Sikan a Mismo ti Agparusing
BABAEN TI KORESPONSAL TI AGRIINGKAYO! IDIAY HAWAII
AWAN kadi ti masarakam no dadduma a kappuros, nalangto, ken nasustansia a natnateng iti tiendaan iti lugaryo? Bueno, dika agbiroken! Iti kalalainganna laeng a tiempo ken bannog, aktual a makapatuboka iti nateng iti mismo a balay wenno apartmentmo. Kasano? Babaen ti panagparusing!
Nalaka a mantineren dagiti parusing nga uray ubing kabaelanna nga aramiden dayta. Bassit laeng nga espasio ti kasapulanda, din kasapulan ti agkali, agiruot, ken agipugsit kadagiti komplikado a kemikal. Kangrunaanna, mabalinmon a kanen ti apitmo kalpasan laeng ti uppat wenno lima nga aldaw a panagrusingna! Ngem ad-adu pay ti gunggona ngem ti kinanam-ay laeng.
Maysa pay, nasustansia dagiti parusing—nalabit nasussustansia pay ngem ti kadawyan a bukbukel. Kuna ti The Beansprout Book, ni Gay Courter: “Bayat a mangrugi a tumarubong dagiti bukel, mangrugi met nga umadu ti linaonda a bitamina. Dagiti umuna a rusing ti bukel ti soya (kada 100 a gramo [agarup 4 nga onsa] ti bukel) aglaon laeng iti 108 a miligramo ti bitamina C iti maysa a panagadal a naaramid idiay University of Pennsylvania. Ngem kalpasan ti 72 nga oras immadun ti linaonna a bitamina C iti 706 a miligramo!”
Nalaka met dagiti parusing. Kinapudnona, mabalin a kompletokan kadagiti amin nga alikamen a kasapulam.
Panagsagana
Umuna, kasapulam ti pagkargaan. Mabalinen ti dakkel a garapon a sarming wenno plastik, saan a metal a kaldero, sarming wenno seramika a malukong, wenno nasukong a malukong. Posible pay ti mangusar iti saan unay a nasukong a pagkargaan, nga iwarakiwakmo iti umuna a palunapin ti bukbukel iti nagbaetan ti dua a palunapin ti nabasa a katsa wenno paper towels tapno di agmaga. Aniaman a pagkargaan ti usarem, siguraduem nga umdas ti kadakkelna tapno makarusing dagiti bukel ken adda pagrikusan ti angin. Natakuatak a nagsayaat nga usaren ti garapon a sarming para kadagiti babassit a bukel a kas iti alfalfa. Nasaysayaat iti nasukong a malukong wenno banga dagiti daddadakkel a bukel, kas iti mung bean. Mangipaay daytoy iti ekstra nga espasio a kasapulanda ken maliklikan ti pannakalungsot wenno panagalsem ti parusing.
Kasapulamto met ti kalub ti pagkargaam. Umdasen ti plastik nga iskrin, maysa a katsa, wenno uray ti daan a medias a nylon. Ti laeng kasapulan ket nairut a lastiko wenno linas a maigalut iti wangawangan ti pagkargaan. Siempre, rumbeng a maugasan dagiti bukel iti uray mamindua iti maysa nga aldaw, kasapulamto met ti danum ken nalabit sagatan a pangarisitan ti pagkargaam.
Kamaudiananna, kasapulam dagiti bukel. Maparusing ti gistay aniaman a makan a bukel. (Ngem liklikak ti bukbukel a napugsitan iti kemikal.) Ti kasayaatan a bukbukel a padasen ti agdadamo isu ti mung bean wenno bukel ti alfalfa. Nalakada nga agrusing ken nananam! Ita, palubosandak a mangibaga no kasano nga aramiden.
Sikan a Mismo ti Agparusing
UMUNA NGA ALDAW: Umuna, arasawem a naimbag dagiti bukel. Kalpasanna, danumam ti pagkargaam agingga a lapunosenna dagiti bukel iti agarup 5 a sentimetro. Iyupermo dagiti bukel iti agarup walo agingga iti sangapulo nga oras. Mabalin nga iyupermo dagiti bukel sakbay unay ti pannaturog. Kalpasan ti walo agingga iti sangapulo nga oras, agbukar dagiti bukel ken medio agbirri dagiti ukisda. Nakasaganadan nga agrusing.
MAIKADUA NGA ALDAW: Iti agsapa, ikkatem ti kalub ken arisitam ti pagkargaan. (Tangay ti danum aglaon kadagiti bitamina, kadawyanna nga usarek a pangsibug iti mulmulak.) Ita, danumam manen ti pagkargaan. Kulogem iti sumagmamano a daras, ken balinsuekem, a palubosam nga agtedted ti natda a danum. Ulit-ulitem a danumam ti pagkargaan, nga arasawem ken paarisitam dagiti bukel agingga iti mamitlo a daras. No inyakarmon dagiti nayuper a bukel iti nasayad a plato, in-inayadem a paaruyoten ti danum iti katsa, sa arisitem babaen ti medio panangirigmo iti plato. Kalpasanna, arasawem manen tapno naan-anay a maugasan dagiti bukel iti mamindua iti kada aldaw.
MAIKATLO NGA ALDAW: Ita, makitamon nga agrusrusingen dagiti bukelmo. Itultuloymo nga ugasan ida iti mamindua iti kada aldaw.
MAIKAPAT NGA ALDAW: Mabalinmon a kanen dagiti naparusingmo! Mabalinmo a parusingen dagiti mung-bean iti kadakkel a dinto napait ti ramanda. Basta siguraduem nga arasawem dagiti parusing mamindua iti kada aldaw. Mabalinmo met nga ibilag ti parusingmo iti agarup maysa nga oras sa ikabilmonto iti refrigerator. Dagiti bassiusit a bulong agbalinto a makaay-ayo ti kinaberdeda—nakaim-imas!
Tangay nagballigikan, mabalin a kayatmo itan a padasen ti dadduma pay a kita ti bukel. Tunggal maysa ket naiduma bassit iti raman ken kapaut a maparusing. Kas pagarigan, mabalin a padasem ti agparusing iti naukisanen a bukel ti sunflower. Dagitoy a parusing ti kasayaatan a kanen iti dua nga aldaw, no gudua-pulgadada pay laeng. No dumakkelda pay ngem iti dayta, napapaitton ti ramanda.
No Kasano nga Idasar Dagiti Parusing
Makan a naata ti kaaduan a rusing kadagiti salad, sandwich, wenno aniaman a putahe a pakausaran ti bukel. Ngem mabalin nga ilingta dagiti naparusing a bukel iti 10 agingga iti 15 a minuto sakbay a kanem ida. Wenno mabalinmo nga igisa iti bassit laeng a manteka, bawang, ken asin. Nagimasto daytoy a putahe! Nagsam-it dagiti naparusing a trigo ken rye ken nagsayaat nga inayon iti tinapay ken muffin.
Makapasalun-at ken naekonomia ngarud nga apision ti panagparusing. Mabalin a matakuatamto a makaparagsak ken makagunggona ti panagaramid iti dayta. Ngamin, masansan a naballigi ken nagimas dagiti resultana!
[Picture Credit Line iti panid 23]
Japanese Stencil Designs
[Ladawan iti panid 24]
UMUNA NGA ALDAW: Mangurnongka iti bukel sa iyupermo iti danum iti walo agingga iti sangapulo nga oras
[Ladawan iti panid 24, 25]
MAIKADUA KEN MAIKATLO NGA ALDAW: Arasawem a naimbag dagiti bukel mamindua iti kada aldaw
[Ladawan iti panid 25]
MAIKAPAT NGA ALDAW: Mabalinen a kanen dagiti parusing! (a makita manipud sikigan, iti rabaw ti katsa)