Mannakibagay, Ngem Naikumit iti Nadiosan a Pagalagadan
“DAGITI napanuynoy a tattao pulos a saanda a maag, ket dagiti maag a tattao pulos a saanda a napanuynoy,” kuna ti maysa a proverbio nga Insik. Pudno unay daytoy a proverbio, ta ti panangpanuynoy ket maysa a karit, a makasapul iti pannakaikumit kadagiti umiso a pagalagadan iti kababalin. Ngem ania dagiti pagalagadan nga ikumittayo iti bagitayo? Saan kadi a nainkalintegan a surotentayo dagiti pagalagadan nga impasdek ti Nangaramid iti sangatauan, kas nailawlawag iti Saona, ti Nasantuan a Biblia? Impaay a mismo ti Dios ti kasayaatan nga ulidan iti panangsalimetmet kadagiti pagalagadanna.
Ti Namarsua—Ti Kangrunaan nga Ulidantayo
Ti Mannakabalin-amin a Dios, ni Jehova, naan-anay a natimbeng iti panangpanuynoy, a di mangipakita iti nalabes wenno bassit unay. Iti rinibu a tawenen, pinanuynoyanna dagidiay manglais iti naganna, ti dakes a sangatauan, ken ti di umiso a panangusar iti daga. Insurat ni apostol Pablo, kas nailanad iti Roma 9:22, a ti Dios “pinanuynoyanna buyogen iti kasta unay a mabayag a panagitured dagiti basehas ti pungtot a naaramid a maikari iti pannakadadael.” Apay a nakabaybayagen a nangpanuynoy ti Dios? Agsipud ta adda panggep ti panangpanuynoyna.
Naanus ti Dios iti sangatauan “ta saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.” (2 Pedro 3:9) Inted ti Namarsua iti sangatauan ti Biblia ket binilinna dagiti adipenna a mangiwaragawag kadagiti pagalagadanna iti kababalin iti isuamin a lugar. Naikumit dagiti pudno a Kristiano kadagitoy a pagalagadan. Ngem kayat kadi a sawen daytoy a dagiti adipen ti Dios masapul a naingetda iti isuamin a kasasaad?
Natibker, Ngem Mannakibagay
Pinaregta ni Jesu-Kristo dagidiay agsapsapul iti biag nga agnanayon a ‘sumrek iti akikid a ruangan.’ Ngem ti iseserrek iti akikid a ruangan dina kayat a sawen ti panagbalin nga akikid ti panagpampanunotna. No agannayastayo a mangdominar wenno dogmatiko kadagiti adda iti aglawlawtayo, sigurado nga ad-adda a makaay-ayo ti biag para iti tunggal maysa no lapdantayo daytoy a pagannayasan. Ngem kasano?—Mateo 7:13; 1 Pedro 4:15.
Kinuna ni Theofano, maysa nga estudiante a Griego, a nangilawlawag a ti panangbusbos iti tiempo a kadua ti tattao a nadumaduma ti nalikudanda ti nangibunga iti ad-adda a pannakaawatna kadakuada: “Nasken a matarusantayo ti panagpampanunotda imbes nga ipilittayo a surotenda ti panagpampanunottayo.” Gapuna, babaen ti ad-adda a panangam-ammo iti maysa, nalabit matakuatantayo a ti gustona a taraon ken uray ti panagbalikasna saan met gayam a karkarna a kas ti pagarupentayo idi. Imbes a datayo ti kaaduan ti maibagana wenno ipilittayo a ti saotayo laeng ti matungpal, masursurotayo dagiti adu a makagunggona a bambanag babaen ti panagimdeng kadagiti paniriganna. Kinapudnona, ad-adda a makagunggona ti biag ti tattao a silulukat ti panagpampanunotda.
No mairaman ti personal a pagayatan, rumbeng a saantay a nainget ken palubosantay ti dadduma a mangtagiragsak iti pagayatanda. Ngem no ti kababalin sapulenna ti panagtulnog iti Namarsuatayo, rumbeng a natibkertayo. Saan a panuynoyan ti Mannakabalin-amin a Dios ti amin a kita ti kababalin. Impakitana daytoy babaen iti pannakilangenna kadagiti adipenna idi napalabas.
Ti Silo a Panagbalin a Napanuynoy Unay
Ni Eli, maysa a nangato a padi iti kadaanan a nasion ti Israel, ket adipen ti Dios a nasalamaan iti silo a nalabes ti kinamanagpanuynoy. Nakitulag dagiti Israelita iti Dios, nga immanamongda a mangtungpal kadagiti lintegna. Ngem ti dua nga annak ni Eli, da Ofni ken Finees, naagum ken imoralda ken nakaro ti saanda a panagraem iti Mannakabalin-amin. Ni Eli, nupay pagaammona unay ti Linteg ti Dios, nangipaay laeng iti nalag-an a pannubngar ken nalukay ti panangdisiplinana. Nagbiddut iti panangipagarupna a panuynoyan ti Dios ti kinadakes. Ti Namarsua pagdumaenna ti pagkapuyan ken ti kinadakes. Gapu iti sipapakinakem a pananglabsingda iti Linteg ti Dios, nadusa iti nadagsen dagiti nadangkes nga annak ni Eli—ket umiso a kasta.—1 Samuel 2:12-17, 22-25; 3:11-14; 4:17.
Anian a didigra kadatayo no nalabes ti kinapanuynoytayo iti pamiliatayo babaen iti di panangikankano iti maulit-ulit a panagbasol dagiti annaktayo! Anian a nagsayaat no padakkelen ida “iti disiplina ken panangiturong-panunot ni Jehova”! Daytoy kaipapananna a masapul nga annurotentayo a mismo dagiti nadibinuan a pagalagadan ti kababalin ket ipasagepseptay ida kadagiti annaktayo.—Efeso 6:4.
Umasping iti dayta, ti kongregasion Kristiano dina panuynoyan ti kinadakes. No agaramid iti nakaro a kinadakes ti maysa a miembro ket agkedked nga agbabawi, masapul a maikkat. (1 Corinto 5:9-13) Nupay kasta, iti ruar ti pamilia ken iti kongregasion, dagiti pudno a Kristiano dida padasen a balbaliwan ti intero a kagimongan.
Nabileg a Relasion ken Jehova
Ti panagdandanag pataudenna ti di panangpanuynoy. Nupay kasta, no addaantay iti nasinged a personal a relasion iti Dios, tagiragsakentay ti kinatalged a tumulong kadatayo a mangtaginayon iti umiso a kinatimbeng. Mabasatayo iti Proverbio 18:10, “Ti nagan ni Jehova nabileg a sarikedked; ti nalinteg agkamang kenkuana, ket maisalakan.” Pudno unay awan dumteng a pannakadangran kadatayo wenno kadagiti inay-ayattayo a dinto tamingen ti Namarsua iti umiso a tiempo.
Ti maysa a nagunggonaan unay iti nasinged a relasion iti Dios ket ni apostol Pablo. Kas Judio a pagaammo kas Saulo, indadanesna dagiti pasurot ni Jesu-Kristo ket nakabasol iti panangibukbok iti dara. Ngem ni Saulo a mismo nagbalin a Kristiano ken, kas ni apostol Pablo, a kamaudiananna nagebanghelio iti amin-tiempo. Nangiparangarang ni Pablo iti silulukat a panagpampanunot iti panangasabana iti amin a tattao, “kadagiti Griego ken kadagiti Barbaro, agpadpada kadagiti masirib ken kadagiti nakuneng.”—Roma 1:14, 15; Aramid 8:1-3.
Kasano a nabaelanna ti nagbalbaliw? Babaen iti pananggun-odna iti umiso a pannakaammo iti Kasuratan ken babaen iti panangparang-ay iti ayat iti Namarsua, a saan a mangidumduma. Nasursuro ni Pablo a nainkalintegan ti Dios ket Isu ukomenna ti tunggal indibidual, saan a sigun iti kultura wenno puli, no di ket sigun iti kinatao ken aramidna. Wen, iti Dios, napateg dagiti aramid. Kinuna ni Pedro a “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Saan a mangidumduma ti Mannakabalin-amin a Dios. Daytoy ket saan a kas iti dadduma kadagiti pangulo ti lubong, a mabalin a gagaraenda nga usaren ti di panangpanuynoy a maipaay kadagiti bukodda a panggep.
Agbalbaliwen ti Tiempo
Sigun ken John Gray, iti Oxford University idiay Inglatera, ti panangpanuynoy ket “maysa a kalidad a manmanon iti nabiit pay.” Ngem agbalbaliwto daytoy. Agballiginto ti panangpanuynoy a timbengen ti nadibinuan a kinasirib.
Iti umad-adanin a baro a lubong ti Dios, awanton ti di panangpanuynoy. Dagiti nalabes a kita ti di panangpanuynoy, kas iti panangidumduma ken kinapanatiko, awandanton. Ti kinaakikid-ti panagpampanunot dinanton lapdan ti panangtagiragsak iti biag. Kalpasanna, addanto maysa a paraiso a nadadaeg ngem ti posible a maaramid koma idiay Tanap iti Kashmir.—Isaias 65:17, 21-25.
Segseggaanyo kadi ti agbiag iti dayta a baro a lubong? Anian a pribilehio ken anian a nakaragragsakto dayta!
[Ladawan iti panid 8]
Impakita ni apostol Pablo ti umiso a kinatimbeng agsipud ta adda pannakirelasionna iti Dios