LENTEHAS

[Heb., ʽadha·shahʹ].

Tinawen a mula a nagtaud iti pamilia ti bukbukel a nabayagen nga imulmula ti tao ken nasaknap pay laeng a maimulmula idiay Egipto ken Israel, kas met iti dadduma pay a daga. (2Sm 17:27, 28; 23:11) Daytoy bassit a mula (Lens esculenta), nga agtayag manipud 15 agingga iti 46 cm (6 agingga iti 18 pul.), bumarusbos iti naruka, namaga a daga. Dagiti nagtitipon a bulongna, kadawyan a buklen ti innem a paris ti arinduyog a babassit a bulong, agngudo kadagiti gamat. Dagiti nakuttong a babassit a sanga addaan iti dua agingga iti uppat a babassit a kasla gisantes a sabsabong tunggal maysa. Dagiti ababa a bunga a tumanor kadagiti sabong umarngida kadagiti bunga ti gisantes, ket gagangay a naglaonda iti dua a babassit a sukog-lente a bukbukel. Ti maris dagiti bukel ken maris dagiti sabong nagduduma iti kakikita ti mula a lentehas. Dagiti bukel mabalin a lumabaga a kayumanggi, dapul, wenno nangisit, ket dagiti sabong, puraw wenno nakusnaw nga asul. Nabaknang iti protina ken karbohidrato, dagiti bukel ket, kas idi naglabas, gagangay a maar-aramat kadagiti sopas. (Ge 25:34) Mailaok iti sebada, dagiti lentehas naar-aramat a pagaramid iti tinapay. (Idiligyo ti Eze 4:9.) Ti mismo a mula makapagpaay unay a taraon dagiti dinguen.