludan. Kas resulta daytoy damo a panaginteres, nairugi ti 12 a panagadal iti Biblia. Tallo kadagiti balud ti nangidedikar iti biagda iti Dios ken nagpabautisar iti danum. Nasurok a makatawenen nga agserserbi ti maysa kadagiti balud kas amin-tiempo nga ebanghelisador, wenno payunir. Ngem, kasano ti panangasabada idiay pagbaludan? Umuna, biningaybingayda ti pagbaludan kadagiti teritoria. Kalpasanna pinagbibingayan dagiti tallo a Saksi ti teritoria sa mangasabada iti kada selda. Surnadan dagitoy a manangiwaragawag iti Pagarian ti interes a kas met iti ar-aramiden dagiti Saksi ni Jehova iti aglikmut ti lubong—babaen ti panagsarungkar. Nupay kasta, ti maysa a nakaidumaanna isu ti kasansan ti panagadal iti Biblia. Imbes a maminsan wenno mamindua laeng iti makalawas nga agadalda iti Biblia iti maysa nga oras wenno nasursurok pay, inaldaw ti panagadal ti dadduma kadagiti balud! Maysa pay, ti direktor heneral ti pagbaludan pinalubosanna dagiti Saksi a mangangay kadagiti amin a gimong ti kongregasion iti uneg ti pagbaludan.
◻ Adu a publikasion ti Watch Tower ti tinawid ti maysa a babai a taga-Portugal idi matay ti apongna a baket. Tangay saan a maysa kadagiti Saksi ni Jehova, saan nga interesado a mangidulin kadagiti libro. Ngem, dina kayat nga ibelleng dagitoy. Maysa nga aldaw, imbagana iti maysa kadagiti Saksi ni Jehova a simmarungkar iti pagtaenganna ti maipapan kadagiti libro. Sinaludsod ti Saksi no ammona ti pudno a pateg dagiti libro. Kinuna ti babai: “Kinapudnona, diak ammo ti pudno a pategda, ngem kasanok a maammuan?” Immannugot ti babai nga agadal iti Biblia, ket di nagbayag kinailalaannan dagiti libro daydi apongna. Maysa met itan a bautisado a Saksi ni Jehova. Mainayon pay, agad-adal metten iti Biblia ti balasangna ken ti maysa a nadekket a gayyem ti pamiliada. Anian a nagpateg a tawid dagitoy a libro!